Tinhlayo 12 - Xitsonga (Bibele)

Ta mahlevo ya Meriyamu na Aroni.

¹ Meriyamu na Aroni va hleva Muxe hikwalaho ka wansati wa Mukuxi loyi a n'wi tekeke, hikuva a a tekile wansati wa Mukuxi.

² Va ku: “Xana Yehovha u vulavurile ha Muxe ntsena? Xana a nga vuli nchumu ha hina xana?” Kutani Yehovha a swi yingisa.

³ Kambe wanuna loyi, Muxe, a a ri ni tintswalo swinene ku tlula munhu un'wana ni un'wana la nga emisaveni.

⁴ Kutani hi nomu lowu, Yehovha a ku eka Muxe ni ka Aroni ni ka Meriyamu: “Humani n'wina vanharhu, mi ya etabernakeleni ya nhlengeletano.” Kutani va huma ha vanharhu.

⁵ Yehovha a xika a ri epapeni, kutani a vitana Aroni na Meriyamu, kutani va huma havambirhi.

⁶ Kavaloko a ku: “Yingisani swinene marito ya mina! Loko muprofeta u kona exikarhi ka n'wina, mina Yehovha ndzi tikombisa ka yena hi mahlori, ndzi vulavula na yena enorhweni.

⁷ A hi swona na Muxe, nandza wa mina; u tshembekile endlwini ya mina hinkwayo;

⁸ ndzi vulavula na yena hi nomu, ndzi tikombisa eka yena kunene, ku nga ri hi xifaniso, kutani a vona xivumbeko lexinene xa Yehovha. A mi chavanga ha yini ku hleva nandza wa mina, Muxe xana?”

⁹ Kavaloko vukari bya Yehovha byi va pfurhela, kutani a suka, na rona papa ri sukela ehenhla ka tabernakela.

¹⁰ Kutani, maswivo, Meriyamu a hundzuka a basile hi nhlokonho leyi fanaka ni gamboko; yena Aroni, kakuloko a n'wi hundzukela, a n'wi vona a ri wa nhlokonho.

¹¹ Kavaloko Aroni a ku eka Muxe: “Hosi yanga, ndza ku khongela, u nga hi vekeli nandzu wa xidyoho lexi hi nga xi endla hi vuphukuphuku lebyi hi tilaveleke nandzu ha byona.

¹² Yo! A nga tshuki a kotisa n'wana wa rixixwa loyi i ngi nyama ya yena yi borile loko a hume ekhwirini ra mana wa yena!”

¹³ Kavaloko Muxe a huwelela eka Yehovha, a ku: “Yo! Xikwembu, ndza ku khongela, wanga n'wi hanyisa!”

¹⁴ Yehovha a ku eka Muxe: “Kungakuloko tata wa yena a n'wi tshwutele hi marhi emahlweni, xana a nga faneli ku va ni tingana hi masiku ya ntlhanu na mambirhi xana? U ta pfaleriwa masiku ya ntlhanu na mambirhi ehandle ka mixaxa, kutani a ta tlhela a amukeriwa kona.”

¹⁵ Kutani Meriyamu a pfaleriwa hi masiku ya ntlhanu na mambirhi ehandle ka mixaxa; kambe tiko a ri sukanga Meriyamu a ko a amukeriwa.

¹⁶ Endzhaku ka swona tiko ri suka eHaseroti, ri ya dzima mitsonga emananga ya Parani.