Vaavanyisi 13 - Xitsonga (Bibele)

Ta ku tswariwa ka Samsoni.

¹ Kutani vana va Israele va engeta va endla leswo biha emahlweni ka Yehovha; Yehovha a va nyiketa emavokweni ya Vafilista hi malembe ya 40.

² Wanuna un'wana a a ri kona eSora, wa nyimba ya Dani; vito ra yena a a ri Manowaka; nsati wa yena a a ri mhika, a a nga veleki.

³ Kutani ntsumi ya Yehovha yi humelela eka wansati, yi ku eka yena: “Languta, u mhika, a ku veleki, kambe u ta tika, u va u veleka n'wana wa wandzisanyana.

⁴ Kutani sweswi, u nga tshuki u nwa vhinyo, hambi swi ri leswi pyopyisaka, u nga tshuki u dya xilo lexi nga tengangiki.

⁵ Hikuva vona, u ta tika, u va u veleka wandzisanyana rikari ri nga tshuki ri n'wi byewula nhloko, hikuva n'wana u ta va Munaziri wa Xikwembu, a ha ri ekhwirini ra mana wa yena; hi yena la nga ta sungula ku lamulela Vaisraele emavokweni ya Vafilista.”

⁶ Kutani wansati a ya byela nuna wa yena, a ku: “Ku tile eka mina wanuna wa Xikwembu, xivumbeko xa yena a xi fana ni xivumbeko xa ntsumi ya Xikwembu hi ku chavisa, a ndzi n'wi vutisanga laha a humaka kona, kambe a nga ndzi byelangi vito ra yena.

⁷ U te eka mina: ‘Languta, u ta tika, u ta veleka n'wana wa wandzisanyana; sweswi, u nga tshuki u nwa vhinyo, hambi leswi pyopyisaka u nga tshuki u dya xilo lexi nga tengangiki, hikuva n'wana u ta va Munaziri wa Xikwembu, a ha ri ekhwirini ra mana wa yena, a ko a fa.’ ”

⁸ Manowaka a khongela Yehovha, a ku: “Oho! N'wini wanga, munhu wa Xikwembu la rhumiweke hi wena a engeta a ta eka hina, a ta hi dyondzisa hilaha hi fanelaka ku endla hakona eka n'wana la nga ta tswariwa.”

⁹ Xikwembu xi yingisa rito ra Manowaka kutani ntsumi ya Xikwembu yi tlhela yi ta eka wansati a tshamile emasin'wini, Manowaka nuna wa yena a ri kona na yena.

¹⁰ Kutani wansati a hatlisa a tsutsuma, a ya tivisa nuna wa yena, a ku eka yena: “Languta, wanuna la nga ta eka mina tolweni u tlhele a humelela eka mina.”

¹¹ Manowaka, a landzela nsati wa yena hi le ndzhaku, a fika eka munhu wa Xikwembu, a ku eka yena: “Xana hi wena wanuna la nga vulavula ni nsati loyi xana?” A hlamula, a ku: “Hi mina.”

¹² Manowaka a ku: “Kutaku lexi u xi vuleke loko xi endlakala, nawu lowu nga ta fuma n'wana ni ntirho wa yena wu ta va wihi xana?”

¹³ Ntsumi ya Yehovha yi ku eka Manowaka: “Wansati a a titsone hinkwaswo leswi ndzi swi vuleke.

¹⁴ A nga tshuki a dya nchumu eka leswi humaka eka vhinya, a nga tshuki a nwa vhinyo, hambi xi ri lexi pyopyisaka, a nga tshuki a dya nchumu eka leswi nga tengangiki; a hlayisa hinkwaswo leswi ndzi n'wi leriseke swona.”

¹⁵ Manowaka a ku eka ntsumi ya Yehovha: “Hi pfumelele hi ku sivela, hi ku lunghisela ximbutana.”

¹⁶ Ntsumi ya Yehovha yi ku eka Manowaka: “Hambi u nga ndzi sivela, ndzi nga ka ndzi nga dyi swakudya swa wena; kambe loko u endla magandzelo lama hisiwaka, u ta ma humesela Yehovha.” Hikuva Manowaka a a nga swi tivi leswaku i ntsumi ya Yehovha.

¹⁷ Kutani Manowaka a vutisa ntsumi, a ku: “Vito ra wena u mani xana, hi ta tiva ku ku dzunisa loko ku humelele lexi u xi vuleke?”

¹⁸ Ntsumi ya Yehovha yi ku eka yena: “U vutisela yini vito ra mina xana? Hi leri chavisaka!”

¹⁹ Kutani Manowaka a teka ximbutana ni nhlengo a swi humesela Yehovha eribyeni. Kutani ntsumi yi endla lexi hlamarisaka, Manowaka ni nsati wa yena va ri karhi va langutile.

²⁰ Kakuloko, malangavi ya ndzilo ya alitari ma pfurhela ehenhla, ntsumi ya Yehovha yi tlhandluka na yona emalangavini ya alitari, Manowaka ni nsati wa yena, va ri karhi va languta; va tiwisela ehansi hi mimombo ya vona.

²¹ Kambe ntsumi ya Yehovha a ya ha tlhelanga yi humelela eka Manowaka ni nsati wa yena. Kutani Manowaka a swi tiva leswaku a yi ri ntsumi ya Yehovha.

²² Manowaka a ku eka nsati wa yena: “Kunene hi ta fa, hikuva hi vonile Xikwembu.”

²³ Nsati wa yena a ku eka yena: “Loko Yehovha a a rhandzile ku hi dlaya, ingi a nga amukelangi magandzelo lama hisiwaka, ni nhlengo wa hina, kambe ingi a nga hi kombisanga swilo leswo hinkwaswo, hambi ku ri ku hi tivisa namuntlha timhaka leto nghasi.”

²⁴ Kutani wansati a veleka wandzisanyana, a n'wi thya vito ra Samsoni; n'wana a kula, Yehovha a n'wi katekisa.

²⁵ Kutani moya wa Yehovha wu sungula ku n'wi kucetela a ri Mahane-Dani, exikarhi ka Sora na Exitawulu.