Vaavanyisi 14 - Xitsonga (Bibele)

Ta ku teka ka Samsoni wanhwana wa Mufilista.

¹ Samsoni a ngirimela eTimina, a vona wansati exikarhi ka vanhwanyana va Vafilista eTimina.

² Kutani a tlhela, a tivisa tata wa yena ni mana wa yena, a ku: “Ndzi vonile wansati exikarhi ka vanhwanyana va Vafilista, eTimina, mi ndzi tekela yena sweswi, a va nsati wa mina.”

³ Kambe tata wa yena ni mana wa yena, va ku eka yena: “Xana a ku na wansati exikarhi ka vanhwana va vamakwenu ni le tikweni ra rikwenu hinkwaro xana, leswaku u ya titekela nsati eka Vafilista lava nga yimbangiki?” Samsoni a ku eka tata wa yena: “Ndzi tekele yena, hikuva u ndzi tsakisile.”

⁴ Loko a ri tata wa yena ni mana wa yena, a va nga swi tivi leswaku mhaka yoleyo yi hume eka Yehovha; kasi Samsoni a a lava nkarhi wa ku lwa ni Vafilista; hikuva enkarhini wolowo, Vafilista a va fuma Vaisraele.

⁵ Loko swi ri tano, Samsoni a ngirimela eTimina a ri ni tata wa yena ni mana wa yena; kakuloko, va fika emasin'wini ya vhinya ya Timina, vonani, nghalanyana leyi bongaka yi hlangana na yena.

⁶ Kutani Moya wa Yehovha wu n'wi tela hi matimba. A handzula nghala kukotisa loko ku handzuriwa ximbutana, a nga tamelanga nchumu emavokweni ya yena; kambe a nga byelangi tata wa yena ni mana wa yena lexi a xi endleke.

⁷ Kutani a ngirimela, a ya vulavula ni wansati; kutani Samsoni a tsakisiwa hi yena.

⁸ Endzhaku ka masikwanyana, loko, a ya n'wi teka, a hambuka ndlela ku ya vona ntsumbu wa nghala, a vona tinyoxi entsumbyini wa nghala ni vulombe.

⁹ Kutani a hakula, vulombe hi mavoko ya yena, a suka a famba, a dya; kuteloko a fika eka tata wa yena ni mana wa yena, a va pambulela, va dya; kambe a nga va tivisanga leswaku u hakule vulombe entsumbyini wa nghala.

¹⁰ Kutani tata wa yena a ngirimela eka wansati; Samsoni a endla nkhuvo kona, hilaha wu nga mukhuva wa majaha.

¹¹ Kutani loko, va n'wi vona va n'wi hlawulela tinxangwana ta 30, va va na yena.

¹² Kutani Samsoni a ku eka vona: “Ndza ha mi byela mawetana, loko mi ndzi hlamusela wona swinene hi masiku ya ntlhanu na mambirhi ya nkhuvo, mi vula, ndzi ta mi nyika tinguvu ta 30 ta ntsembyana, ni swiambalo swin'wana swa 30.

¹³ Kambe loko mi tsandzeka ku ndzi hlamusela wona, hi n'wina lava nga ta ndzi nyika tinguvu ta ntsembyana ta 30 ni swiambalo swin'wana swa 30.” Va ku eka yena: “Hi byele mawetana ya wena, hi ma twa.”

¹⁴ A ku eka vona: “Swakudya swi humile eka mudyi, leswi nandzihaka swi humile eka lowa matimba.” Kutani va tsandzeka ku hlamusela mawetana hi masiku manharhu.

¹⁵ Kute hi ra ntlhanu na mambirhi, va ku eka nsati wa Samsoni: “Yengetela nuna wa wena, leswaku a hi hlamusela mawetana; loko swi nga ri tano, hi ta ku hisa wena ni yindlu ya tata wa wena. Xana mi hi vitanele halenu ku ta hi tekela swa hina, kumbe a swi tano xana?”

¹⁶ Nsati wa Samsoni a ya rila emahlweni ka yena, a ku: “Kunene wa ndzi venga, a ku ndzi rhandzi; u vekele vana va tiko ra rikwerhu mawetana, kambe a ku ndzi hlamuselanga wona!” A ku eka yena: “Vona, hambi a ri tatana na manana, a ndzi va hlamuselanga wona, ndzi nga ku hlamuserisa ku yini xana?”

¹⁷ Kambe nsati wa yena a rila emahlweni ka yena hi masiku ya ntlhanu na mambirhi ya nkhuvo wa vona, kambe hi ra vuntlhanu na mambirhi a n'wi hlamusela mawetana, hikuva a a tshama a n'wi karhata, yena a hlamusela vana va tiko ra rikwavo mawetana.

¹⁸ Hi siku ra ntlhanu na mambirhi dyambu ri nga si pela, vanhu va muti va n'wi byela, va ku: “Leswi tlulaka vulombe hi ku nandziha i yini xana? Ni leswi tlulaka nghala hi matimba, i yini?” A ku eka vona: “Loko a mi nga rimanga hi thokazi ra mina; a mi nga ta kuma mawetana ya mina.”

¹⁹ Kutani Moya wa Yehovha wu n'wi tela, a ngirimela eAxikeloni, a dlaya kona vavanuna va 30, a famba ni swilo swa vona, a ya nyika lava nga hlamusela mawetana ya yena tinguvu ta vona. Kutani a tala ku kariha, a tlhelela eka tata wa yena.

²⁰ Kutani nsati wa Samsoni a nyikiwa nakulobye, loyi a n'wi endleke nxangwana ya yena.