Varhoma 11 - Xitsonga (Bibele)

Xikwembu a xi cukumetanga tiko ra xona.

¹ Kambe ndzi ri: Xana Xikwembu xi cukumetile tiko ra xona xana? E-e! Niswitsanana! Hikuva na mina ndzi Muisraele, wa rixaka ra Abrahama, wa nyimba ya Benjamini.

² Xikwembu a xi cukumetanga tiko ra xona, leri xi ri tiveke eku sunguleni. Xana a mi swi tivi leswi Tsalwa ri swi vulaka ehenhla ka Eliya, hilaha a nga rila eka Xikwembu hikwalaho ka Israele, a ku:

³ “Hosi, va dlele vaprofeta va wena, va hlanhlile magandzelo ya wena, kutani mina ndzi sele ndzi ri swanga, kutani va lava ku ndzi dlaya!”

⁴ Kambe Xikwembu xi n'wi hlamurise ku yini xana? Xi te: “Ndzi tihlayisele vavanuna va ntlhanu wa makume na makume mambirhi ya madzana, lava nga khinsamangiki emahlweni ka Baali.”

⁵ Swi tano ni le mikarhini yoleyi; ku sele ntlawanyana lowu nga kona hi ku hlawuriwa ka tintswalo.

⁶ Kambe loko ku ri hi tintswalo, a ka ha ri hi mitirho; hikuva loko ku ri hi mitirho, tintswalo a ti nga ha vi tintswalo.

⁷ Swo vini kutani? Lexi Israele a nga xi lava, a nga xi kumanga, kambe vahlawuriwa va xi kumile; kasi van'wana va nonon'hwisiwile,

⁸ kukota leswi ku tsariweke leswaku: “Xikwembu xi va nyikile moya wa vurhongo, ni mahlo lama nga voniki, ni tindleve leti nga twiki; ni namuntlha swa ha ri tano.”

⁹ Davhida, na yena, u te: “Tafula ra vona ri va hundzukele ntlhamu ni rindzi, ni ku khunguvanyeka, ni ku rihisiwa!

¹⁰ A ku nyamisiwe mahlo ya vona leswaku ma nga voni ni mihlana ya vona a yi herheke hi masiku.”

Ku kateka ka vamatiko ku ta tela Vaisraele loko va pfumela.

¹¹ Kambe ndzi ri: “Xana va khunguvanyekele makumu xana?” Niswitsanana! Kambe hi ku wa ka vona, ku hlayiseka ku fikele vamatiko, leswaku va ta va pfuxa hi mona.

¹² Kutani loko ku wa ka vona ku hundzukile ndzalo ya vamatiko, ku hundzuka ka vona hinkwavo ku ta va loko tano swonghasi!

¹³ Ndzi byela n'wina vamatiko, hikuva ndzi muapostola wa vamatiko, ndzi dzunisa ntirho wa mina

¹⁴ leswaku, kumbe ndzi ta pfuxa va nyama ya mina hi rilondzo, ndzi ponisa van'wana va vona.

¹⁵ Hikuva loko ku tshiketiwa ka vona ku hundzukile ku hlanganisiwa ka misava, ku amukeriwa ka vona ku ta va yini, loko ku nga ri ku pfuka ka lava feke xana?

¹⁶ Loko swirhangana swi kwetsimile, vunyingi, na byona, byi kwetsimile; kutani loko rimitsu ri kwetsimile, marhavi, na wona, ma tano.

¹⁷ Kambe loko marhavi man'wana ma phatluriwile, kutani wena, mutlhwari wa nhova, u tlhomiwile eka wona, kutani u hlanganisiwile ni rimitsu, u phameriwa mafurha ya mutlhwari wa le kaya,

¹⁸ u nga tshuki u tikukumuxa, u sandza marhavi ya kona; hikuva hambi u tikukumuxisa xisweswo, a hi wena la rhwalaka rimitsu, kambe rimitsu, hi rona leri ku rhwalaka.

