1 SAMIELE 19 - BIBELE Mahungu Lamanene

Ta Sawulo loko a ringeta ku dlaya Davhida

¹ Siku rin'wana Sawulo a vulavula ni n'wana wa yena Yonatani, ni malandza ya yena hinkwawo, hi ta ku dlaya Davhida. Kasi Yonatani n'wana wa yena a a rhandza Davhida ngopfu,

² kutani a ya n'wi hlevela a ku: “Tata wa mina Sawulo ú ni makungu ya ku ku dlaya. Hikokwalaho, mundzuku loko ri xa, tivonele swinene, u tshama endhawini yin'wana, u tumbela kona.

³ Kutani mina ndzi ta huma na tatana, hi ya yima kusuhi ni laha u nga ta va u tumberile kona emasin'wini. Ndzi ta ku khongelela eka yena, kutani loko ndzi vonile hilaha timhaka ti yimeke hakona, ndzi ta ku tivisa.”

⁴ Yonatani a khongelela Davhida swinene eka Sawulo tata wa yena, a ku: “We hosi, u nga tshuki u hoxela nandza wa wena Davhida, hikuva na yena a nga ku hoxelanga nchumu, naswona mintirho ya yena yi ku pfunile swinene.

⁵ A nga chavanga ku fa, siku a dlayeke Mufilista, kutani hi siku rero HOSI Xikwembu xi ponisile Vaisraele hinkwavo hi ndlela yo hlamarisa. Loko u vonile leswi, swi ku tsakisile. Hikwalaho ka yini u lava ku dlaya Davhida xana? Wa hoxa! Munhu loyi a nga na nandzu, u ta va u halata ngati ya yena mahala.”

⁶ Kutani Sawulo a yingisa marito ya Yonatani, a hlambanya a ku: “Ndza tiyisa emahlweni ka HOSI Xikwembu lexi hanyaka, ndzi ri: Davhida a nga ka a nga dlayiwi!”

⁷ Kwalaho Yonatani a vitana Davhida, a n'wi hlamusela timhaka leti hinkwato, kutani a n'wi tlherisela eka Sawulo. Davhida a ya emahlweni a tirhela Sawulo tanihi masiku.

⁸ Nyimpi yi tlhela yi pfuka, kutani Davhida a huma a ya lwa ni Vafilista, a va hlasela swinene, va kondza va n'wi tsutsuma.

⁹ Kambe moya lowo biha lowu rhumiweke hi HOSI Xikwembu wu nghena eka Sawulo. A a tshamile endlwini ya yena, a tamele tlhari, Davhida a ri karhi a n'wi chayela haripa,

¹⁰ kutani Sawulo a ringeta ku tlhava Davhida hi tlhari leswaku a ta n'wi katsa ni khumbi, kambe Davhida a vhika, tlhari ri ya tlhava khumbi. Kutani vusiku byebyo Davhida a suka a tsutsuma, a ponisa sweswo.

¹¹ Kutani Sawulo a rhumela vanhu ekaya ka Davhida va ya n'wi rindza, leswaku a ta dlawa loko ri xile. Kambe Mikala a ku ka nuna wa yena Davhida: “Loko u nga tsutsumi vusiku byebyi, u tiponisa, mundzuku va ta ku dlaya.”

¹² Kavaloko Mikala a humesa Davhida hi ku n'wi nembeleta hi le fasitereni, kutani Davhida a tsutsuma, a ponisa sweswo.

¹³ Mikala a teka xifaniso lexi vatliweke xa swikwembu, a xi lata esangwini, a seketela nhloko ya xona hi xinkumbana lexi lukiweke hi voya bya timbuti, kutani a xi funengeta hi nkumba.

¹⁴ Loko Sawulo a rhumela vanhu ku ya khoma Davhida, Mikala a ku ka vona: “Wa vabya!”

¹⁵ Sawulo a tlhela a rhuma vanhu lava, a ku ka vona: “Yanani, mi ya vona Davhida hi mahlo, mi n'wi rhwala hi sangu ra yena, mi vuya na yena haleno ka mina, ndzi ta n'wi dlaya.”

¹⁶ Varhumiwa va lo na fika va nghena, va kuma leswaku ku ni xifaniso lexi vatliweke xa swikwembu esangwini, nhloko ya xona yi seketeriwile hi xinkumbana xa voya bya timbuti.

¹⁷ Kutani Sawulo a vutisa Mikala a ku: “Hikwalaho ka yini u ndzi kanganyisile hi ndlela leyi, u tshika nala wa mina a tsutsuma a baleka, xana?” Mikala a hlamula Sawulo a ku: “Hi yena la nga te: ‘Loko u nga ndzi tshiki ndzi tsutsuma, ndzi ta boheka ku ku dlaya!’ ”

¹⁸ Loko Davhida a balekile, a tsutsuma a ya fika eka Samiele emutini wa Rhama, a n'wi rungulela hinkwaswo leswi Sawulo a n'wi endleke swona; kutani va suka hi vumbirhi bya vona, va ya tshama eNayoto.

¹⁹ Vanhu va tivisa Sawulo leswaku Davhida ú le Nayoto, le Rhama.

²⁰ Kavaloko Sawulo a rhumela vanhu ku ya khoma Davhida. Loko varhumiwa lava va fika, va vona ntlawa wa vaprofeta lava a va ri eku vhumbheni, va rhangeriwile hi Samiele, kutani na vona va ngheniwa hi Moya wa Xikwembu, va sungula ku vhumbha.

²¹ Loko Sawulo a byeriwa timhaka leti, a rhumela van'wana vanhu, kutani na vona va fika va sungula ku vhumbha. Sawulo a engeta a rhumela ntlawa wa vunharhu, na wona wu fika wu sungula ku vhumbha.

²² Hiloko a ya eRhama hi yexe. Loko a fika exihlobyeni lexikulu lexi nga eSeku, a vutisa a ku: “Xana Samiele na Davhida, va kwihi xana?” A byeriwa leswaku va le Nayoto, le Rhama.

²³ Kwalaho, a suka a ya kona. Loko a ha ri endleleni, na yena a ngheniwa hi Moya wa Xikwembu, a sungula ku vhumbha, ku kondza a ya nghena eNayoto le Rhama;

²⁴ a hluvula swiambalo swa yena ku fana ni vaprofeta, kutani a vhumbha emahlweni ka Samiele, a wela hansi, a tshama a nga ambalanga nchumu siku rero hinkwaro ni vusiku bya kona (xivuriso lexi nge: “Xana Sawulo na yena i un'wana wa vaprofeta xana?” xi sukela kwalaho).