Zakariya 5 - Xitsonga (Bibele)

Swivono swa papila ni efa .

¹ Ndzi engeta ndzi tlakusa mahlo, ndzi languta, loko kan'we ku humelela papila leri nga phurumulwa, leri hahaka.

² Kutani ntsumi yi ku eka mina: “U vona yini?” Ndzi ku: “Ndzi vona papila leri nga phurumulwa, leri hahaka, leri ku leha ka rona ku nga ka swisungunhu swa makumu mambirhi, ni ku anama ka rona swisungunhu swa khume.”

³ Yi ku eka mina: “Rona i ndzhukano lowutaka ehenhla ka misava, hikuva un'wana ni un'wana la yivaka u ta lovisiwa hi timhaka ta rona leti tsariweke tlhelo rin'wana ra rona, un'wana ni un'wana la hlambanyaka u ta lovisiwa hi timhaka ta rona leti nga tlhelo rin'wana.

⁴ Ndzi wu humesile, ku vula Yehovha wa tinyimpi, wu ta nghena endlwini ya khamba ni le ndlwini ya la hlambanyaka hi vito ra mina hi mavunwa; wu ta tshama exikarhi ka yindlu ya yena, wu ta yi herisa, ni timhandze ta yona, ni maribye ya yona.”

⁵ Ntsumi leyi ngi yi vulavula na mina, yi engeta yi humelela, yi ku eka mina: “Tlakusa mahlo ya wena, u vona lexi humelelaka lahaya leswaku swini.”

⁶ Ndzi ku: “Xini?” Kutani yi ku: “I efa leyi humelelaka.” Yi engeta, yi ku: “Hi xona xifaniso xa vona hinkwako emisaveni.”

⁷ Kutani vonani, ku yimisiwa xifunengeto xa ntsopfu, kutani ku humelela wansati la tshameke endzeni ka efa.

⁸ Kutani yi ku: “Loyi i vudyohi!” Kutani yi n'wi hoxa endzeni ka efa, yi hoxa ni xifunengeto lexo tika xa ntsopfu ehenhla ka nomu wa yona.

⁹ Kutani ndzi tlakusa mahlo ya mina ndzi languta, kutani vonani, ku humelela vavasati vambirhi, etimpapeni ta vona a ku ri ni moya, tona timpapa ti kotisa timpapa ta ntsavila; va tlakusela efa exikarhi ka misava ni tilo.

¹⁰ Ndzi ku eka ntsumi leyi vulavulaka na mina: “Volavo va yisa efa kwihi?”

¹¹ Yi ku eka mina: “Va yi yisa etikweni ra Xinara ku yi akela yindlu kona, yi ta vekiwa kona; yona yindlu yi ta tiyisiwa ehenhla ka vutshamo bya yona.”