Tinhlayo 35 - Xitsonga (Bibele)

Ta miti ya Valevhi.

¹ Yehovha a byela Muxe emabanyini ya Mowabu, ekusuhi na Yordani, na Yeriko, a ku:

² “Lerisa vana va Israele leswaku va nyika Valevhi, endzhakeni leyi nga ta va ya vona, miti ya ku aka eka yona; mi ta nyika Valevhi ni matikwana ematlhelweni ya miti leyi.

³ Va ta aka emitini kutani matikwana ma ta va ya tihomu ta vona, ni ya rifuwo ra vona, ni ya swifuwo hinkwaswo swa vona.

⁴ Matikwana ya miti leyi mi nga ta nyika Valevhi, ma ta va ya swisungunhu swa khume ra madzana, ematlhelweni hinkwawo, ku suka erirhangwini ra muti.

⁵ Mi ta pima ehandle ka muti swisungunhu swa 2 000 evuxeni, ni swisungunhu swa 2 000 edzongeni, ni swisungunhu swa 2 000 evupeladyambu, ni swisungunhu swa 2 000 en'walungwini, muti wu va exikarhi; hi wona masimu ya miti ya vona.

⁶ “Exikarhi ka miti leyi mi nga ta nyika Valevhi, ku ta va ni miti ya ntlhanu na wun'we ya xichavelo, leswaku mudlayi a ta tiva ku ya chavela kona; mi ta va nyika miti yin'wana ya 42.

⁷ Miti hinkwayo leyi mi nga ta nyika Valevhi, yi ta va ya 48, yi ri ni matikwana ya yona.

⁸ Loko yi ri miti leyi mi nga ta teka endzhakeni ya Vaisraele ku va nyika, mi ta teka leyo tala eka loyi a nga ni leyo tala, kambe mi ta teka leyi nga talangiki eka loyi a nga ni leyi nga talangiki; un'wana ni un'wana u ta nyika Valevhi miti ya yena hi mpimo wa ndzhaka leyi a yi amukeleke.”

Ta miti ya vuchavelo. Ta murihiseri wa ngati.

⁹ Yehovha a byela Muxe, a ku:

¹⁰ “Byela vana va Israele, u ku eka vona: ‘Kutakuloko mi perile Yordani, mi nghenile etikweni ra Kanana,

¹¹ mi ta tihlawulela miti leyi nga ta va miti ya vuchavelo eka n'wina, mudlayi la dlayeke munhu, ku nga ri ha vomu, u ta tiva ku ya chavela kona.

¹² Miti leyi, yi ta mi pfuna hikwalaho ka murihiseri, leswaku mudlayi a nga tshuki a fa, a nga si humelela eku avanyiseni, emahlweni ka nhlengeletano.

¹³ Exikarhi ka miti leyi mi nga ta yi nyika Valevhi, miti ya 6 yi ta va miti ya vuchavelo.

¹⁴ Mi ta nyika miti minharhu ehase ka Yordani, ni miti minharhu etikweni ra Kanana: Yi ta va miti ya vuchavelo.

¹⁵ Miti leyi ya 6 swi ta va swichavelo swa vana va Israele, ni swa muluveri la akeke exikarhi ka vona leswaku mani na mani la dlayeke munhu, ku nga ri ha vomu, a ta tiva ku chavela kona.

¹⁶ “ ‘Kungakuloko a n'wi bile hi nsimbhi, kutani a fa, i mudlayi: mudlayi u ta dlawa.

¹⁷ Loko a n'wi bile hi ribye leri munhu a nga dlayiwaka ha rona, kutani a fa; i mudlayi: mudlayi u ta dlawa.

¹⁸ Kutakuloko u n'wi bile hi mbhinyi lowu munhu a nga dlayiwaka ha wona, kutani a fa, i mudlayi: mudlayi u ta dlawa.

¹⁹ Murihisi u ta dlaya mudlayi; kutakuloko a hlangana na yena, u ta n'wi dlaya.

²⁰ Kungakuloko munhu a susumeta warikwavo hi rivengo, kumbe loko a n'wi hoxe xilo ha vomu, kutani a fa,

²¹ kumbe loko a n'wi bile hi voko hi ku vengana, kutani a fa, la n'wi beke, u ta dlawa, i mudlayi: murihisi u ta dlaya mudlayi loko a hlangana na yena.

²² “ ‘Kambe loko a n'wi susumetile ntsena, ku nga ri hi rivengo, kumbe loko a n'wi hoxele xilo ku nga ri ha vomu;

²³ hambiloko a wisile ehenhla ka yena, a nga n'wi voni, ribye leri munhu a nga dlayiwaka ha rona, kutani a fa, a nga ri nala wa yena, a nga n'wi lavelanga ni swo biha,

²⁴ nhlengeletano yi ta avanyisa exikarhi ka loyi a n'wi beke ni murihisi, hi milawu leyi.

²⁵ Nhlengeletano yi ta kutsula mudlayi evokweni ra murihisi, yi ta n'wi tlherisela emutini wa xichavelo laha a chaveleke kona. U ta tshama kona ku ko ku fika rifu ra muprista lonkulu, la cheriweke hi mafurha lama hlawulekeke.

²⁶ Kambe loko mudlayi a tlula endzilakaneni wa muti wa xichavelo xa yena,

²⁷ ni loko murihisi a n'wi kuma ehandle ka mindzilekana ya miti ya vuchavelo xa yena, ni loko a dlaya mudlayi, a nga na nandzu wa mudlayi.

²⁸ Hikuva mudlayi a fanele ku tshama emutini wa xichavelo ku ko ku fika rifu ra muprista lonkulu; kutakuloko muprista lonkulu a file, u ta tlhelela etikweni leri ndzhaka ya yena yi nga eka rona.

²⁹ Wu ta va eka n'wina nawu wa leswi lulameke etinxakeni ta tinxaka, hinkwako laha mi nga ta aka kona.

³⁰ “ ‘Kungakuloko ku dlayiwile munhu, va ta dlaya mudlayi, ku ri loko ku yingisiwile milomu ya timbhoni. Mbhoni yin'we yi nga ka yi nga ringani ku dlayisa munhu.

³¹ “ ‘Mi nga tshuki mi amukela ntsengo wa vutomi bya mudlayi la fanelaka ku dlayiwa, hikuva u ta dlawa kunene.

³² Mi nga tshuki mi amukela ntsengo leswaku la balekeke emutini wa xichavelo xa yena, a tiva ku tlhelela etikweni ra rikwavo, muprista a nga si fa.

³³ Mi nga tshuki mi onha tiko leri mi nga eka rona, hikuva ngati yi onha tiko; hikuva a ku na mhamba yin'wana ya ngati leyi halatiweke, loko yi nga ri ngati ya loyi a yi halateke.

³⁴ Mi nga tshuki mi onha tiko leri mi nga ta aka eka rona, laha ndzi akeke kona; hikuva hi mina Yehovha la akeke exikarhi ka vana va Israele.’ ”