Yohane 17 - Xitsonga (Bibele)

Xikhongelo xa vuprista.

¹ Kuteloko Yesu u vurile timhaka leti, a tlakusela mahlo ya yena ehenhla, a ku: “Tatana, nkarhi wu tile, dzunisa N'wana wa wena, leswaku N'wana wa wena a ku dzunisa na yena;

² hilaha u n'wi nyikeke vuhosi ehenhla ka nyama hinkwayo, leswaku hinkwavo lava u n'wi nyikeke vona, yena a va nyika vutomi lebyi nga heriki.

³ Kambe vutomi lebyi nga heriki, hileswaku va ku tiva wena Xikwembu xi ri xin'we xa ntiyiso, na Yesu Kriste loyi u n'wi rhumeke.

⁴ “Ndzi ku dzunisile la emisaveni, ndzi hetile ntirho lowu u ndzi nyikeke wona leswaku ndzi wu tirha.

⁵ Sweswi, wena Tatana, ndzi dzunise eka wena hi ku dzunisiwa loku ngi ndzi ri na kona eka wena, misava yi nga si va kona.

⁶ “Vito ra wena ndzi ri tivisile vanhu lava u ndzi nyikeke vona emisaveni; a va ri va wena, kutani u ndzi nyikile vona, kutani va hlayisile rito ra wena.

⁷ Sweswi, va tivile leswaku hinkwaswo leswi u ndzi nyikeke swona, swi huma eka wena.

⁸ Hikuva ndzi va nyikile marito lawa u ndzi nyikeke wona; kutani va ma amukerile, va swi tivile swinene leswaku ndzi huma eka wena, kambe va pfumerile leswaku hi wena loyi u ndzi rhumeke.

⁹ Ndza va khongelela; a ndzi khongeleri misava, kambe ndzi khongelela lava u ndzi nyikeke vona, hikuva i va wena.

¹⁰ Hinkwaswo leswi nga swa mina, i swa wena; ni swa wena, i swa mina; kutani ndzi dzunisiwa eka vona.

¹¹ A ndza ha ri la emisaveni, kambe vona va ha ri emisaveni; kutani mina ndzi ya eka wena. Tatana la kwetsimeke, hlayisa lava u ndzi nyikeke vona evitweni ra wena, va ta endla un'we kukotisa hina.

¹² Loko ndza ha ri na vona emisaveni, a ndzi va hlayisa evitweni ra wena. Ndzi hlayisile lava u ndzi nyikeke vona, kutani a ku na un'we la loveke, loko a nga ri n'wana wa ku lova, leswaku Matsalwa ma endleka.

¹³ Kutani sweswi, ndzi ya eka wena, kambe ndzi vulavula timhaka leti, ndza ha ri emisaveni, leswaku ku tsaka ka mina loku hetisekeke ku va eka vona hi xiviri.

¹⁴ Ndzi va nyikile rito ra wena, kutani misava yi va vengile; hikuva a hi va misava, kukotisa mina ndzi nga riki wa misava.

¹⁵ A ndzi ku khongeri leswaku u va susa emisaveni, kambe swi ri leswaku u va sirhelela eka leswo biha.

¹⁶ A hi va misava, kukotisa mina ndzi nga riki wa misava.

¹⁷ Va kwetsimise entiyisweni wa wena; rito ra wena hi wona ntiyiso.

¹⁸ Kukotisa loko u ndzi rhumile emisaveni, na mina ndzi va rhumile emisaveni.

¹⁹ Kutani ndzi tibasisela vona, leswaku na vona va basisiwa entiyisweni.

²⁰ “A ndzi khongeleri vona ntsena, kambe ndzi khongelela na vona lava nga ta pfumela eka mina hi rito ra vona;

²¹ swi ri leswaku hinkwavo va va un'we kukotisa leswi wena, Tatana, u nga eka mina, na mina ndzi nga ka wena; na vona va endla un'we na hina, leswaku misava yi ta pfumela leswaku u ndzi rhumile.

²² Ku kwetsima loku u ndzi nyikeke kona, ndzi va nyikile va ta endla un'we, kukotisa na hina hi nga un'we;

²³ mina ndzi va ka vona, wena u va ka mina, va ta hetiseka vun'weni hakunene, misava yi ta tiva leswaku u ndzi rhumile, ni leswaku u va rhandzile kukotisa leswi u ndzi rhandzeke.

²⁴ Tatana, lava u ndzi nyikeke vona, ndzi rhandza leswaku laha ndzi nga kona, na vona va va kona na mina, va ta hamba va hlalela ku kwetsima ka mina loku u ndzi nyikeke kona, hikuva u ndzi rhandzile misava yi nga si va kona.

²⁵ Tatana la lulameke, misava a yi ku tivanga, kambe mina ndzi ku tivile; na vona lava, va swi tivile leswaku u ndzi rhumile.

²⁶ Ndzi va tivisile vito ra wena, kutani ndza ha ta va tivisa rona, leswaku rirhandzu leri u ndzi rhandzeke ha rona, ri va eka vona, na mina ndzi va eka vona.”