Tinhlayo 2 - Xitsonga (Bibele)

Ta milawu ya magovela ni ya ku famba.

¹ Yehovha a byela Muxe na Aroni, a ku:

² “Vana va Israele va ta gova un'wana ni un'wana ekusuhi ni mfungho wa yena, ni le hansi ka nceka wa tindlu ta vatata wa vona; va ta gova va langutene ni tabernakela ya nhlengeletano, va wu rhendzele hinkwako.

³ “Emahlweni, hitlhelo ra vuxa, ku ta tlhomiwa mfungho wa nxaxa wa Yuda hi mitlawa ya vona; hosi ya vana va Yuda, Nahaxoni n'wana Aminadaba, ni vandla ra yena,

⁴ ni vanhu va ntsengo wa yena va 74 600.

⁵ Lava nga ta gova etsheveni ra yena, i nyimba ya Isakara, hosi ya vana va Isakara, Netanele, n'wana Suwara, ni vandla ra yena,

⁶ ni vanhu va ntsengo wa yena va 54 400;

⁷ ni nyimba ya Zebuloni, hosi ya vana va Zebuloni, Eliyabu, n'wana Heloni ni vandla ra yena,

⁸ ni vanhu va ntsengo wa yena va 57 400.

⁹ Ntsengo hinkwawo wa vavanuna va mixaxa ya Yuda, va ri 186 400, hi mavandla ya vona; hi vona lava nga ta rhanga ku suka.

¹⁰ “Edzongeni, mfungho wa mixaxa ya Rhuveni hi mitlawa ya vona; hosi ya vana va Rhuveni, Elizuri, n'wana Xedewuru, ni vandla ra yena,

¹¹ ni vanhu va ntsengo wa yena va 46 500.

¹² Lava nga ta gova etsheveni ra yena, i nyimba ya Simiyoni; hosi ya vana va Simiyoni, Xelumiele, n'wana Suri-Xadayi, ni vandla ra yena,

¹³ ni vanhu va ntsengo wa yena va 59 300;

¹⁴ ni nyimba ya Gadi, hosi ya vana va Gadi, Eliyasafa, n'wana Duwele, ni vandla ra yena,

¹⁵ ni vanhu va ntsengo wa yena va 45 650.

¹⁶ Ntsengo hinkwawo wa vavanuna va mixaxa ya Rhuveni, va ri 151 450, hi mitlawa ya vona. Va ta suka va ri va vumbirhi.

¹⁷ “Kutani tabernakela ya nhlengeletano yi ta suka, nxaxa wa Valevhi wu va xikarhi ka mixaxa; va ta suka hilaha va govaka hakona; un'wana ni un'wana exivandleni xa yena, hi mifungho ya vona.

¹⁸ “Evupeladyambu, mfungho wa mixaxa ya Efrayimi hi mitlawa ya vona; hosi ya vana va Efrayimi, Elixama, n'wana Amihudi, ni vandla ra yena,

¹⁹ ni vanhu va ntsengo wa yena va 40 500.

²⁰ Ekusuhi na yena, nyimba ya Manase; hosi ya vana va Manase, Gamaliele, n'wana Pedasuru, ni vandla ra yena,

²¹ ni vanhu va ntsengo wa yena va 32 200;

²² ni nyimba ya Benjamini, hosi ya vana va Benjamini, Abidana, n'wana Gidiyoni, ni vandla ra yena,

²³ ni vanhu va ntsengo wa yena va 35 400.

²⁴ Ntsengo hinkwawo wa vavanuna va mixaxa ya Efrayimi, va ri 108 100, hi mitlawa ya vona. Va ta suka va ri va vunharhu.

²⁵ “En'walungwini, mfungho wa mixaxa ya Dani, hi mitlawa ya vona; hosi ya vana va Dani, Ahiezere, n'wana Amixadayi, ni vandla ra yena,

²⁶ ni vanhu va ntsengo wa yena va 62 700.

²⁷ Lava nga ta gova ekusuhi na vona, i nyimba ya Asere hosi ya vana va Asere, Pagiele, n'wana Okirani ni vandla ra yena,

²⁸ ni vanhu va ntsengo wa yena va 41 500;

²⁹ ni nyimba ya Neftali; hosi ya vana va Neftali, Ahira, n'wana Enana, ni vandla ra yena,

³⁰ ni vanhu va ntsengo wa yena va 53 400.

³¹ Ntsengo hinkwawo wa vavanuna va mixaxa ya Dani, va ri 157 600. Va ta suka va ri ve ndzhaku, hi mifungho ya vona.”

³² Hi vona vana va Israele lava tsariweke hi tinyimba ta vona. Ntsengo hinkwawo wa mixaxa hi mitlawa ya vona a va ri va 603 550.

³³ Kambe Valevhi a va hlayiwanga exikarhi ka vana va Israele, hikuva Yehovha a lerisile Muxe hi sweswo.

³⁴ Vana va Israele va endla hinkwaswo hilaha Yehovha a leriseke Muxe hakona. A va govisa sweswo hi mifungho ya vona, kambe a va suka hi mukhuva wolowo, un'wana ni un'wana hi yindlu ya yena ni nyimba ya yena.