1 SAMIELE 4 - BIBELE Mahungu Lamanene

¹ Kutani leswi Samiele a a swi vula, a swi amukeriwa etikweni hinkwaro ra Israele. Enkarhini wolowo Vaisraele va huma nyimpi va ya lwa ni Vafilista, kutani va ya gova kusuhi na Ebenezere, Vafilista vona va gova le Afeka.

Ta Vafilista loko va teka Areka

² Vafilista va xaxamela, va ya lwa ni Vaisraele. Nyimpi yi ya yi hisa, kutani Vaisraele va hluriwa hi Vafilista; ku dlayiwa vavanuna lava lavaka ku ringana 4 000 erivaleni ra nyimpi.

³ Kuteloko mavuthu ma tlhelele emixaxeni, vakulukumba va Israele va ku: “Hikwalaho ka yini HOSI Xikwembu xi hi tshikile hi hluriwa hi Vafilista namuntlha ke? A hi yeni eXilo hi ya teka Areka ya Ntwanano wa HOSI Xikwembu, leswaku xi ta va exikarhi ka hina, ni leswaku xi ta hi lamulela emavokweni ya valala va hina.”

⁴ Kutani va rhuma vanhu va ya emutini wa Xilo, va ya teka Areka ya Ntwanano wa HOSI ya matimba hinkwawo, Xikwembu lexi nga xiluvelweni ehenhla ka tikerubu. Vana va Heli vambirhi, Hofini na Finiyasi, na vona va longoloka ni lava rhwalaka Areka ya Ntwanano wa Xikwembu.

⁵ Loko Areka ya Ntwanano wa HOSI yi fika emixaxeni, Vaisraele hinkwavo va khana va ba minkulungwana, misava yi ko yi tsekatseka.

⁶ Vafilista va twa huwa leyi ya ntsako, kutani va vutisana va ku: “Huwa leyikulu leyi twalaka emixaxeni va Vaheveru, xana yi nga va yi ri ya yini ke?” Kutani loko va twa leswaku Areka ya HOSI yi fikile emixaxeni,

⁷ va chava ngopfu, va byelana va ku: “Ku fikile Xikwembu emixaxeni ya vona.” Va tlhela va ku: “Hi le khombyeni! Mhaka yo tano a yi si tshama yi humelela ni siku ni rin'we.

⁸ Hi le khombyeni hakunene! Xana i mani la nga ta hi ponisa emavokweni ya Xikwembu lexi xa matimba xana? Hi xona Xikwembu lexi xi nga heta Vaegipta hi mintungu ya tinxaka-xaka le mananga!

⁹ Pfukani mi tiya n'wina Vafilista, mi tikomba leswaku mi vavanuna. Loko swi nga ri tano, mi ta hundzuka mahlonga ya Vaheveru, mi va tirhela tani hi leswi na vona va nga va mahlonga ya hina va hi tirhela. Tikombeni leswaku mi vavanuna, mi lwa swinene!”

¹⁰ Kavaloko Vafilista va lwa ni Vaisraele, va va hlula, kutani Vaisraele hinkwavo va tsutsumela emakaya; kambe lavo tala ngopfu exikarhi ka vona a va dlayiwile; a ku file tinhenha ta Vaisraele to ringana 30 000, leti a ti famba hi milenge.

¹¹ Areka ya Xikwembu yi tekiwa, vana va Heli Hofini na Finiyasi na vona va dlayiwa hi vumbirhi bya vona.

Ta ku fa ka Heli

¹² Wanuna wa nyimba ya va ka Benjamini a ta hi ku tsutsuma a huma enyimpini, a ta fika emutini wa Xilo siku rero. A a handzulerile swiambalo swa yena, a ticherile ni misava enhlokweni.

¹³ Loko a fika, a kuma Heli a tshamile exitshan'wini xa yena kusuhi ni gondzo, a ri eku languteleni, hikuva a a vilelela ngopfu Areka ya Xikwembu. Wanuna wa kona a nghena emutini, a va tivisa timhaka, kutani vaaki hinkwavo va muti va tlhava mukhosi.

¹⁴ Heli a twa huwa ya swirilo, kutani a vutisa a ku: “Xana nkitsikitsi lowu wu nga va wa yini xana?” Hiloko wanuna yoloye a ta hi ku hatlisa, a fika a tivisa Heli leswi humeleleke.

¹⁵ (Heli a a ri ni malembe ya 98. Mahlo ya yena a ma phumerile, ma nga ha voni swinene.)

¹⁶ Kutani wanuna yoloyi a ku ka Heli: “Mina a ndzi ri enyimpini, ndza ha ku baleka kona sweswi.” Heli a ku: “Xana ku humelele yini n'wananga?”

¹⁷ Murunguri wa timhaka a hlamula a ku: “Vaisraele va tsutsumile va chava Vafilista; tlhandlakambirhi vavanuna lavo tala va dlayiwile, kutani vana va wena Hofini na Finiyasi na vona va file ha vambirhi; xo hetelela, na Areka ya Xikwembu yi tekiwile.”

¹⁸ Kuteloko wanuna a rungula ta Areka ya Xikwembu, Heli a wa hi xikosi exitshan'wini xa yena, a wela kusuhi ni nyangwa, a tshoveka nhamu, a fisa sweswo, hikuva a a dyuharile ngopfu, naswona a a ri munhu wa miri swinene. Ú vile muavanyisi wa timhaka ta Vaisraele hi malembe ya 40.

Ta ku fa ka nkata Finiyasi ni ku velekiwa ka Ikabodo

¹⁹ Enkarhini wolowo, n'wingi wa Heli nkata Finiyasi a a tikile, a ri kusuhi ni ku veleka. Loko a twa mahungu ya leswaku Areka ya Xikwembu yi tekiwile, ni leswaku tata wa nuna wa yena ni nuna wa yena va file, a tlhaveka kan'we-kan'we kutani a wela ehansi, a veleka n'wana.

²⁰ Loko a sungula ku hlala, tisungukati leti a ti n'wi tshamerile ti ku ka yena: “U nga chavi! U kumile n'wana wa mufana!” Kambe yena a nga ti hlamulanga nchumu, a nga swi endlanga mhaka.

²¹ Ú lo kota ntsena ku thya n'wana vito ra Ikabodo (hileswaku: “A ka ha ri na ku dzuneka”), kutani a ku: “Ku dzuneka ku sukile etikweni ra Israele.” (A a vula hi ku tekiwa ka Areka ya Xikwembu, ni ku lova ka tata wa nuna, ni ka nuna wa yena.)

²² Marito lawa ya nge: “Ku dzuneka ku sukile etikweni ra Israele”, ú ma vurile hikwalaho ka Areka ya Xikwembu leyi phanghiweke.