Yoxuwa 1 - Xitsonga (Bibele)

Ta ku vekiwa ka Yoxuwa ku va mufambisi wa tiko.

¹ Kuteloko Muxe, nandza wa Yehovha, a file, Yehovha a byela Yoxuwa, n'wana Nuni, nandza wa Muxe, a ku:

² “Muxe, nandza wa mina u file; pfuka, u ya pela Yordani loyi, wena, ni tiko hinkwaro leri, mi ta nghena etikweni leri ndzi ri nyikeke vana va Israele.

³ Ndzi mi nyikile ndhawu hinkwayo leyi nga ta kandziyiwa hi mikondzo ya n'wina, hilaha ndzi byeleke Muxe hakona,

⁴ ku sukela emananga na Lebanoni loyi, ku fika enambyeni lowukulu, enambyeni wa Yufrata, ri nga tiko hinkwaro ra Vahiti, ni ku fika eLwandle Lerikulu evupeladyambu, ri ta va tiko ra n'wina.

⁵ A ku na munhu la nga ta tiya ku yima emahlweni ka wena hi masiku hinkwawo ya vutomi bya wena; hilaha ndzi byeleke Muxe hakona, ndzi ta va na wena, ndzi nga ka ndzi nga ku tshiki, ndzi nga ka ndzi nga ku siyi.

⁶ Tiya mbilu, u tiya hikuva hi wena la nga ta fumisa tiko leri misava leyi ndzi hlambanyeleke vatata wa vona ku va nyika yona.

⁷ Tiya mbilu, u tiya swinene, u hiseka ku endla hi nawu hinkwawo lowu Muxe, nandza wa mina a ku leriseke wona; u nga tshuki u hambuka eka wona exineneni, hambi ku ri eximatsini, leswaku u ta kateka eswilweni hinkwaswo leswi u nga ta swi sungula.

⁸ Buku ya nawu lowu, yi nga tshuki yi va kule ni nomu wa wena, kambe u yi anakanya vusiku ni nhlekanhi, u hiseka ku endla hinkwaswo leswi tsariweke kona, hi kona u nga ta kateka etindleleni ta wena, u ta tsaka.

⁹ Xana a ndzi ku lerisanga ndzi ku: ‘Tiya mbilu, u tiya: u nga chavi, u nga tsemeki nhlana; hikuva Yehovha, Xikwembu xa wena, xi na wena hinkwako laha u nga ta ya kona.’ ”

¹⁰ Kutani Yoxuwa a lerisa tindhuna ta tiko, a ku:

¹¹ “Fambani exikarhi ka mixaxa, mi lerisa tiko, mi ku: ‘Longani, hikuva loko ku hundzile masiku manharhu, mi ta pela Yordani loyi, ku ya teka tiko leri Yehovha, Xikwembu xa n'wina, a mi nyikaka rona ku ri fuma.’ ”

¹² Yoxuwa a byela va Rhuveni ni va Gadi, ni va hafu ya nyimba ya Manase, a ku:

¹³ “Tsundzukani leswi Muxe, nandza wa Yehovha, a mi leriseke swona, loko a te: ‘Yehovha, Xikwembu xa n'wina, u mi nyikile ku wisa, u mi nyikile tiko leri,’

¹⁴ vasati va n'wina, ni swihlangi swa n'wina, ni swifuwo swa n'wina swi ta sala etikweni leri Muxe a mi nyikeke rona ehase ka Yordani; kambe n'wina mi ta famba mi hlomile emahlweni ka vamakwenu, mi ri hinkwenu vavanuna va matimba, ni tinhenha, mi ta va pfuna,

¹⁵ Yehovha a kondza a nyika vamakwenu ku wisa kukotisa n'wina; kutani na vona va ta nghena etikweni leri Yehovha, Xikwembu xa n'wina, a va nyikaka rona ku ri fuma; hi kona mi nga ta tlhelela etikweni leri nga ra n'wina, kutani mi ta ri fuma, ri ri tiko leri Muxe, nandza wa Yehovha, a mi nyikeke rona ehase ka Yordani, evuxeni.”

¹⁶ Va hlamula, va ku eka Yoxuwa: “Hi ta endla hinkwaswo leswi u hi leriseke swona, hi ta ya hinkwako laha u nga ta hi rhumela kona.

¹⁷ Kukotisa leswi hi yingiseke Muxe etimhakeni hinkwato, hi ta ku yingisa. Ntsena Yehovha, Xikwembu xa wena, a a ve na wena kukotisa leswi ingi a a ri na Muxe.

¹⁸ Un'wana ni un'wana la nga ta ala ku endla hi ku lerisa ka wena, loko a nga yingisi marito ya wena eswilweni hinkwaswo leswi u nga ta n'wi lerisa swona, u ta dlawa; ntsena, tiya mbilu, u tiya.”