Varhoma 7 - Xitsonga (Bibele)

Mukriste u tshunxiwile enawini ni le vudyohweni.

¹ Xana a mi swi tivi vamakwerhu, (ndzi vulavula ni lava tivaka nawu), leswaku nawu wu fuma munhu emikarhini hinkwayo ya ku hanya ka yena?

² Swi tano ni wansati la tekiweke, u bohiwile hi nawu eka nuna wa yena loko a ha hanya, kambe loko nuna a file, u tshunxiwile enawini wanuna.

³ Loko swi ri tano, loko a tekana ni wanuna un'wana, nuna wa yena loko a ha hanya, u ta vuriwa muoswi; kambe loko nuna wa yena a file, u tshunxiwile enawini; hileswaku loko a tekana ni nuna un'wana, a nga ka a nga vuriwi muoswi.

⁴ Hi mukhuva wolowo, na n'wina vamakwerhu, mi fisiwile hitlhelo ra nawu hi miri wa Kriste, leswaku mi va eka un'wana, a nga loyi a pfukeke eku feni, leswaku hi vekela Xikwembu mihandzu.

⁵ Hikuva, kuteloko a ha ha ri enyameni, ku navela lo ko biha ka vudyoho loku karihisiwaka hi nawu, a ku tirha eswirhweni swa hina, ku va ku vekela rifu mihandzu.

⁶ Kambe sweswi, hi tshunxiwile enawini, loko hi file hitlhelo ra nawu lowu ngi a hi bohiwa hi wona, hi ta tirhela Xikwembu hi vuntshwa bya moya, ku nga ri hi tsalwa leri dyuhaleke.

Nawu wu dyondzisa ku wu tlula, hikuva wu nyika munhu ku tiva vudyoho.

⁷ Hi ta ku yini-ke? Xana nawu wu bihile xana? A swi tano! Kambe loko a ku nga ri hi nawu, ingi ndzi nga tivanga vudyoho; hikuva a ndzi nga tivi ku navela, loko ngi nawu a wu nga vulanga leswaku: “U nga tshuki u navela!”

⁸ Kambe vudyoho byi kumile nkarhi eku leriseni, kutani byi humesile ku navela hinkwako ka mina; hikuva, nawu loko wu nga ri kona, vudyoho byi file.

⁹ Hikuva eku sunguleni, a ndzi hanya, ndzi nga ri na nawu; kambe nawu, loko wu fikile, vudyoho byi pfuka, mina ndzi fa.

¹⁰ Kutani ku kumeka leswaku, ku lerisa loku yisaka eku hanyeni, ku ndzi yisile eku feni.

¹¹ Hikuva vudyoho byi tekile nkarhi eku leriseni, byi ndzi kanganyisa, ni ku ndzi dlaya hakona.

¹² Loko wu ri nawu, wa kwetsima; ni ku lerisa ka kwetsima, ku lulamile, ku sasekile.

¹³ Xana lexo saseka xi ndzi hundzukele rifu xana? A swi tano! Kambe hi byona vudyoho lebyi ndzi dleleke hi leswo saseka, swi ta vonaka leswaku i vudyoho, byi va byi humesa ku biha ka byona hi ku tlurisisa, hikwalaho ka ku lerisa.

Ku lwa ka munhu la nga ehansi ka nawu.

¹⁴ Hikuva ha swi tiva leswaku nawu i wa moya, kambe mina ndzi wa nyama, ndzi xaveriwe vudyoho.

¹⁵ Hikuva leswi ndzi swi endlaka a ndzi swi tivi, hikuva a ndzi endli leswi ndzi swi rhandzaka, kambe ndzi endla leswi ndzi swi vengaka.

¹⁶ Kutani loko ndzi endla leswi ndzi nga swi rhandziki, hi kona ndzi pfumelaka leswaku nawu wu lulamile.

¹⁷ Kutani sweswi, a ndza ha ri mina la swi endlaka, kambe vudyoho lebyi akeke eka mina.

¹⁸ Hikuva ndza swi tiva leswaku leswinene a swi akanga eka mina, ku nga enyameni ya mina, hikuva ku rhandza ku kona eka mina; kambe loko ku ri ku endla leswinene, a ndzi ku kumi.

¹⁹ Hikuva leswinene leswi ndzi swi rhandzaka, a ndzi swi endli, kambe ndzi endla leswo biha, leswi ndzi nga swi rhandziki.

²⁰ Kambe loko ndzi endla leswo biha leswi ndzi nga swi rhandziki, a ndza ha ri mina ndzi swi endlaka, kambe i vudyoho lebyi akeke eka mina.

²¹ Hilaha ndzi kumaka nawu eka mina, lowu nge: Loko ndzi rhandza ku endla leswinene, ku biha ku namarhela eka mina.

²² Hikuva ndzi tsakela nawu wa Xikwembu hi munhu la nga exikarhi ka mina;

²³ kambe ndzi kuma nawu wun'wana eswirhweni swa mina, lowu lwaka ni nawu wa ku titivela ka mina, wu ndzi bohelelaka enawini wa vudyoho lowu nga le swirhweni swa mina.

²⁴ Yo! Ndzi munhu wa khombo leronghasi! I mani la nga ta ndzi kutsula emirini lowu wa rifu?

²⁵ A ku khensiwe Xikwembu ha Yesu Kriste, Hosi ya hina! Sweswo-ke, loko ndzi ri mina, hi ku titivela ka mina, ndzi tirhela nawu wa Xikwembu; kambe hi nyama, ndzi tirhela nawu wa vudyoho.