¹⁹ Kambe u ta ku: “Marhavi ma phatluriwile leswaku ndzi tlhomiwa ematshan'weni ya wona.”

²⁰ Hi swona; ma phatluriwile hikwalaho ka ku kala ku pfumela; kambe wena u yima hi ku pfumela, u nga tshuki u tikukumuxa, kambe u chava.

²¹ Hikuva, leswi Xikwembu xi nga tsetselelangiki marhavi ya xiviri, xi nga ka xi nga ku tsetseleri, na wena.

²² Hikwalaho, tsundzuka tintswalo ta Xikwembu, ni tihanyi ta xona; tihanyi ehenhla ka lava weke, ni tintswalo ehenhla ka wena, loko u tiyisela etintswalweni teto; hikuva loko u nga tiyiseri kona, u ta tsemiwa, na wena.

²³ Na vona loko va nga tshami eku kaleni ka ku pfumela, va ta tlheriseriwa emutlhwarini; hikuva Xikwembu xi ni matimba ku va tlherisela kona.

²⁴ Hikuva leswi wena u tekiweke emutlhwarini lowu nga wa nhova hi ntumbuluko, u nghenisiwile emutlhwarini wa le kaya, hi mukhuva lowu nga riki wa ntumbuluko, ngopfungopfu marhavi lama nga wona hi xiviri, ma ta tlhomiwa emutlhwarini lowu nga wona.

Vaisraele hinkwavo va ta ponisiwa.

²⁵ Hikuva, vamakwerhu, a ndzi swi rhandzi leswaku mi fihleriwa xihundla lexi, mi nga ti tshuka mi tiendla lavo tlhariha: swi ri leswaku ku nonon'hwa ku humelele Vaisraele hitlhelo rin'wana, ku tala ka vamatiko ku ko ku nghena;

²⁶ kutani hi mukhuva wolowo, Vaisraele hinkwavo va ta hlayisiwa, hilaha ku tsariweke leswaku: “Mukutsuri u ta huma eSiyoni, u ta susa xisandzu eka Yakobo”;

²⁷ “kutani hi wona ntwanano lowu ndzi nga ta va tiyisela wona, siku ndzi susaka swidyoho swa vona.”

²⁸ Kunene, hitlhelo ra Evhangeli, i valala hikwalaho ka n'wina; kambe hitlhelo ra ku hlawuriwa, va ha ri varhandziwa hikwalaho ka vatatana va vukulukulu,

²⁹ hikuva ku nyika ka Xikwembu, ni ku vitana ka xona, a ku na ku hundzuka.

³⁰ Kutani kukota leswi na n'wina, eku sunguleni, a mi nga yingiseri Xikwembu, kasi sweswi, mi tsetseleriwile hikwalaho ka ku tiarisa ka vona;

³¹ hi mukhuva wolowo, na vona, va hundzuke lava nga yingisiki, hi ku tsetselela loku mi humeleleke, leswaku, na vona, va tsetseleriwa.

³² Hikuva Xikwembu xi pfalele hinkwavo eku tiariseni, leswaku xi ta va tsetselela hinkwavo.

³³ Oho! A hi ku enta ka rifuwo, ni ka vutlhari, ni ka vutivi bya Xikwembu! Ku avanyisa ka xona a ku twisisiwi, ni tindlela ta xona a ti tiviwi!

³⁴ “Hikuva i mani la nga tivaka ku anakanya ka Hosi, kumbe i mani la nga mutsundzuxi wa yona?”

³⁵ “Kumbe i mani la yi nyikeke nchumu eku sunguleni, wu ta tlherisiwa eka yena.”

³⁶ Hikuva swilo hinkwaswo swi hume eka yena, swi kona eka yena, kambe swi endleriwa yena! Ku kwetsima a ku ve eka yena hilaha ku nga heriki! Amen!