Tinhlayo 26 - Xitsonga (Bibele)

Ntsengo wa va Israele lava humaka nyimpi.

¹ Endzhaku ka khombo leri, Yehovha a ku eka Muxe na Eliyazara, n'wana Aroni, muprista:

² “Hlayani nhlengeletano hinkwayo ya vana va Israele, ku sungula hi va malembe ya 20, ni lava tlulaka, hi tinyimba ta vona, mi hlaya vavanuna hinkwavo va Israele lava hlomaka.”

³ Kutani Muxe na Eliyazara, muprista, va vulavula na vona erivaleni ra Mowabu, ekusuhi na Yordani na Yeriko, va ku eka vona:

⁴ “Mi ta hlayiwa ku sungula hi va malembe ya 20, ni lava tlulaka,” hi laha Yehovha a leriseke Muxe ni vana va Israele hakona loko va huma eEgipta.

⁵ Rhuveni, mativula ya Israele: Vana va xinuna va Rhuveni a a ri Hanoko ni nyimba ya va Hanoko; na Palu, ni nyimba ya va Palu;

⁶ na Hesironi, ni nyimba ya va Hesironi; na Karimi, ni nyimba ya va Karimi.

⁷ Hi tona tinyimba ta va Rhuveni: lava hlayiweke va vona a va ri 43 730.

⁸ N'wana Palu a a ri Eliyabu.

⁹ Vana va Eliyabu, a a ri Nemuwele na Datani, na Abirama. I Datani na Abirama lava ngi va ri vakulukumba lava landzuleke Muxe na Aroni enhlengeletanweni ya Kora, siku va pfukeleke Yehovha;

¹⁰ kutani misava yi ahlamise nomu wa yona, yi va mita va ri na Kora, kutani nhlengeletano yi fa; ni loko ndzilo wu hisa vanhu va 250, leswaku xi va xikombiso.

¹¹ Kambe vana va Kora a va fanga.

¹² Vana va Simiyoni, hi tinyimba ta vona hi lava: va Nemuwele, nyimba ya va Nemuwele; va Yamini, nyimba ya va Yamini; va Yakini, nyimba ya va Yakini,

¹³ va Zera, nyimba ya va Zera; va Xawulu, nyimba ya va Xawulu.

¹⁴ Hi tona tinyimba ta va Simiyoni: a va ri 22 200.

¹⁵ Vana va Gadi, hi tinyimba ta vona: va Sefoni, nyimba ya va Sefoni; va Hagi, nyimba ya va Hagi; va Xuni, nyimba ya va Xuni;

¹⁶ va Ozini, nyimba ya va Ozini; va Eri, nyimba ya va Eri;

¹⁷ va Arodi, nyimba ya va Arodi; va Areli, nyimba ya va Areli.

¹⁸ Hi tona tinyimba ta vana va Gadi, hi ntsengo wa vona: a va ri 40 500.

¹⁹ Vana va Yuda: Ere na Onani; Ere na Onani va file etikweni ra Kanana.

²⁰ Kutani vana va Yuda, hi tinyimba ta vona a va ri va Xela, nyimba ya va Xela; va Perese, nyimba ya va Perese; va Zera, nyimba ya va Zera.

²¹ Vana va Perese a va ri: va Hesironi, nyimba ya va Hesironi, va Hamula, nyimba ya va Hamula.

²² Hi tona tinyimba ta Yuda, hi ntsengo wa tona: a va ri 76 500.

²³ Vana va Isakara, hi tinyimba ta vona: Tola, nyimba ya va Tola; va Puwa, nyimba ya va Puwa:

²⁴ va Yaxubu, nyimba ya va Yaxubu; va Ximroni, nyimba ya va Ximroni.

²⁵ Hi tona tinyimba ta Isakara, hi ntsengo wa tona: a va ri 64 300.

²⁶ Vana va Zebuloni, hi tinyimba ta vona, va Seredi, nyimba ya va Seredi; va Elone, nyimba ya va Elone; va Yahaliele, nyimba ya va Yahaliele.

²⁷ Hi tona tinyimba ta Zebuloni, hi ntsengo wa tona: a va ri 60 500.

²⁸ Vana va Yosefa, hi tinyimba ta vona: Manase na Efrayimi.

²⁹ Vana va Manase: va Makiri, nyimba ya va Makiri, Makiri a tswala Giliyadi: va Giliyadi, nyimba ya Vagiliyadi.

³⁰ Hi vona vana va Giliyadi: Iyezere, nyimba ya va Iyezere; va Heleke, nyimba ya va Heleke; Asiriele, nyimba ya va Asiriele;

³¹ Xikeme, nyimba ya Vaxikeme; Xemida, nyimba ya va Xemida;

³² Hefere, nyimba ya va Hefere;

³³ Selofihada n'wana Hefere, a nga vanga na vana va xinuna, kambe a a ri ni vanhwanyana, mavito ya vanhwanyana va Selofihada a a ri Mahela, na Nowa, na Hogila, na Milika, na Tirisa.

³⁴ Hi tona tinyimba ta Manase kutani lava hlayiweke va vona, a va ri 52 700.

