1 SAMIELE 18 - BIBELE Mahungu Lamanene

¹ Loko Sawulo a hetile ku vulavula na Davhida, Yonatani a titwa a ri ni moya wun'we na Davhida, a n'wi rhandza kukota loko a tirhandza.

² Hikwalaho ka leswi, ku sukela siku rero, Sawulo a a hlayisa Davhida emutini wa yena, a nga ha n'wi pfumeleli ku tlhelela ekaya.

³ Kutani Yonatani a endla xinakulobye na Davhida, hikuva a a n'wi rhandza kukota loko a tirhandza.

⁴ Swi fike laha Yonatani a nga hluvula nkhancu lowu a a wu ambarile a nyika Davhida, a n'wi hlakatela ni swiambalo swin'wana swa yena; na rona fumu ra yena, ni vurha bya yena, ni vamba ra yena, a n'wi nyika.

⁵ Loko Davhida a tshuka a huma ni mavuthu, a a kota hinkwaswo leswi Sawulo a n'wi lerisaka swona. Hikokwalaho, Sawulo a n'wi tlakusa, a va un'wana wa vafambisi va mavuthu. Kutani ku tlakusiwa ka Davhida swi tsakisa tiko hinkwaro, hambi ma ri malandza laman'wana ya Sawulo.

Ta loko Sawulo a vondzoka Davhida

⁶ Siku rin'wana, loko Davhida ni mavuthu va vuya hi le ku hlaseleni ka Vafilista, vavasati va huma emitini hinkwayo ya Israele, va ri karhi va yimbelela ni ku cina, va ya hlanganisa hosi Sawulo va tamele swingomana, va ba ni minkulungwana, va chaya swichaya-chayana swa vona,

⁷ va khana, va ri karhi va yimbelela swin'we risimu leri nge: “Sawulo ú dlele magidi ya vanhu, Davhida ú dlele va magidi-gidi!”

⁸ Sawulo a hlundzuka swinene, a nga tsakeli risimu leri ni kutsongo, kutani a ku: “Davhida va n'wi hlayela magidi-gidi ya ntsandza-vahlayi, kasi mina, va ndzi hlayela magidinyana ntsena. Ka ha sele yini? Ku lo sala ntsena leswaku va n'wi veka hosi!”

⁹ Ku sukela siku rero, Sawulo a sungula ku languta Davhida hi tihlo ro tshwuka.

¹⁰ Siku leri tlhandlamaka, Sawulo a ngheniwa hi moya lowo biha lowu rhumiweke hi Xikwembu, a jamuka-jamuka endlwini ya yena, Davhida a ri eku n'wi chayeleni ka haripa tanihi masiku. Enkarhini wolowo, Sawulo a a khomile tlhari,

¹¹ kutani a ri tlakusa, a ri karhi a anakanya a ku: “Ndzi ta tlhava Davhida, ndzi n'wi katsa na khumbi!” Kambe Davhida a goja kambirhi.

¹² Kutani Sawulo a sungula ku chava Davhida. (Mhaka hi leswaku HOSI Xikwembu a xi n'wi tshikile, xi yima na Davhida.)

¹³ Hikokwalaho, Sawulo a susa Davhida, a n'wi yisa kule na yena hi ku n'wi endla ndhuna ya vuthu ra masocha ya gidi. Kutani Davhida a huma a ya rhangela masocha lawa ya gidi enyimpini,

¹⁴ a humelela eka hinkwaswo leswi a swi endlaka, hikuva HOSI Xikwembu a xi ri na yena.

¹⁵ Loko Sawulo a vona leswaku Davhida wa humelela swinene, a ya a n'wi chava ngopfu.

¹⁶ Kambe Davhida a a tsakeriwa ngopfu hi vanhu hinkwavo va tiko ra Israele ni ra Yuda, hikuva a a va rhangela etinyimpini.

