Yonasi 4 - Xitsonga (Bibele)

Ku vilela ka Yonasi; a tshinyiwa hi Yehovha.

¹ Kambe Yonasi a twisiwa ku vava lokukulu hi mhaka leyi, a va a kariha.

² Kutani a khongela Yehovha, a ku: “Yehovha, xana a hi leswi ndzi swi vuleke loko ndza ha ri etikweni ra rikwerhu xana? Hilaha ndzi hatliseke ku balekela eTarxixi, hikuva a ndzi tiva leswaku u Xikwembu xa nsovo, xa tintswalo, lexi hlwelaka ku kariha, lexi nga ni musa ngopfu, lexi tshikaka ku ba.

³ Kutani sweswi, wee Yehovha, ndzi tekele vutomi bya mina hikuva eka mina ku hanya, ku tlula hi ku fa!”

⁴ Kutani Yehovha a ku: “Xana u endla swinene ku tsuva xana?”

⁵ Yonasi a huma emutini, a ya tshama etlhelo ra le vuxeni ka muti, a tiendlela ntsonga kona, a tshamisa ehansi ka wona endzhutini, leswaku a ta vona lexi nga ta humelela emutini.

⁶ Kutani Yehovha Xikwembu a mirisa nhlampfurha, wu kulela henhla ka Yonasi, leswaku wu endlela nhloko ya yena ndzhuti, wu susa ku vaviseka ka yena; kutani Yonasi a tsaka ngopfungopfu hikwalaho ka nhlampfurha wolowo.

⁷ Kambe nimixo, loko ri xa, Yehovha a rhuma xivungu lexi lumaka nhlampfurha, wu ko wu oma.

⁸ Kutani kakuloko dyambu ri huma, Xikwembu xi hungisa mheho leyo hisa ya vuxa, dyambu ri va ri hisa nhloko ya Yonasi, kutani Yonasi a titivala, a kombela ku fa, a ku: “Eka mina, ku hanya ku tlula hi ku fa!”

⁹ Kutani Xikwembu xi ku eka Yonasi: “Xana u endla swinene ku hlunama hikwalaho ka nhlampfurha lowu xana?” Yena a ku: “E, ndzi endla swona loko ndzi hlunama, ni ku yisa eku feni.”

¹⁰ Kutani Yehovha a ku: “Wena, u tsetselela nhlampfurha lowu u nga ka u nga tikarhatanga hi wona, lowu u nga ka u nga wu mirisanga, lowu tihumeleke hi vusiku byi ri byin'we, wu tlhela wu lova hi vusiku byin'we.

¹¹ Kutani mina, u ri ndzi nga tshuki ndzi tsetselela Ninivha, muti wolowo lowukulu, lowu nga ni vanhu lava hundzaka va 120 000, lava nga tiviki ku hlawula voko ra xinene ra vona eka lera ximatsi, kambe wu ni swifuwo leswo tala!”