1 Petro 3 - BIBELE Mahungu Lamanene

Ta vavasati ni vanuna va vona

¹ Swi tano na n'wina, vavasati lava tekiweke: Titsongahateni eka vanuna va n'wina, leswaku van'wana va nga kokiwa hi mahanyelo ya n'wina vasati va vona, hambiloko va nga yingisi Rito. A va nga byeriwi hi munhu,

² hikuva va ta vona xichavo xa n'wina ni ku tenga ka mikhuva ya n'wina.

³ Xa n'wina, ku nga vi ku tibombisa hi swa le handle, hi misisi leyi horhiweke, ni ku tisasekisa hi swilo swa nsuku, ni ku ambala tinguvu leto saseka.

⁴ Ku tibombisa ka n'wina, a ku ve ka vumunhu bya n'wina lebyi nge xihundleni xa mbilu; a ku ve ka moya lowu nga onhakiki wa ku olova ni ku rhula, lowu nga ni nkoka lowukulu emahlweni ka Xikwembu.

⁵ Khale, vavasati lavo hlawuleka lava a va tshembile Xikwembu, a va tolovele ku tibombisa hi mukhuva lowu, kutani a va titsongahata eka vanuna va vona.

⁶ Swi ve tano na Sara, loyi a yingiseke Abrahama, a n'wi vula “Hosi yanga”. Kutani sweswi, mi vana va yena loko mi endla leswo lulama, mi nga chavisiwi hi nchumu.

⁷ Hi mukhuva wolowo, na n'wina vavanuna, hanyisanani ni vasati va n'wina hi ku twelelana, hikuva va fana ni swibya leswi nga tiyangiki, naswona mi va xixima, hikuva va ta dya ndzhaka ya tintswalo ni vutomi swin'we na n'wina. Va xiximeni leswaku mikhongelo ya n'wina yi ta kala yi nga siveriwi.

Ku xanisiwa hikwalaho ka leswo lulama

⁸ Eku heteleleni: N'wina hinkwenu mi fanele ku va ni moya wun'we, mi twelana vusiwana, mi va ni rirhandzu eka vamakwenu, mi va ni mbilu ya vumunhu ni miehleketo ya ku titsongahata.

⁹ Mi nga tlheriseli ku biha hi ku biha, kumbe ndzhukano hi ndzhukano, kambe ematshan'wini ya sweswo, katekisani, hikuva hi leswi mi nga vitaneriwa ku endla swona, leswaku mi ta kuma nkateko na n'wina.

¹⁰ Hikuva, hilaha Matsalwa ma vulaka hakona, “Loyi a navelaka ku hanya vutomi lebyi tsakisaka, ni ku vona masiku lamanene, a a fume ririmi ra yena ri chava swo biha, ni nomo wa yena wu nga vulavuli mavunwa;

¹¹ a a tshike leswo homboloka a endla swo lulama; a a lave ku rhula a tiyisela endleleni ya kona.

¹² Hikuva mahlo ya Hosi ma tsakela lavo lulama, ni tindleve ta yona ti pfulekele swikhongelo swa vona, kambe Hosi yi fularhela lava endlaka swo biha.”

¹³ Sweswi ke, xana i mani loyi a nga mi endlaka leswo biha, loko n'wina mi hisekela ku endla leswi lulameke xana?

¹⁴ Kambe niloko mi twisiwa ku vava hikwalaho ka leswo lulama, mi katekile; mi nga chavi vanhu, naswona mi nga karhateki.

¹⁵ Etimbilwini ta n'wina, kombisani xichavo eka Kriste, leswi a nga Hosi; masiku hinkwawo tilunghiseleni ku tihlamulela eka un'wana ni un'wana loyi a mi vutisisaka ehenhla ka ku tshemba loku mi nga na kona,

¹⁶ kambe mi swi endla hi moya wa ku olova ni wa xichavo. Naswona, mi tshama mi ri ni ripfalo leri tengeke, leswaku loko mi hemberiwa, lava sandzaka mahanyelo ya n'wina layo lulama ya Xikriste, va ta khomiwa hi tingana.

¹⁷ Hikuva swa antswa ku twa ku vaviseka hi mhaka ya ku endla leswo lulama, loko sweswo swi ri leswi Xikwembu xi swi rhandzaka, ku ri na ku twa ku vaviseka hi mhaka ya ku endla leswi nga lulamangiki.

¹⁸ Kriste na yena ú fele swidyoho kan'we, a fela n'wina; yena munhu lowo lulama ú fele lava nga lulamangiki, leswaku a ta mi fikisa eka Xikwembu; ú dlayiwile hi tlhelo ra miri, kambe ú endliwile la hanyaka hi tlhelo ra moya.

¹⁹ Hi moya, ú yile a ya twarisa rito eka mimoya leyi nge khotsweni,

²⁰ leyi eku sunguleni yi nga yingisangiki Xikwembu loko xi lehisa mbilu xi yima xi nga endli nchumu, enkarhini lowu Nowa a nga lunghisa ngalava ha wona. Engalaveni leyi ku nghenile va nga ri vangani, hileswaku vanhu va 8, lava ponisiweke ha yona ematini.

²¹ Nkhuvulo wu yelana ni mhaka leyi; sweswi wa mi ponisa, ku nga ri hi ku susa thyaka emirini, kambe hi ku endla leswaku mi kombela ripfalo leri tengeke eka Xikwembu. Nkhuvulo wa mi ponisa hi mhaka ya ku pfuka ka Yesu Kriste eku feni,

²² yena loyi a yeke etilweni, kutani sweswi ú le vokweni ra xinene ra Xikwembu, tintsumi ni vafumi ni leswa matimba swi ri ehansi ka yena.