Tinhlayo 20 - Xitsonga (Bibele)

Ta ka fa ka Meriyamu.

¹ Nhlengeletano hinkwayo ya vana va Israele yi fika emananga ya Sini hi n'hweti yo sungula, kutani tiko ri gova eKadexe. Kutani Meriyamu a fa endhawini leyo, a lahliwa kona.

² Kambe a ku nga ri na mati ya ku nwa ya tiko; kutani va hlengeletana ku pfuka Muxe na Aroni.

³ Tiko ri karihela Muxe, ri ku: “Mawako loko ngi hi file ni vamakwerhu loko va fa emahlweni ka Yehovha!

⁴ Xana mi fambisele yini nhlengeletano ya Xikwembu emananga lawa hi ta fa kona, hina ni swifuwo swa hina?

⁵ Mi hi humesele yini eEgipta ku hi fikisa etikweni lero biha, laha ku nga byalekiki, ni laha ku nga riki na nkuwa ni vhinya ni girenada ni mati ya ku nwa?”

⁶ Kavaloko Muxe na Aroni va sukela nhlengeletano ku ya enyangweni ya tabernakela ya nhlengeletano; va wa hi mimombo ya vona kutani ku kwetsima ka Yehovha ku va humelela.

⁷ Yehovha a byela Muxe, a ku:

⁸ “Teka nhonga, u vitana nhlengeletano, u ri na Aroni makwenu, mi ta vulavula ni ribye emahlweni ka vona, kutani ri ta humesa mati ya rona; u ta va humesela mati eribyeni, u va u nwisa nhlengeletano ni swifuwo swa vona.”

⁹ Muxe a teka nhonga emahlweni ka Yehovha hilaha Yehovha a n'wi leriseke hakona.

¹⁰ Kutani Muxe na Aroni va vitana nhlengeletano emahlweni ka ribye, kutani Muxe a ku eka vona: “Yingisani, vakaneti! Xana hi ta mi humesela mati eribyeni leri xana?”

¹¹ Muxe a tlakusa voko, a ba ribye kambirhi hi nhonga ya yena. Kutani ku huma mati ya ku tala. Nhlengeletano yi nwa ni swifuwo swa yona.

Ta mati ya Meriba.

¹² Kambe Yehovha a ku eka Muxe na Aroni: “Leswi mi nga pfumelangiki eka mina ku ndzi hlawula emahlweni ka vana va Israele, mi nga ka mi nga nghenisi nhlengeletano leyi etikweni leri ndzi va nyikeke rona.”

¹³ Hi wona mati ya Meriba (ku kaneta), laha vana va Israele va nga kanetela Yehovha kona; kutani a tikwetsimisa eka vona.

¹⁴ Loko va ri eKadexe, Muxe a rhuma tintsumi eka hosi ya Edomu, a ku: “Israele, makwenu, u ri: Wa tiva mikarhalo hinkwayo leyi hi yi rhweleke.

¹⁵ Vatata wa hina va rhurhile eEgipta, kutani hi akile malembe ya ku tala eEgipta; kambe Vaegipta va hi xanisile, hina ni vatata wa hina.

¹⁶ Hi huwelele eka Yehovha, kutani u yingisile rito ra hina, a rhumile ntsumi, a hi humesa eEgipta. Sweswi hi le Kadexe, muti lowu nga endzilakaneni wa tiko ra wena.

¹⁷ Hi pfumelele ku tsemakanya tiko ra wena; hi nga ka hi nga tsemakanyi exikarhi ka masimu ni tivhinya, hi nga ka hi nga nwi mati ya swihlovo; hi ta famba hi gondzo, hi nga hambukeli etlhelweni ra xinene ni ra ximatsi, hi ko hi hundza emindzilekaneni ya wena.”

¹⁸ Edomu a ku eka yena: “U nga ka u nga hundzi eka rikwerhu; loko swi nga ri tano, ndzi ta huma, ndzi ya hlangana na wena hi fumu.”

¹⁹ Vana va Israele va ku eka yena: “Hi ta famba hi gondzo; kungakuloko mina ni mitlhambi ya mina hi nwa mati ya wena, ndzi ta hakela; a ku na mhaka yin'wana, u nga kanakani, ndzi ta hundza ntsena hi milenge.”

²⁰ Kambe Edomu a ku: “U nga ka u nga hundzi!” Kutani Edomu a huma ku ya hlangana na yena a ri ni tiko lerikulu leri hlomeke swinene.

²¹ Hi sweswo Edomu a arisa Israele ku tsemakanya tiko ra yena; kutani Israele a n'wi hambukela.

Ta ku fa ka Aroni.

²² Kutani nhlengeletano hinkwayo ya vana va Israele yi suka eKadexe, yi ya fika entshaveni ya Hori.

²³ Kavaloko Yehovha a byela Muxe na Aroni entshaveni ya Hori, endzilakaneni wa tiko ra Edomu a ku:

²⁴ “Aroni u ta fa, a ya eka varikwavo; hikuva a nga ka a nga ngheni etikweni leri ndzi ri nyikeke vana va Israele, hikuva mi landzurile marito ya mina ematini ya Meriba.

²⁵ U ta teka Aroni ni n'wana wa yena Eliyazara, u va khandziyisa entshaveni ya Hori.

²⁶ Kutani u ta hluvurisa Aroni tinguvu ta yena, u ti ambexa Eliyazara, n'wana wa yena. Kutani Aroni u ta fa kona, a ya eka varikwavo.”

²⁷ Muxe a endla hilaha Yehovha a leriseke hakona. Va khandziya entshaveni ya Hori, emahlweni ka nhlengeletano hinkwayo.

²⁸ Kutani Muxe a hluvurisa Aroni tinguvu ta yena, a ti ambexa Eliyazara, n'wana wa yena. Kutani Aroni a fa kwalaho enhlohlorhini ya ntshava. Kutani Muxe na Eliyazara va ngirimela entshaveni.

²⁹ Nhlengeletano hinkwayo yi vona leswaku Aroni a file, kutani yindlu ya Israele hinkwayo yi rilela Aroni hi masiku ya makume manharhu.