Zakariya 2 - Xitsonga (Bibele)

Xivono xa munhu wa mpimo.

¹ Ndzi engeta ndzi tlakusa mahlo ya mina; ndzi vona wanuna la khomeke evokweni ra yena ngoti ya ku pima.

² Kutani ndzi ku: “U ya kwihi?” A ku eka mina: “Ndzi ya pima eYerusalema, ndzi ta vona ku anama ka yena ni ku leha ka yena leswaku kungani.”

³ Kutani ntsumi leyi angulanaka na mina yi huma, kutani ntsumi yin'wana yi ta ku ta hlangana na yona,

⁴ yi ku eka yona: “Tsutsuma, u byela ndzisanyana loyi, u ku: ‘Yerusalema u ta akiwa kukota muti lowu nga riki na rirhangu, hikwalaho ka vunyingi bya vanhu ni swifuwo leswi nga ta va eka wona.

⁵ Loko ndzi ri mina, ku vula Yehovha, ndzi ta va rirhangu ra ndzilo lowo wu rhendzelaka exikarhi, ndzi ta va ku kwetsima exikarhi ka wona.’ ”

⁶ Yo! Yo! Balekani, n'wina mi nga etikweni ra n'walungu, ku vula Yehovha, hikuva ndzi mi hangalasile timhehweni ta mune ta tilo, ku vula Yehovha.

⁷ Yo! Siyoni u pona, wena la akeke eka n'wana Babilona!

⁸ Hikuva Yehovha wa tinyimpi u te: Endzhaku ka ku kwetsima u ndzi rhumile eka matiko lama mi hlaseleke; hikuva loyi a mi khumbaka, u khumba ndzololo ya tihlo ra yena:

⁹ “Hikuva ndzi ta ndzuluta voko ra mina ehenhla ka wona, ma ta hluriwa hi malandza ya wona, kutani mi ta tiva leswaku Yehovha wa tinyimpi u ndzi rhumile.

¹⁰ “Yimbelela hi ku tsaka, u tiphina, wena mbhuri ya Siyoni, hikuva ndzi ta ta, ndzi tshama exikarhi ka wena, ku vula Yehovha.

¹¹ Matiko ya ku tala ma ta namarhela Yehovha hi siku rero kutani va ta va tiko ra mina; ndzi ta tshama exikarhi ka wena, u ta tiva leswaku Yehovha wa tinyimpi u ndzi rhumile eka wena.

¹² Yehovha u ta fuma Yuda, yi va ndzhaka ya yena etikweni leri hlawuriweke u ta tihlawulela Yerusalema, kambe!”

¹³ Nyama hinkwayo, miyelani emahlweni ka Yehovha! Hikuva u pfukile evutshan'weni bya yena lebyi nga hlawuleka.