Davhida a teka N'wa-Sawulo

¹⁷ Siku rin'wana, Sawulo a ku ka Davhida: “Nhwana wa mina lonkulu, Meraba, hi loyi, ndzi nga ku nyika yena a va nsati wa wena; kambe u fanele ku rhanga hi ku tikomba leswaku u nhenha, hi ku lwa tinyimpi ta HOSI Xikwembu.” Embilwini Sawulo a a ku: “A ndzi lavi ku n'wi dlaya hi voko ra mina, kambe a a dlawe hi Vafilista.”

¹⁸ Davhida a hlamula Sawulo a ku: “Ndzo va mani mina, naswona muti wa tatana ni rixaka ra ka hina, i vamani etikweni ra Israele, lero ndzi kala ndzi pfumeleriwa ku va mukon'wana wa hosi, xana?”

¹⁹ Kambe nkarhi lowu Davhida a a fanele ku kuma Meraba, Meraba a a nyikiwile Adriele wa le Mehola ku va nsati wa yena.

²⁰ Hambiswiritano, Davhida a rhandziwa hi Mikala, N'wa-Sawulo. Van'wana va ya vikela Sawulo, kutani mhaka leyi yi n'wi tsakisa swinene.

²¹ Kutani embilwini ya yena, Sawulo a a ku: “Ndzi fanele ku nyika Davhida n'wana wa mina Mikala, ndzi rhiya ntlhamu hi yena, leswaku Vafilista va ta dlaya Davhida.” Leri a ri ri ra vumbirhi Sawulo a ringeta ku hundzula Davhida a va mukon'wana wa yena.

²² Sawulo a lerisa malandza ya yena a ku: “Fambani mi ya byela Davhida exihundleni, mi ku: ‘Wa swi vona leswaku hosi ya ku tsakela, na hina malandza ya yona ha ku rhandza swinene; kutani u nga kanakani, teka n'wana loyi wa hosi.’ ”

²³ Malandza ya Sawulo ma ya vikela Davhida emhaka leyi, kutani yena a hlamula a ku: “Xana mi ehleketa leswaku i mhaka yitsongo ku teka n'wana wa hosi xana, ngopfu leswi mina ndzi nga xisiwana tlhelo munhu ntsena xana?”

²⁴ Kutani malandza ya Sawulo ma tlhela ma ya n'wi vikela leswi Davhida a hlamuleke swona.

²⁵ Sawulo a engeta a va lerisa a ku: “Mi ta byela Davhida leswaku, loko ku ri ku lovola n'wana wa mina hosi Sawulo, a ndzi lavi nchumu, ndzo lava ntsena dzana ra minsuvu ya Vafilista; sweswo ú ta va a ndzi rihiseterile eka valala va mina.” Makungu ya Sawulo a ma ri leswaku Davhida a ta ya dlawa hi Vafilista.

²⁶ Malandza ma ya vikela Davhida mhaka leyi vuleke hi Sawulo, kutani Davhida a swi tsakela ku va mukon'wana wa hosi. Loko siku ro hlomisa ri nga si fika,

²⁷ Davhida a huma ni vavanuna va yena, va ya dlaya Vafilista vo ringana 200, a vuya ni minsuvu ya vona, a yi yisa hinkwayo eka hosi Sawulo, a endlela leswaku a ta va mukon'wana wa yena. Kavaloko Sawulo a hlomisela Davhida Mikala n'wana wa yena.

²⁸ Kambe Sawulo a swi vona ni ku swi tiva leswaku HOSI Xikwembu xi yima na Davhida, ni leswaku Mikala n'wana wa yena ú rhandza Davhida ngopfu.

²⁹ Kutani a ya a chava Davhida ku tlurisa mpimo. Leswi swi kurisa rivengo ra yena eka Davhida ku ya ni ku ya.

³⁰ Tindhuna ta Vafilista a ti tala ku huma ti hlasela, kambe minkarhi hinkwayo loko ti ta, Davhida a a humelela eku lweni ku tlula malandza hinkwawo ya Sawulo; hikokwalaho, vito ra yena a ri duma ngopfu.