Yoxuwa 18 - Xitsonga (Bibele)

Ku averiwa ka nyimba ya Benjamini.

¹ Nhlengeletano hinkwayo ya vana va Israele yi hlangana eXilo; kutani va dzima kona tabernakela ya nhlengeletano, hikuva tiko a ri fumiwa hi vona.

² Kambe a ku sala tinyimba ta 7 exikarhi ka vana va Israele leti nga amukelangiki ku averiwa ka vona.

³ Kavaloko Yoxuwa a ku eka vana va Israele: “Mi ta hlwela ku yisa kwihi ku ya teka tiko leri Yehovha, Xikwembu xa vatata wa n'wina, a mi nyikeke rona xana?

⁴ Hlawulani vavanuna vanharhu hi nyimba yin'wana ni yin'wana, ndzi ta va rhuma va tifambela etikweni, va ta ri tsala hi ku averiwa ka vona; kutani va ta vuya eka mina.

⁵ Mi ta ri avanyisa hi ku averiwa kantlhanu na kambirhi. Yuda u ta tshama etikweni ra yena edzongeni, ni yindlu ya Yosefa yi ta tshama etikweni ra yena en'walungwini.

⁶ Mi ta tsala tiko, mi pima ku averiwa kantlhanu na kambirhi, kutani mi ta ndzi tisela mapapila ya rona halenu, kavaloko ndzi ta mi hoxela vuhlolotwana exivandleni lexi, emahlweni ka Yehovha, Xikwembu xa hina.

⁷ Hikuva ku nga ka ku nga vi na ndzhaka ya Valevhi exikarhi ka n'wina, hikuva vuprista bya Yehovha hi yona ndzhaka ya vona. Loko a ri Gadi na Rhuveni, ni hafu ya nyimba ya Manase va kumile ndzhaka ya vona ehase ka Yordani, evuxeni, yi ri ndzhaka leyi Muxe, nandza wa Yehovha, a va nyikeke yona.”

⁸ Kavaloko vanhu lava va suka, va famba. Kutani Yoxuwa a lerisa lava sukeke ku ya tsala tiko, a ku: “Fambani, mi tifambela etikweni, mi tsala rona, kutani mi ta vuya eka mina. Kutani ndzi ta mi encenyetela hi vuhlolotwana exivandleni lexi, emahlweni ka Yehovha, eXilo.”

⁹ Kutani vanhu lava va suka va tifambela etikweni, va tsala rona ebukwini hi miti, va pima ku averiwa ka 7; kutani va vuyela ka Yoxuwa, emixaxeni ya Xilo.

¹⁰ Kutani Yoxuwa a va encenyetela hi vuhlolotwana eXilo, emahlweni ka Yehovha, kutani Yoxuwa a avanyisela vana va Israele tiko, a nyika un'wana ni un'wana ku averiwa ka yena.

¹¹ Ku huma ku averiwa ka nyimba ya vana va Benjamini, hi tindlu ta vona; kutani mindzilekana ya ku averiwa ka vona a yi ri exikarhi ka vana va Yuda ni vana va Yosefa.

¹² Ndzilakana wa vona en'walungwini, wu suka eYordani, wu khandziya entsungeni wa Yeriko, en'walungwini; kutani wu khandziya entshaveni, evupeladyambu, kutani wu ya fika emananga ya Beta-Avene.

¹³ Wu suka kona, kutani wu hundza eLuzi, edzongeni, eBetele; kutani wu rhelela eAtaroti-Adara, entshaveni leyi nga edzongeni ka Bet-Horoni wa le hansi.

¹⁴ Kutani wu rhendzeka, wu kongoma evupeladyambu, edzongeni ka ntshava leyi langutaneke na Bet-Horoni edzongeni, kutani wu ya fika eKiriyata-Baala, hileswaku Kiriyata-Yeyarimi, wu nga muti wa vana va Yuda; hi rona tlhelo ra vupeladyambu.

¹⁵ Le dzongeni, wu suka emakun'weni ya Kiriyata-Yeyarimi, evupeladyambu, kutani wu kongoma xihlovo xa mati ya Nefitowaka;

¹⁶ kutani wu rhelela emakun'weni ya ntshava leyi langutaneke ni nkova wa Bene-Hinomu lowu nga enkoveni wa Varefayimi, en'walungwini, kutani wu rhelela hi nkova wa Bene-Hinomu, wu kongoma etlhelo ra le dzongeni ra ntshava ya Vayebusi ku fika eEni-Rogele;

¹⁷ kutani wu kongoma en'walungwini wu ya eEni-Xemexi wu huma etlhelweni ra Geliloto lowu langutaneke ni ndlela yo khandziya ya Adumimi, kutani wu rhelela eribyeni ra Bohani, n'wana Rhuveni.

¹⁸ Kutani wu hundza eku rheleleni tlhelo ra n'walungu leri langutaneke ni rivala, kutani wu rhelela erivaleni.

¹⁹ Wu famba eku rheleleni, hi le n'walungwini ka Beta-Hogila, kutani wu ya hela emakun'weni ya le n'walungwini ya Lwandle ro Dunga, emakun'wini ya Yordani. Hi wona ndzilakana wa le dzongeni.

²⁰ Yena Yordani a endla ndzilakana hitlhelo ra vuxa Hi yona ndzhaka ya vana va Benjamini, hi mindzilekana ya yona, ematlhelweni hinkwawo, hi tindlu ta vona.

²¹ Miti ya nyimba ya vana va Benjamini, hi tindlu ta vona: hi leyi: Yeriko, Beta-Hogila, Emeke-Kesisi;

²² Beta-Araba, Semarayimi, Betele;

²³ Avhimi, Para, Ofira;

²⁴ Kefara-Amonayi, Ofini, Geba; miti ya 12 ni swimitana swa yona.

²⁵ Gibiyoni, Rhama, Beroto;

²⁶ Mispe, Kefira, Moza;

²⁷ Rekemu, Yiripele, Tarala;

²⁸ Sela, Hayelefe, Yebusi (lowu nge Yerusalema) Gibeya, na Kiriyata: miti ya 14 ni swimitana swa yona. Hi yona ndzhaka ya vana va Benjamini, hi tindlu ta vona.