Tinhlayo 30 - Xitsonga (Bibele)

Nawu wa ku tiboha hi ku hlambanya.

¹ Muxe a byela vana va Israele hinkwaswo hilaha Yehovha a leriseke Muxe hakona.

² Muxe a byela tihosi ta tinyimba ta vana va Israele, a ku: “Leswi lerisiweke hi Yehovha, hi leswi:

³ Kungakuloko munhu a tibohile eka Yehovha hi ku hlambanya, kumbe loko a hlambanyile a va a tiboha hi rito ra yena, a nga tshuki a kaneta rito ra yena, u ta endla hinkwaswo leswi a swi vuleke hi nomu wa yena.

⁴ “Loko wansati a tibohile eka Yehovha hi ku hlambanya, ni loko a tibohile hi rito ra yena a ri endlwini ya tata wa yena, evutsongweni bya yena,

⁵ kutani tata wa yena, loko a twile ku hlambanya ka yena, ni rito ra yena leri a tiboheke ha rona, a miyela; ku hlambanya hinkwako ka yena ku ta tiyisiwa, ni marito hinkwawo lawa a tiboheke ha wona, ma ta tiya.

⁶ Kambe tata wa yena, siku a swi twaka, loko a n'wi arisa, ku hlambanya hinkwako ka yena ni marito hinkwawo lawa a tiboheke ha wona, ma nga ka ma nga tiyi; Yehovha u ta n'wi rivalela, hikuva tata wa yena u n'wi landzulele.

⁷ “Kungakuloko a tekiwile, kutani a tiboha hi ku hlambanya ka yena, kumbe hi rito leri humeke enon'wini wa yena,

⁸ kutani nuna wa yena siku a swi twaka, loko a miyela, ku hlambanya ka yena ku ta tiya, ni marito ya yena lawa a tiboheke ha wona, ma ta tiya,

⁹ kambe siku nuna wa yena a swi twaka, loko a n'wi alela u hlanhlile ku hlambanya ka yena, ni rito leri humeke enon'wini wa yena leri n'wi boheke; kutani Yehovha u ta n'wi rivalela.

¹⁰ “Loko ku ri ku hlambanya ka wansati wa noni, hambi ka wansati la tshikiweke, marito hinkwawo lawa a tiboheke ha wona ma ta tiya eka yena.

¹¹ Kutakuloko a tibohile hi ku hlambanya a ri endlwini ya nuna wa yena,

¹² kutani nuna wa yena loko a swi twile, a miyela, a nga n'wi landzulelanga, ku hlambanya ka yena ku ta tiya, ni marito hinkwawo lawa a tiboheke ha wona ma ta tiya.

¹³ Kambe loko nuna wa yena a swi landzurile siku a swi tweke, hinkwawo marito ya ku hlambanya, ni ya ku tiboha lama humeke enon'wini wa yena, ma ta hlanhliwa, nuna wa yena u swi landzurile, kutani Yehovha u ta n'wi rivalela.

¹⁴ Marito hinkwawo ya ku tiboha, ni ku hlambanya hinkwako, loku a tiboheke hakona, ku titsongahata hakona, ku nga tiyisiwa; kumbe ku nga landzuriwa hi nuna wa yena.

¹⁵ Kambe loko nuna a miyela hi masiku, a tiyisa ku hlambanya hinkwako ni marito hinkwawo lawa nsati wa yena a tiboheke ha wona, u swi tiyisile hikuva u miyerile siku a swi tweke.

¹⁶ Swingaku loko a swi landzula, siku a swi yingiseke loko ri hundzile, u ta rhwala nandzu wa nsati wa yena.”

¹⁷ Hi yona milawu leyi Yehovha a yi leriseke Muxe etimhakeni ta nuna ni nsati wa yena, ni ta munhu ni n'wana wa yena wa wanhwana, hi nkarhi lowu a nga endlwini ya tata wa yena, evunhwaneni bya yena.