1 SAMIELE 8 - BIBELE Mahungu Lamanene

Ta Vaisraele loko va kombela ku va ni hosi

¹ Loko Samiele a dyuharile, a veka vana va yena ku va vaavanyisi va timhaka ta Vaisraele.

² N'wana wa yena wa mativula a a ri Yuwele, lowa vumbirhi a a ri Abiya. A va ri vaavanyisi emutini wa Berexeba.

³ Vana lava a va landzanga mintila ya Samiele tata wa vona, kambe va hambukile hi ku navela ngopfu mali, va pfumela ku xaviwa, va nga ha avanyisi timhaka hi ku lulama.

⁴ Hiloko vakulukumba hinkwavo va Israele va hlengeletana, va ya vonana na Samiele eRhama,

⁵ va ku ka yena: “Vona, u dyuharile, naswona vana va wena a va hanyi hi tindlela ta wena; hikokwalaho, hi hlawulele hosi leyi nga ta hi fuma, hi ta fana ni van'wana vanhu va matiko hinkwawo.”

⁶ Kambe mhaka leyi yo kombela hosi a yi tsakisanga Samiele, kutani a yi veka eka HOSI Xikwembu hi xikhongelo.

⁷ HOSI Xikwembu xi hlamula xi ku ka yena: “Yingisa hinkwaswo leswi vanhu lava va ku byelaka swona; hikuva a va fularheli wena, kambe va fularhela mina, leswaku ndzi nga ha vi hosi ya vona.

⁸ Va hanyisile sweswo minkarhi hinkwayo, hi mpfhuka xa loko ndzi va humesile etikweni ra Egipta, ku fika ni namuntlha: Va ndzi fularherile va ya tirhela swikwembu swimbe, kutani na wena va ku endla sweswo namuntlha.

⁹ Sweswi ke, yingisa leswi va swi vulaka, ntsena u ta va laya swinene, u va tivisa maendlele ya hosi leyi nga ta va fuma.”

¹⁰ Samiele a byela vanhu lava a va kombela hosi eka yena emarito lawa hinkwawo ya HOSI Xikwembu,

¹¹ kutani a ku: “Hosi leyi nga ta mi fuma, yi ta endlisa leswi: Yi ta teka majaha ya n'wina leswaku ma ya va vakhandziyi va makalichi ya yona ni vagadi va tihanci ta yona; va ta hamba va tsutsuma emahlweni ka makalichi ya yona.

¹² Naswona, hosi yi ta va endla tindhuna ta nyimpi ni ta mavuthu; kasi van'wana va ta rima masimu ya hosi ni ku tshovela mavele ya yona; va ta fula matlhari ya yona ni tinsimbhi ta makalichi ya yona.

¹³ Yi ta sindzisa vana va n'wina va vanhwanyana ku va vapfanganyisi va mafurha layo nun'hwela, ni ku va vasweki va nyama, ni vaendli va swinkwa.

¹⁴ Yi ta teka masimu ya n'wina lamanene, ni mintanga ya n'wina leyinene ya vhinya ni ya mitlhwari, yi nyika malandza ya yona.

¹⁵ Eka khume rin'wana ni rin'wana ra swirhundzu swa mavele kumbe mihandzu ya vhinya, hosi yi ta pambula xin'we, yi nyika valanguteri va yona ni malandza ya yona.

¹⁶ Yi ta sindzisa malandza ya n'wina ya xinuna ni ya xisati, ni tihavi ta n'wina leto saseka, ni timbhongolo ta n'wina, leswaku swi tirhela yona.

¹⁷ Eka khume rin'wana ni rin'wana ra timbuti kumbe tinyimpfu, hosi yi ta pambula yin'we; loko a ri n'wina, mi ta va mahlonga ya yona.

¹⁸ Kutani enkarhini wolowo mi ta rila hikwalaho ka hosi leyi mi nga tihlawulela yona hi n'wexe, kambe HOSI Xikwembu a xi nga mi hlamuli, hi siku rero.”

¹⁹ Vanhu va tiko va ala ku yingisa marito ya Samiele, kutani va ku: “E-e! Hi lava hosi leyi yi nga ta hi fuma,

²⁰ leswaku hi ta fana ni vanhu va matiko hinkwawo, ni leswaku hosi ya hina yi ta hi fambisa, yi hi rhangela emahlweni, yi lwa tinyimpi ta hina.”

²¹ Kuteloko Samiele a twile marito hinkwawo ya vanhu va tiko, a ya ma vikela HOSI Xikwembu.

²² Kutani HOSI Xikwembu xi ku eka Samiele: “Yingisa marito ya vona, u va vekela hosi.” Hiloko Samiele a ku ka vavanuna va Israele: “Mukani hinkwenu! Yanani emakaya!”