1 SAMIELE 27 - BIBELE Mahungu Lamanene

Ta Davhida loko a balekela etikweni ra Vafilista

¹ Davhida a tiehleketa, kutani a ku: “Sawulo ú ta kala a ndzi dlaya. A ku na ndlela yin'wana, ehandle ka ku va ndzi balekela etikweni ra Vafilista; Sawulo ú ta karhala ku ndzi lava ematlhelweni hinkwawo ya tiko ra Israele; kutani mina ndzi ta va ndzi ponile emavokweni ya yena.”

² Kutani Davhida ni vavanuna va yena va 600 va longa va ya luvela eka Akixi n'wana Mawoko, hosi ya le Gati.

³ Davhida ni vanhu lava va yena va tshama na Akixi emutini wa Gati, un'wana ni un'wana a ri ni ndyangu wa yena. Davhida a a ri ni vasati va yena vambirhi, Ahinowama wo huma le Yizriele, na Abigayele, loyi khale a a ri nkata Nabala wa le Karmele.

⁴ Loko Sawulo a byeriwile leswaku Davhida ú balekele eGati, a nga ha yanga emahlweni a n'wi lava.

⁵ Siku rin'wana, Davhida a ku ka Akixi: “Ndzi ni xikombelo: Loko u ndzi tsakela, ndzi nyike ndhawu yo tshama, eka wun'wana wa miti ya le handle. A swi bohi leswaku mina nandza wa wena ndzi tshama na wena laha ntsindza.”

⁶ Kutani hi siku rero, Akixi a n'wi komba muti wa Sikilaga. (Hikokwalaho, ku fikela siku ra namuntlha, muti wa Sikilaga wa ha ri wa tihosi ta Yuda.)

⁷ Kutani Davhida a tshama etikweni ra Vafilista lembe rin'we ni mune wa tin'hweti.

⁸ Enkarhini wolowo, Davhida ni vavanuna va yena a va hamba va huma nyimpi va ya hlasela Vagexuri, ni Vagirizi, ni Vaamaleke lava a ku ri khale va tshamile etikweni rero, ku ya fika emutini wa Xuru, kusuhi ni tiko ra Egipta.

⁹ Davhida a hlasela tiko leri hinkwaro, a nga tsetseleli, a dlaya hambi wanuna kumbe wansati, naswona a phangha tinyimpfu, ni tihomu, ni timbhongolo, ni tikamela, ni swiambalo, a vuya na swona eka Akixi.

¹⁰ Loko Akixi a n'wi vutisa a ku: “Xana namuntlha a mi hlasela kwihi xana?” Davhida a a hlamula a ku: “A hi hlasela edzongeni, ematlhelweni ya va le Yuda”, kumbe: “Ematlhelweni ya va le Yerahamiele”, kumbe: “Etikweni ra Vakeni.”

¹¹ Davhida a a nga tsetseleli, a dlaya hambi wanuna kumbe wansati, hikuva a a chava leswaku va nga fikisa eGati timhaka ta leswi yena ni vavanuna va yena va swi endleke. Lowu a wu ri ntolovelo wa yena, enkarhini hinkwawo lowu a tshameke etikweni ra Vafilista.

¹² Akixi a a tshemba Davhida swinene, a anakanya a ku: “Davhida ú tivangele rivengo lerikulu eka vanhu va ka vona va Israele; hikokwalaho ú ta ndzi tirhela vutomi bya yena hinkwabyo!”