1 SAMIELE 14 - BIBELE Mahungu Lamanene

Ta Yonatani loko a hlula Vafilista

¹ Siku rin'wana, Yonatani n'wana Sawulo a byela jaha leri a ri n'wi rhwalela matlhari ni switlhangu, a ku: “Tana hi tsemakanyela eka ntlawa wa Vafilista laha wu goveke kona.” Kambe Yonatani a nga byelanga tata wa yena makungu lawa.

² Loko a ri Sawulo, a a govile ehandlenyana ka muti wa Gibeya, ehansi ka murhi wa magrenada, laha ku vuriwaka Migirono; a a ri ni vavanuna va kwalomu ka 600.

³ (Muprista loyi a ambaleke nceka lowu vuriwaka “efodi”, a a ri Ahiya n'wana Ahituba; makwa wa tata wakwe a a ri Ikabodo n'wana Finiyasi n'wana Heli, muprista wa HOSI Xikwembu eXilo.) A ku vanga na un'we la tiveke leswaku Yonatani ú fambile.

⁴ Ematlhelo ka xiphandze lexi Yonatani a a fanele ku tsemakanya ka xona, loko a ringeta ku ya lomu Vafilista a va govile kona, a ku yimile maribye mambirhi lamakulu yo leha; ribye rin'wana a ri vuriwa Bosesi, lerin'wana Sene.

⁵ Ribye rin'wana a ri yimile en'walungwini hi tlhelo ra Mikamaxa, lerin'wana edzongeni hi tlhelo ra Geba.

⁶ Yonatani a byela jaha leri a ri n'wi rhwalela matlhari, a ku: “A hi tsemakanye hi ya laha makhuna lawaya ma goveke kona; kumbexana HOSI Xikwembu xi ta hi pfuna, hikuva ku hava lexi nga sivelaka HOSI Xikwembu ku hi lamulela, hambi hi tele kumbe hi nga talanga.”

⁷ Jaha ri hlamula ri ku: “Endla hinkwaswo leswi nga emiehleketweni ya wena. Yana emahlweni, mina ndzi ta va na wena, ndzi seketela miehleketo ya wena.”

⁸ Kutani Yonatani a ku ka jaha: “Hiswona, a hi tsemakanye hi ya eka vona, leswaku va hi vona.

⁹ Loko va ku ka hina: ‘Yimani, hi kondza hi ta kwaleyo!’ hi ta yima laha hi nga ta va hi ri kona; a hi nga tlhandluki hi ya eka vona.

¹⁰ Kambe loko va ku ka hina: ‘Tlhandlukelani haleno ka hina!’ hi ta tlhandluka, hikuva leswi swi ta komba leswaku HOSI Xikwembu xi va nyiketile emavokweni ya hina.”

¹¹ Kutani ha vumbirhi bya vona va tikomba eka vuthu ra Vafilista; vona va va hlekula va ku: “Langutani Vaheveru, hi lavaya va humaka emabakweni lomu a va tumberile kona.”

¹² Kutani vuthu ra Vafilista ri huwelela Yonatani ni loyi wa jaha, ri ku: “Tlhandlukelani haleno ka hina, hi ta mi komba lexi mi xi lavaka!” Kutani Yonatani a ku ka lowa jaha: “Tlhandluka u ndzi landza, hikuva HOSI Xikwembu xi va nyiketile emavokweni ya Vaisraele.”

¹³ Kwalaho Yonatani a khandziya hi milenge ni mavoko hi le xiphandzeni, lowa jaha a n'wi landza hi le ndzhaku. Vafilista va wa emahlweni ka Yonatani, lowa jaha a sala a va dlaya.

¹⁴ Eku hlaseleni loku ko sungula, Yonatani ni jaha leri a ri n'wi rhwalela matlhari ni switlhangu, va dlayile vavanuna vo lava ku ringana 20, eka ndhawunyana yo ringana hafu ya ndzima.

¹⁵ Vafilista lava a va ri emixaxeni ni le rivaleni, ni lavan'wana hinkwavo, va khomiwa hi ku chava lokukulu; hambi va ri va mintlawa ya varindzi ni ya vahlaseri, va rhurhumela hi ku chava. Misava na yona a yi tsekatseka, kutani ku chava ka vona ku ya ku engeteleka.

¹⁶ Vavanuna va Sawulo lava a va rindza eGibeya wa Benjamini, va vona nkitsikitsi wa Vafilista lava tsutsumaka va ya hala ni hala.

¹⁷ Kutani Sawulo a ku ka vavanuna va yena: “Hlayani vanhu, hi vona leswaku ku nyengile mani.” Va endlisa sweswo, kutani va kuma leswaku Yonatani ni lowa jaha a va kona.

¹⁸ Kutani Sawulo a ku ka Ahiya: “Tisa Areka ya Xikwembu!” (Enkarhini wolowo, Vaisraele a va famba ni Areka ya Xikwembu.)

