Yoxuwa 17 - Xitsonga (Bibele)

Tiko ra hafu ya nyimba ya Manase.

¹ Manase a kuma ku averiwa ka yena hi vuhlolotwana, hikuva i mativula ya Yosefa. Loko a ri Makiri, mativula ya Manase, tata wa Giliyadi a nyikiwa Giliyadi na Baxani hikuva a a ri nhenha.

² Va hoxa vuhlolotwana ku nyika vana lava seleke va Manase ndzhaka, hi tindlu ta vona; va ri vana va Abiezere, ni vana va Heleke, ni vana va Asiriele, ni vana va Xikeme, ni vana va Hefere, ni vana va Xemida: hi vona vana va xinuna va Manase, n'wana Yosefa, hi tindlu ta vona.

³ Loko a ri Selofihada n'wana Hefere, n'wana Giliyadi, n'wana Makiri, n'wana Manase, a nga vanga na vana va xinuna, kambe a a ri ni vanhwanyana; hi wona mavito ya vona: Mahela, Nowa, Hogila, Milika Tirisa.

⁴ Va ta humelela emahlweni ka Eliyazara, muprista, ni le mahlweni ka Yoxuwa, n'wana Nuni, ni le mahlweni ka tihosi, va ku: “Yehovha u lerisile Muxe ku hi nyika ndzhaka exikarhi ka vamakwerhu.” Kavaloko va nyikiwa ndzhaka hi ku lerisa ka Yehovha exikarhi ka vamakwavo va tata wa vona.

⁵ Manase a averiwa ku avanyisa ka khume, ehandle ka tiko ra Giliyadi ni ra Baxani, leri nga hase ka Yordani;

⁶ hikuva vana va xisati va Manase va nyikiwa ndzhaka exikarhi ka vana va yena va xinuna kutani tiko ra Giliyadi ri va ra vana va xinuna lava seleke va Manase.

⁷ Ndzilakana wa Manase wu suka eAsere, wu ya eMikimeta lowu langutaneke na Xikeme, kutani ndzilakana wu ya edzongeni eka vaaki va Eni-Tapuwaka.

⁸ Tiko ra Tapuwaka i ra Manase; kambe Tapuwaka lowu nga endzilakaneni wa Manase, i wa vana va Efrayimi.

⁹ Ndzilakana wu rhelela exinambyaneni xa Kana, edzongeni ka xinambyana. Miti leyi i ya Efrayimi, exikarhi ka miti ya Manase. Ndzilakana wa Manase wu le n'walungwini ka xinambyana, wu ya fika elwandle.

¹⁰ Edzongeni, tiko i ra Efrayimi, kambe en'walungwini, i ra Manase ndzilakana wa rona i lwandle. Va fika eka Asere en'walungwini ni ka Isakara evuxeni.

¹¹ Manase a nyikiwa etikweni ra Isakara ni ra Asere: Beta-Xeyani ni miti ya wona, na Yibiliyamu ni miti ya wona, ni vaaki va Dori ni miti ya wona, ni vaaki va Eni-Dori ni miti ya wona, ni vaaki va Taanaka ni miti ya wona, ni vaaki va Megido ni miti ya wona; ma ri matikwana manharhu.

¹² Kambe vana va Manase va tsandzeka ku fuma miti leyi; kutani Vakanana va tiya ku aka etikweni lero.

¹³ Kutani, kuteloko vana va Israele va kumile matimba, va tirhisa Vakanana mitirho, kambe a va nga va tekelanga tiko ra vona kunene.

¹⁴ Vana va Yosefa va vulavula na Yoxuwa, va ku: “Xana u ndzi nyikele yini-ke ndzhaka ya ku averiwa kun'we ntsena, ni ku avanyisa kun'we, kasi ndzi tiko leri teleke, leri Yehovha a ri katekiseke ngopfungopfu ku fika sweswi.”

¹⁵ Yoxuwa a ku eka vona: “Leswi u nga tiko leri teleke, khandziya exihlahleni, u tixakatsela masimu etikweni ra Vaperesi, ni ra Varefayimi, leswi ntshava ya Efrayimi yi laleke eka wena.”

¹⁶ Vana va Yosefa va hlamula, va ku: “Ntshava leyi, a yi nga hi ringani, na swona tigolonyi ta tinsimbhi ti kona eka Vakanana hinkwavo lava akeke etikweni ra nkova, eka vanhu va Beta-Xeyani ni miti leyi nga ehansi ka vona, ni ka lava nga enkoveni wa Yizriele.”

¹⁷ Yoxuwa a byela va yindlu ya Yosefa, va ri va Efrayimi ni va Manase, a ku: “Mi tiko lerikulu, ni matimba ya n'wina ma ri lamakulu; mi nga ka mi nga vi na ku averiwa kun'we ntsena,

¹⁸ hikuva ntshava yi ta va ya n'wina, leswi xi nga xihlahla, mi ta xi xakatsa, kutani tindlela ta yona ti ta va ta n'wina; hikuva mi ta hlongola Vakanana, hambi va ri ni tigolonyi ta tinsimbhi, hambi va ri ni matimba.”