Tinhlayo 25 - Xitsonga (Bibele)Timhaka ta Baala-Peyori. 1 Israele a a tshamile Xitimi, kutani tiko ri sungula ku tinyiketa vuoswi ni vanhwanyana va Mowabu. 2 Va vitana tiko emagandzelweni ya swikwembu swa vona, kutani tiko ri dya, ri khinsama emahlweni ka swikwembu swa vona. 3 Israele a namarhela Baala-Peyori, kutani vukari bya Yehovha byi pfurhela Israele. 4 Kavaloko Yehovha a ku eka Muxe: “Vitana tihosi hinkwato ta tiko, u hayeka swidyohi emahlweni ka Yehovha emun'wini, kutani ku pfurha ka vukari bya Yehovha ku ta sukela Israele.” 5 Muxe a ku eka vaavanyisi va Israele: “Dlayani vanhu hinkwavo lava namarheleke Baala-Peyori.” 6 Kavaloko munhu wa vana Vaisraele a ta a tisa eka vamakwavo wansati wa Midiyani, Muxe, ni nhlengeletano hinkwayo ya vana va Israele va n'wi vona, loko va ri karhi va rila enyangweni ya tabernakela ya nhlengeletano. 7 Kuteloko Finiyasi, n'wana Eliyazara, n'wana Aroni, muprista, a vona sweswo, a suka enhlengeletanweni, a teke tlhari evokweni ra yena, 8 a landza munhu wa Israele entsongeni wa yena, kutani a va tlhava havambirhi makhwiri, yena Muisraele, na yena wansati loyi. Kutani ntungu wu hlela exikarhi ka vana va Israele. 9 Lava nga fa hi ntungu lowu a va ri vanhu va 24 000. 10 Kutani Yehovha a byela Muxe, a ku: 11 “Finiyasi, n'wana Eliyazara, n'wana Aroni, muprista, u susile vukari bya mina ehenhla ka vana va Israele, hikuva a a ri ni rilondzo ra mina exikarhi ka vona; kutani a ndzi lovisanga vana va Israele evukarini bya mina. 12 Hikwalaho u ta n'wi byela leswaku ndzi endla na yena ntwanano wa ku rhula, 13 wu ta va eka yena ni ka vatukulu va yena ntwanano wa vuprista lowu nga heriki, hikuva u hisekele Xikwembu xa yena, kutani u endlele vana va Israele mhamba.” 14 Vito ra wanuna wa Israele la dlayiweke ni wansati wa Midiyani, a a ri Zimri, n'wana Salu, hosi ya nyimba ya va Simiyoni. 15 Vito ra wansati wa Midiyani la dlayiweke, a a ri Kozibi, n'wana Suru, la nga hosi ya nyimba yin'wana ya va Midiyani. 16 Yehovha a byela Muxe, a ku: 17 “Hlayani Vamidiyani kukotisa valala va n'wina, mi va dlaya; 18 hikuva va mi endlile valala va vona hi ku mi rivata hi mano ya vona emhakeni ya Peyori, ni le mhakeni ya Kozibi n'wana hosi yin'wana ya Midiyani, a ri makwavo wa vona, la nga dlawa siku ra khombo leri nga humelela emhakeni ya Peyori.” |
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
Bible Society of South Africa