¹⁹ Loko Sawulo a ha vulavula ni muprista, nkitsikitsi wu ya wu kula emixaxeni ya Vafilista. Hiloko Sawulo a byela muprista a ku: “Tshika sweswo!”

²⁰ Kutani Sawulo ni vavanuna va yena va huwelelana, va tsutsumela eku lweni. Vafilista a va ri karhi va tlhavana hi xivona, kutani mpfilumpfilu wa kona a wu kurile ngopfu.

²¹ Vaheveru lava a va tinyiketile khale eka Vafilista ni ku ya na vona emixaxeni ya vona, va hundzukela Vafilista, va tlhela va yima ni Vaisraele lava a va ri na Sawulo na Yonatani.

²² Naswona, Vaheveru hinkwavo lava a va tumberile emagangeni ya Efrayimi, loko va twa leswaku Vafilista va tsutsuma, va pfuna ku hlongorisa, va ri karhi va va hlasela.

²³ Ko va loko HOSI Xikwembu xi lamulerile tiko ra Israele siku rero. Nyimpi yi lwiwa ku kondza yi ya hundza ni le Beta-Avene.

²⁴ Vavanuna va Israele a va karhele ngopfu siku rero, hikuva Sawulo a a arisile masocha ku dya, a hlambanya, a ku: “Khombo eka un'wana ni un'wana la nga ta dya xanchumu ri nga si pela, na mina ndzi nga si tirihisela eka valala va mina.” Hikokwalaho a ku vanga na un'we wa vona la khumbeke swakudya.

²⁵ Kasi tiko ra kona hinkwaro a ri tele hi swihlenge swa vulombe, lero byi kala byi khulukela ni le hansi.

²⁶ Loko masocha ma nghena exihlahleni, ma kuma vulombe lebyi tshonaka, a ma chava ku byi yisa enon'weni, hikuva a ma arisiwile hi ku hlambanya ka Sawulo.

²⁷ Kambe Yonatani a a nga n'wi twanga tata wa yena, loko a arisa masocha hi ku hlambanya; kutani a teka nhonga ya yena, a tlhava xihlenge ha yona yi huma ni vulombe, a yisa enon'weni, kutani matimba ya yena ma hatla ma vuya.

²⁸ Un'wana wa vavanuna a ku ka Yonatani: “Tata wa wena ú hi arisile hi ku hlambanya, a ku: ‘Khombo eka munhu loyi a dyaka swakudya namuntlha!’ Kambe vavanuna va karhele ngopfu.”

²⁹ Yonatani a hlamula a ku: “Tatana ú tikisa vutomi bya vaaki va tiko. Languta, matimba ya mina ma vuyile, hileswi ndzi nantswekenyana vulombenyana lebyi!

³⁰ Loko onge namuntlha masocha ma pfumeleriwile ku dya swin'wana swa leswi ma swi phangheke eka valala va wona, a ma ta va ma dlayile Vafilista lavo tala.”

³¹ Hi siku rero, Vaisraele va hlaserile Vafilista ku suka eMikamaxa ku ya fika le Ayaloni. Kambe vavanuna a va karhatiwile ngopfu hi ndlala.

³² Hikokwalaho, leswi phanghiweke va swi wela ehenhla, va khoma tinyimpfu, ni tihomu, ni marhole, va swi tlhavela kwalaho, va dyela nyama ya swona kwala ngati yi halakeleke kona.

³³ Van'wana va ya tivisa Sawulo, va ku: “Languta, vavanuna va le ku dyoheleni ka HOSI Xikwembu, hi ku dyela nyama laha ngati yi halakeleke kona.” Sawulo a va yela a fika a ku: “Vadyohi ndzin'wina! Hatlisani mi khunguluxa ribye lerikulu, mi ri tisa haleno ka mina.”

³⁴ A lerisa nakambe a ku: “Hangalakani na tiko, mi byela vanhu mi ku: ‘Un'wana ni un'wana a a te ni homu kumbe nyimpfu haleno ka mina, kutani a ta yi tlhavela kwala ribyeni, a yi dyela kokwala.’ Hi mukhuva wolowo, a va nga dyoheli HOSI Xikwembu hi ku dyela nyama laha ngati yi halakeleke kona.” Kutani un'wana ni un'wana a ta vusiku byebyo ni xifuwo xa yena, a xi tlhavela eribyeni.

³⁵ Kutani Sawulo a akela HOSI Xikwembu alitari; yi vile yona alitari yo sungula leyi a yi akeleke HOSI Xikwembu.

³⁶ Sawulo a ku ka vavanuna: “A hi rheleleni hi ya hlongorisa Vafilista vusiku byebyi, hi phangha swa vona ri ko ri xa, hi va heta hinkwavo!” Vavanuna va hlamula va ku: “Hiswona, endla hinkwaswo leswi u vonaka leswaku swi lulamile.” Kambe muprista Ahiya a ku: “Rhangani hi ku ta haleno, hi ta vutisa mhaka eka Xikwembu.”

