Vagalatiya 5 - Xitsonga (Bibele)

Tiyani eka Kriste, mi chava ku xisiwa.

¹ Yimani hakona, mi tiya eku tshunxekeni loku Kriste a nga hi tshunxa hakona, kutani mi nga tlheli mi tiveka ehansi ka mpingu wa vukhumbi.

² Maswivo, mina Pawulo, ndza mi byerisisa leswaku loko mi yimba, Kriste a nga ka a nga mi pfuni nchumu.

³ Ndza tiyisa, ndzi ri eka munhu un'wana ni un'wana la yimbaka, leswaku u ni mfanelo ya ku heta nawu hinkwawo.

⁴ Mi hambene na Kriste, n'wina hinkwenu lava rhandzaka ku hlayiwa lava lulameke hi nawu; mi wile, a ma ha ri etintswalweni.

⁵ Kambe hina hi langutela hi Moya ku tshemba ka ku lulama loku humaka eku pfumeleni.

⁶ Hikuva eka Yesu Kriste, ku yimba hambi byi ri vukhuna, a swi pfuni nchumu, kambe ku pfuna ku pfumela loku tirhaka hi rirhandzu.

⁷ A mi ri karhi mi tsutsuma swinene! I mani la mi yimiseke, a mi sivela ku yingisela ntiyiso?

⁸ Ku lerisa kuloko a ku humi eka la mi vitaneke.

⁹ Comela lexitsongo xi kukumuxa mbila hinkwayo.

¹⁰ Loko ndzi ri mina, ndzi mi tshembile eHosini; leswaku mi nga ka mi nga vi na ku anakanya kun'wana, kambe loyi a mi karhataka, u ta kumiwa hi ku avanyisiwa, hambi a ri mani na mani.

¹¹ Kasi loko ndzi ri mina, vamakwerhu, loko kunene ndza ha dyondzisa swa ngoma, ndza ha xaniseriwa yini xana? Kasi ku khunguvanyisa ka xihambano ku nga va ku sukile!

¹² Ngi va nga tsemiwa lava mi pfilunganyisaka.

Lava kutsuriweke va fanele ku hanya hi Moya, ku nga ri hi nyama.

¹³ Vamakwerhu, mi vitaneriwile eku tshunxekeni; kambe ntsena mi nga tshuki mi endla ku tshunxeka wu va nkarhi wa ku hanya hi nyama, kambe tirhisanani hi rirhandzu.

¹⁴ Hikuva nawu hinkwawo wu hlangene emhakeni yin'we, leyi nge: “Rhandza warikwenu kukota loko u tirhandza.”

¹⁵ Kambe, kungakuloko mi lumana ni ku dyanana, tilanguteleni leswaku mi nga hetani.

¹⁶ Kambe ndzi ri: Fambani hi Moya, kutani mi nga ka mi nga tsakisi ku navela ka nyama;

¹⁷ hikuva nyama yi ni ku navela loku lwaka ni ku navela ka Moya; na wona Moya, wu ni ku navela loku lwaka ni ku navela ka nyama, kutani swilo leswo swa lwisana, leswaku mi nga tshuki mi endla leswi timbilu ta n'wina ti swi rhandzaka.

¹⁸ Loko kunene mi famba hi Moya, a mi le ku fumeni ka nawu.

¹⁹ Kasi mitirho ya nyama yi le rivaleni, byi nga vumbhisa, ni vugangu, ni vuoswi,

²⁰ ni ku khongela swikwembu swahava, ni vungoma, ni ku vengana, ni timholovo ni vukwele, ni ku kariha, ni ku alana ni madzolonga, ni ku avana,

²¹ ni makwanga, ni ku pyopyiwa, ni makolo, ni swilo leswo tano, leswi ndzi mi byelaka erivaleni, kukotisa leswi ndzi tshamaka ndzi mi byela leswaku, lava endlaka leswo tano, va nga ka va nga dyi ndzhaka ya ku fuma ka Xikwembu.

²² Kambe mihandzu ya Moya, i rirhandzu, ni ku tsaka, ni ku rhula, ni ku yingisela, ni ku tsakelana, ni vunene, ni ku tshembeka, ni ku olova, ni ku tikhoma.

²³ A ku na nawu lowu alaka leswo tano.

²⁴ Kambe lava nga Vakriste, va vambile nyama ni ku rhandza ni ku navela ka yona.

²⁵ Loko kunene hi hanya hi Moya, a hi fambeni hi Moya!

²⁶ Hi nga tshuki hi tilavela ku tidzunisa ka hava, ni ku pfukana, ni ku vondzokana.