1 SAMIELE 3 - BIBELE Mahungu Lamanene

Xikwembu xi vitana Samiele

¹ Mufana Samiele a a tirhela HOSI Xikwembu a ri hansi ka Heli. Eminkarhini yoleyo, rito ra HOSI a ri kala ngopfu; swivono a swi nga tali ku va kona.

² Siku rin'wana, Heli a a etlele endlwini ya yena. Mahlo ya yena a ma sungula ku phuma, a nga ha koti ku vona swinene.

³ Rivoni ra Xikwembu a ri nga si timiwa mpundzu wolowo, naswona Samiele a a etlele eTempeleni ya HOSI Xikwembu, laha Areka ya xona a yi ri kona.

⁴ Kutani HOSI Xikwembu xi vitana Samiele; yena a hlamula a ku: “Ndza ta!”

⁵ kutani a tsutsumela eka Heli, a ya ku: “Hi mina loyi, hikuva u ndzi vitanile!” Kambe Heli a ku ka yena: “Mina a ndzi ku vitananga, tlhela u ya etlela.” Kutani Samiele a tlhela a ya etlela.

⁶ HOSI Xikwembu xi engeta xi vitana Samiele, kutani yena a pfuka, a ya eka Heli, a ku: “Hi mina loyi, hikuva ndzi twe u ndzi vitana.” Kambe Heli a ku: “A ndzi ku vitananga n'wananga, tlhela u ya etlela.”

⁷ Samiele a a nga twisisi leswaku ú vitaniwa hi HOSI Xikwembu, hikuva a a nga si tshama a twa rito ra xona.

⁸ HOSI Xikwembu xi vitana Samiele ra vunharhu, kutani yena a pfuka, a ya eka Heli, a ku: “Hi mina loyi, hikuva u ndzi vitanile!” Ku va kona Heli a twisisaka leswaku loyi a vitanaka Samiele, hi yona HOSI.

⁹ Kutani a ku ka Samiele: “Tlhela u ya etlela. Loko u vitaniwa nakambe, hlamula u ku: ‘Vulavula HOSI, hikuva mina nandza wa wena ndza yingisa.’ ” Hiloko Samiele a tlhela a ya etlela eTempeleni.

¹⁰ Kutani HOSI Xikwembu xi fika xi yima kwalaho, xi vitana ku fana ni le ku sunguleni, xi ku: “Samiele, Samiele!” Samiele a hlamula a ku: “Vulavula HOSI, hikuva mina nandza wa wena ndza yingisa.”

¹¹ Kavaloko HOSI Xikwembu xi ku ka Samiele: “Yingisa, ndzi ta endla mhaka exikarhi ka Vaisraele, leyi nga ta chavisa vanhu hinkwavo swinene loko va yi twa.

¹² Hi siku rero, ndzi ta vangela Heli hinkwaswo leswi ndzi swi vuleke hi tlhelo ra rixaka ra yena, ndzi nga siyi nchumu.

¹³ Ndzi n'wi tivisa leswaku ndzi lava ku avanyisela makumu rixaka ra yena, hikwalaho ka swidyoho swa vana va yena leswi a swi tivaka: Va vulavurile swo biha hi mina Xikwembu, kambe a nga va tshinyanga.

¹⁴ Sweswi ke, ndzi tiyisa hi ku hlambanya eka va rixaka ra Heli, ndzi ri: Swidyoho swa vona swi nga ka swi nga rivaleriwi ni siku ni rin'we, hambi hi magandzelo, hambi hi timhamba!”

¹⁵ Samiele a ya etlela ri kondza ri xa, kutani a pfuka a ya pfula timbanti ta Tempele ya HOSI; kambe ú chavile ku ya hlamusela Heli timhaka ta xivono.

¹⁶ Kavaloko Heli a vitana Samiele, a ku: “Samiele n'wananga!” Yena a ku: “Hi mina loyi!”

¹⁷ Heli a ku: “Xana Xikwembu xi ku byerile yini xana? U nga ndzi fihleli nchumu. Ndza tiyisa hi ku hlambanya emahlweni ka xona leswaku u ta va ni nandzu lowukulu, loko u ndzi fihlela mhaka yihi na yihi leyi xi nga ku tivisa yona.”

¹⁸ Hiloko Samiele a n'wi byela hinkwaswo, a nga n'wi fihleli nchumu. Kutani Heli a ku: “HOSI yi vulavurile, a yi endle leswi yi swi vonisaka swona.”

¹⁹ Kutani Samiele a kula, HOSI Xikwembu xi ri na yena, xi nga tshiki marito ya xona ma wela hansi.

²⁰ Kutani Vaisraele hinkwavo, ku suka eDani ku ya fika eBerexeba, va swi tiva leswaku hakunene Samiele i muprofeta wa HOSI Xikwembu.

²¹ HOSI Xikwembu xi tlhela xi humelela emutini wa Xilo, hikuva hi kona laha xi tshamaka xi tikomba eka Samiele, hi rito ra xona.