³⁷ Kavaloko Sawulo a vutisa mhaka eka Xikwembu, a ku: “Xana ndzi nga rhelela ndzi ya hlongorisa Vafilista xana? Xana u ta va nyiketa emavokweni ya Vaisraele xana?” Kambe siku rero Xikwembu a xi n'wi hlamulanga nchumu.

³⁸ Kutani Sawulo a vitana vafambisi hinkwavo, a ku ka vona: “Tanani haleno, hi ta kambisisa leswaku i xidyoho muni lexi endliweke namuntlha,

³⁹ hikuva ndza tiyisa emahlweni ka HOSI Xikwembu lexi hanyaka muponisi wa Israele, ndzi ri: Hambiloko nandzu wu nga va na n'wana wa mina Yonatani, ú ta fa hakunene!” Kambe na un'we wa vona a nga hlamulanga.

⁴⁰ Kutani Sawulo a ku ka Vaisraele hinkwavo: “N'wina yimani hi tlhelo rero, mina ni n'wana wa mina Yonatani hi ta yima hi tlhelo leri.” Tiko ri hlamula ri ku: “Hiswona, endla leswi u vonaka leswaku swi lulamile.”

⁴¹ Kutani Sawulo a khongela HOSI Xikwembu, a ku: “We Xikwembu xa Israele, [hikwalaho ka yini u nga ndzi hlamulanga namuntlha, mina nandza wa wena. Loko nandzu wa kona wu ri na mina kumbe n'wana wa mina Yonatani, a ku hume ‘Urimi’, we HOSI Xikwembu xa Israele. Kambe loko nandzu wu ri ni tiko ra wena ra Israele,] a ku hume ‘Thumimi’.” Kutani vuhlolotwana byi komba Yonatani na Sawulo, lavan'wana va pona.

⁴² Kutani Sawulo a lerisa a ku: “Hlawulani hi vuhlolotwana exikarhi ka mina ni n'wana wa mina Yonatani.” Kutani byi komba Yonatani.

⁴³ Kavaloko Sawulo a ku ka Yonatani: “Ndzi hlamusele leswi u swi endleke!” Yonatani a hlamusela a ku: “Loko ku ri ku dya, ndzi dyile vulombenyana lebyi ndzi byi tlhaveke hi nhonga ya mina. Hi mina loyi, ndzi dlayeni!”

⁴⁴ Sawulo a hlamula a ku: “Ndza tiyisa hi ku hlambanya emahlweni ka Xikwembu ndzi ri: U ta fa hakunene, wena Yonatani!”

⁴⁵ Kambe vanhu va ku ka Sawulo: “Xana Yonatani ú fanele ku fa hakunene ke, yena loyi a ha ku ponisaka Israele hi ndlela yo hlamarisa, xana? Sweswo swi nga ka swi nga endleki! Ha tiyisa emahlweni ka HOSI Xikwembu lexi hanyaka, hi ri: A nga ka a nga lahlekeriwi hi nsisi ni wun'we wa yena, hikuva eku lweni ka yena namuntlha, Xikwembu a xi ri na yena.” Kavaloko va lamulerile Yonatani, a pona ku dlawa.

⁴⁶ Sawulo a tshika ku hlongorisa Vafilista, a tlhelela emagangeni, kutani Vafilista na vona va tlhelela ematikweni ya vona.

⁴⁷ Loko Sawulo a vekiwile ku va hosi ya Israele, ú lwile ni valala va yena hi matlhelo hinkwawo, a lwa ni Vamowabu, ni Vaamoni, ni Vaedomu, ni tihosi ta le Soba, ni Vafilista; hinkwako lomu a nga ya lwa kona, a a ri mulamuleri.

⁴⁸ Ú kombisile vunhenha bya yena ngopfu hi ku hlula Vaamaleke, a lamulela Vaisraele emavokweni ya vaxanisi va vona.

⁴⁹ Vana va Sawulo va xinuna a va ri va Yonatani, na Ixivhi, na Maliki-Xuwaka; kasi va xisati vona a va ri vambirhi ntsena: Lonkulu a a ri Meraba, lontsongo a a ri Mikala.

⁵⁰ Vito ra nsati wa Sawulo a va ku i Ahinowama N'wa-Ahimaasi. Ndhunankulu ya mavuthu ya yena a a ri Abinere n'wana Nere, makwa tata wa Sawulo.

⁵¹ Kixi tata wa Sawulo na Nere tata wa Abinere a va ri vana va Abiele.

⁵² Hi nkarhi wa ku fuma ka Sawulo, nyimpi ya yena ni Vafilista a yi nga heli. Kutani loko Sawulo a vona munhu wo tiya kumbe nhenha, a a n'wi nghenisa eka mavuthu ya yena.