³⁵ Hi vona vana va Efrayimi, hi tinyimba ta vona: va Xutela, nyimba ya va Xutela; va Bekere, nyimba ya va Bekere; va Tahani, nyimba ya va Tahani.

³⁶ Hi vona vana va Xutela: va Erani, nyimba ya va Erani.

³⁷ Hi tona tinyimba ta vana va Efrayimi, hi ntsengo wa tona: a va ri 32 500. Hi vona vana va Yosefa, hi tinyimba ta vona.

³⁸ Vana va Benjamini, hi tinyimba ta vona: va Bela, nyimba ya va Bela; va Axibele, nyimba ya va Axibele; va Ahirame, nyimba ya va Ahirame;

³⁹ va Xefufama, nyimba ya va Xefufama; va Hufamu, nyimba ya va Hufamu.

⁴⁰ Vana va Bela a a ri Aridi na Naamani; va Aridi, nyimba ya va Aridi; va Naamani, nyimba ya va Naamani.

⁴¹ Hi vona vana va Benjamini hi tinyimba ta vona: lava hlayiweke a va ri 45 600.

⁴² Hi vona vana va Dani hi tinyimba ta vona: va Xuhamu, nyimba ya va Xuhamu. Hi tona tinyimba ta Dani.

⁴³ Tinyimba hinkwato ta va Xuhamu, hi ntsengo wa tona, a va ri 64 400.

⁴⁴ Vana va Asere, hi tinyimba ta vona: va Yimina, nyimba ya va Yimina; va Yixivhi, nyimba ya va Yixivhi; va Beriya, nyimba ya va Beriya.

⁴⁵ Vana va Beriya: va Hebere, nyimba ya va Hebere; va Malikiele, nyimba ya va Malikiele.

⁴⁶ Vito ra n'wana wa wanhwanyana wa Asere a a ri Seraka.

⁴⁷ Hi tona tinyimba ta vana va Asere, hi ntsengo wa tona: a va ri 53 400.

⁴⁸ Vana va Neftali hi tinyimba ta vona: va Yahasele, nyimba ya va Yahasele; va Guni, nyimba ya va Guni;

⁴⁹ va Yesere, nyimba ya va Yesere va Xileme, nyimba ya va Xileme.

⁵⁰ Hi tona tinyimba ta Neftali hi tindlu ta vona; lava hlayiweke va vona a va ri 45 400.

⁵¹ Hi wona ntsengo wa vana va Israele: a va ri vavanuna va 601 730.

⁵² Yehovha a byela Muxe, a ku:

⁵³ “Tiko ri ta avanyiseriwa vona lava; yi va ndzhaka ya vona hi ntsengo wa mavito.

⁵⁴ Eka lava taleke, u ta va nyika ndzhaka leyikulu; eka lava nga talangiki, u va nyika ndzhaka leyitsongo, un'wana ni un'wana u ta nyikiwa ndzhaka leyi ringanaka ntsengo wa yena.

⁵⁵ Ntsena tiko ri ta averiwa hi vuhlolotwana; va ta amukela ku averiwa ka vona hi mavito ya tinyimba ta vatata wa vona.

⁵⁶ Endzhaku yi ta avanyisiwa hi vuhlolotwana exikarhi ka lava teleke, ni le xikarhi ka lava nga talangiki.”

⁵⁷ Hi wona ntsengo wa Valevhi, hi tinyimba ta vona, va Gerixoni, nyimba ya va Gerixoni; va Kohata, nyimba ya va Kohata; va Merari, nyimba ya va Merari.

⁵⁸ Hi tona tinyimba ta Levhi: nyimba ya va Libini, ni nyimba ya va Hebroni, ni nyimba ya va Maheli, ni nyimba ya va Muxi, ni nyimba ya va Kora.

⁵⁹ Kohata a tswala Amirama; vito ra nsati wa Amirama a a ri Yokebedi, n'wana Levhi, la tswaleriweke Levhi eEgipta; kutani a velekela Amirama Aroni na Muxe, na Meriyamu, makwavo wa vona.

⁶⁰ Aroni a tswala Nadabu na Abihu, na Eliyazara na Itamara.

⁶¹ Nadabu na Abihu va file loko va humesela emahlweni ka Yehovha ndzilo wa xiri.

⁶² Ntsengo wa vona, a va ri 23 000, hinkwavo vavanuna, ku sungula hi va n'hweti yin'we, ni lava tlulaka hikuva a va nghenisiwanga entsengweni wa vana va Israele hikuva a va averiwangi ndzhaka exikarhi ka vana va Israele.

⁶³ Hi wona ntsengo wa vana va Israele lowu Muxe na Eliyazara, muprista, va wu hlayeke erivaleni ra Mowabu, ekusuhi na Yordani na Yeriko.

⁶⁴ Exikarhi ka vona lava, a ku vanga na un'we wa vana va Israele la hlayiweke hi Muxe na Aroni, muprista, emananga ya Sinayi.

⁶⁵ Hikuva Yehovha a a te henhla ka vona: Va ta fa emananga, kutani a ku vanga na un'we la hanyeke, loko a nga ri Kalebe, n'wana Yefune, na Yoxuwa, n'wana Nuni.