Yeremiya 22 - Xitsonga (Bibele)

Ta ku tshinyiwa ka tihosi ta Yuda.

¹ Ku vula Yehovha, a ku: “Xikela endlwini ya hosi ya Yuda, kutani u yi byela kona rito leri, u ku:

² ‘Yingisela rito ra Yehovha, wena, hosi ya Yuda, la tshameke exiluvelweni xa Davhida, wena ni malandza ya wena, ni tiko ra wena leri nghenaka hi nyangwa leyi.

³ Ku vula Yehovha, a ku: “Avanyisani hi ku lulama, mi lamulela xisiwana emavokweni ya loyi a n'wi karhataka, mi nga tshuki mi pfukela wamatiko, ni xisiwana, ni noni matimba, mi nga va endli swo biha; mi nga halati ngati leyi nga riki na nandzu exivandleni lexi.

⁴ Hikuva loko mi hlayisa rito leri swinene, ku ta nghena hi tinyangwa ta yindlu leyi tihosi leti tshameke exiluvelweni xa Davhida, ti khandziyile etigolonyini ni tihanci, ti ri ni malandza ya tona, ni tiko ra tona.

⁵ Kambe loko mi nga yingiseri marito lawa, ndzi hlambanya ha mina, ku vula Yehovha; hakunene yindlu leyi yi ta hundzuka rhumbi.

⁶ “ ‘ “Hikuva Yehovha u te ematshan'weni ya yindlu ya hosi ya Yuda: Eka mina, u fana na Giliyadi, u nhloko ya Lebanoni, kambe ndzi ta ku hundzula swahava, ni muti lowu nga akiwiki.

⁷ Ndzi ta ku rhambela vaonhi, un'wana ni un'wana a ta ni matlhari ya yena; va ta tsema tikedari leto saseka ta wena, va ti cukumeta endzilweni.

⁸ Matiko yo tala ma ta hundza emahlweni ka muti lowu: un'wana, ni un'wana u ta ku eka nakulobye: Swi lo yini leswi Yehovha a endleke muti wolowo lowukulu leswo nghasi?

⁹ Kutani va ta ku: Hi leswi va riveleke ntwanano wa Yehovha, Xikwembu xa vona, va khinsamela swikwembu swin'wana, va swi tirhela.” ’ ”

¹⁰ Mi nga rileli la feke, mi nga n'wi tweli vusiwana; rilelani la fambaka, hikuva a nga ha vuyi, leswaku a ta ta vona tiko leri a velekiweke eka rona.

¹¹ Hikuva, Yehovha u te ematshan'weni yi Xalumi, n'wana Yosiya, hosi ya Yuda, la fumaka ematshan'weni ya Yosiya tata wa yena: “Loko a huma exivandleni lexi, a nga ha vuyi kwala.

¹² Hikuva u ta fela endhawini yeleyo va n'wi tekeleke kona eku bohiweni, a nga ha tlheli a ta vona tiko leri.”

¹³ “U ni khombo loyi a akaka yindlu ya yena hi ku homboloka, ni makamara ya yena, ku nga ri hi ku lulama; la tirhisaka warikwavo ntsena, a nga n'wi nyiki hakelo ya nyuku wa yena;

¹⁴ la nge: ‘Ndzi ta tiakela yindlu leyikulu, ni makamara ya ku anama, ndzi boxa mafasitere, ndzi yi nameka hi kedari, ndzi tota hi mhemba yo tshwuka!’

¹⁵ Xana u ri, u ta fuma hikuva u tipfalela hi kedari xana? A ndzi ku, ni tata wa wena a a tshama a dya a nwa xana? Kambe a endla hi ku avanyisa ni ku lulama; a ri ni ku rhula hakona.

¹⁶ A avanyisela mupfumari ni xisiwana, a ri ni ku rhula hakona. Xana sweswo a hi ku ndzi tiva xana? Ku vula Yehovha.

¹⁷ “Kasi wena a ku na mahlo, hambi yi ri mbilu, loko yi nga ri ya ku phanga ni ku halata ngati leyi nga riki na nandzu, ni ku tirha ku karhata, ni ku pfukela vanhu matimba.”

¹⁸ Hikwalaho, Yehovha a nga vula ematshan'weni ya Yoyakimi, n'wana Yosiya, hosi ya Yuda a ku: “A nga ka a nga rileriwi va ku: ‘Yo, makwerhu!’ Hambi va ku: ‘Yo, makwerhu wa wansati!’ A nga ka a nga rileriwi va ku: ‘Yo, hosi! Yo, vuhosi bya yena!’

¹⁹ U ta lahliwa, kukotisa mbhongolo, a kokiwa, a cukumetiwa ehandle ka tinyangwa ta Yerusalema.”

²⁰ “Khandziya Lebanoni, u huwelela! Tlakusela rito eBaxani! U huwelela u ri eAbarimi! Hikuva varhandziwa va wena hinkwavo va lovisiwile.

²¹ Ndzi vulavule na wena eku tirhuleleni ka wena, kutani u ku: ‘Ndzi nga ka ndzi nga yingisi!’ Hi wona mukhuva wa wena we evuhlangini bya wena lowa ku: ‘A ku na ku yingisela rito ra mina.’

²² Varisi va wena hinkwavo va ta tekiwa hi mheho, ni varhandziwa va wena va ta yisiwa evukhumbini; hilaha u nga ta khomisiwa tingana, u va u kanakana hi vumbabva hinkwabyo bya wena.

²³ Wena, muaki wa Lebanoni, la akeke emarhavini ya tikedari, u ta kolorisa ku yini, siku khombo ri ku humelelaka, ri ri khombo leri fanaka ni ra muveleki!”

²⁴ “Ndza hanya, ku vula Yehovha, loko wa ngi Yekoniya, n'wana Yoyakimi, hosi ya Yuda, a kotisile xingwavila lexi tiyisiweke evokweni ra mina ra xinene, a ndzi ta n'wi chuputa kona!

²⁵ Ndzi ta ku nyiketa emavokweni ya lava lavaka vutomi bya wena, ni le mavokweni ya lava u rhurhumelaka emahlweni ka vona ni le mavokweni ya Nebukadnetsara hosi ya Babilona, ni le mavokweni ya Vakalediya.

²⁶ Ndzi ta mi cukumeta, wena ni mana wa wena la ku velekeke, etikweni rin'wana laha mi nga velekiwangiki kona, mi ta fela kona.

²⁷ Loko ri ri tiko lero timbilu ta vona ti nga ta ri navela ku vuyela kona, va nga ka va nga vuyeli kona.”

²⁸ Xana munhu loyi, Yekoniya, i xibya lexi soriwaka, lexi fayiwaka xana? Kumbe i ntirho lowu nga pfuniki nchumu-ke? Va tshikiwa ha yini, yena ni nyimba ya yena, ku ya cukumetiwa ematikweni lawa va nga ma tiviki?

²⁹ Yahe! Tiko, tiko, tiko, yingisela rito ra Yehovha!

³⁰ Ku vula, Yehovha, a ku: “Tsalani munhu loyi la nga riki na vana munhu la nga tiki vaka na ku kateka emasikwini ya yena; hikuva ku nga ka ku nga vi na munhu wa nyimba ya yena ku tshama exiluvelweni xa Davhida, ni ku fuma va Yuda.”