Timhaka 7 - Xitsonga (Bibele)

Ta ku hlamula ka Stefano.

¹ Kutani muprista lonkulu a ku: “Timhaka teto ti tano xana?”

² Stefano a hlamula a ku: “Vavanuna varikwerhu, na n'wina vatatana, ndzi yingiseni! “Xikwembu lexo kwetsima xi tikombisile eka tata wa hina, Abrahama, a ha ri eMesopotamiya, a nga si aka eHarana;

³ xi ku eka yena: ‘Suka etikweni ra rikwenu, ni ka vamakwenu, u ya etikweni leri ndzi nga ta ku kombisa rona.’

⁴ Kutani a suka etikweni ra Vakalediya, a ya aka eHarana. Kambe loko tata wa yena a file, Xikwembu xi n'wi rhurhisa, xi n'wi tisa etikweni leri mi akeke eka rona sweswi.

⁵ Kambe a xi n'wi hanga ndzhaka kona, hambi xi ri xivandlanyana lexi ringanaka ku kandziya hi nkondzo; ntsena xi n'wi tshembisile leswaku xi ta n'wi nyika rona, ri va rifuwo ra yena ni ra vatukulu va yena endzhaku ka yena; a wu ri nkarhi lowu a nga si va na n'wana.

⁶ Kutani Xikwembu xi n'wi byela, xi ku: ‘Vatukulu va wena va ta ya luvela etikweni ra xiri, va endliwa makhumbi, kutani va xanisiwa hi malembe ya mune wa madzana.

⁷ Kambe tiko leri ri va boheke, ndzi ta ri avanyisa, ku vula Xikwembu; kutani endzhaku ka swona va ta suka kona, va ta ndzi tirhela exivandleni xexi.’

⁸ Kutani xi n'wi nyika ntwanano wa ku yimba; kutani Abrahama a veleka Isaka a n'wi yimbisa hi siku ra ntlhanu na manharhu; Isaka a veleka Yakobo; Yakobo yena, a veleka vapatriarka va khume na vambirhi.

⁹ “Kutani vapatriarka va vondzoka Yosefa, va n'wi xavisa, a yisiwa eEgipta; kambe Xikwembu xi va na yena;

¹⁰ xi n'wi tshunxa emakhombyeni ya yena hinkwawo; xi n'wi nyika ku tsakisa ni ku tlhariha emahlweni ka Faro, hosi ya Egipta, kutani yona yi n'wi veka mufumi wa Egipta ni wa yindlu ya yona hinkwayo.

¹¹ “Kutani ku wa ndlala leyikulu etikweni hinkwaro ra Egipta, ni ra Kanana; khombo ri va lerikulukumba; vatata wa hina va ko va hluleka ni ku kuma swakudya.

¹² Kambe, kuteloko Yakobo a twa leswaku mavele ma ha ri kona Egipta, a rhuma kona vatata wa hina ro sungula.

¹³ Kutani ra vumbirhi, Yosefa a tiviwa hi vamakwavo; kambe Faro a tivisiwa rixaka ra Yosefa.

¹⁴ Kutani Yosefa a rhumela ku ya teka tata wa yena, ni va rixaka ra yena hinkwavo, va ri ntlhanu wa makume ni makume mambirhi na ntlhanu.

¹⁵ Kutani Yakobo a rhelela eEgipta, a fela kona, yena ni vatata wa hina.

¹⁶ Kambe mitsumbu ya vona yi yisiwa eXikeme, yi lahliwa esirheni ra Abrahama leri ingi a ri xavile hi mali eka vana va Hemori, tata wa Xikeme.

¹⁷ “Kambe, kuteloko ku tshinele nkarhi lowu Xikwembu xi nga ta humesa ku tshembisa loku xi ku hlambanyeleke Abrahama, tiko ri kula ni ku andza eEgipta;

¹⁸ ku kondza ku humelela hosi leyi nga tivangiki Yosefa.

¹⁹ Hosi leyi, yi endla mano eka rixaka ra hina, yi xanisa vatata wa hina, yi ko yi va cukumetisa vana va vona leswaku va nga ha tshami va hanya.

²⁰ “Enkarhini lowu, ku velekiwa Muxe; a va n'wana la sasekeke emahlweni ka Xikwembu; kutani a wundliwa hi tin'hweti tinharhu endlwini ya tata wa yena.

²¹ Kambe kuteloko a cukumetiwile, n'wana Faro wa xisati a n'wi rhola, a tikurisela yena, leswaku a va n'wana wa yena.

²² Kutani Muxe a dyondziswa vutlhari hinkwabyo bya Vaegipta; kutani a va munhu wa matimba emaritweni ni le mitirhweni.

²³ Kuteloko a kurile, a ri munhu wa malembe ya mune wa makume, a navela embilwini ya yena ku ya endzela vamakwavo, vana va Israele.

²⁴ Kutani a kuma un'wana wa vona a twisiwa ku vaviseka, a n'wi yimela, a rihisela loyi a xanisiwaka hi ku dlaya Muegipta.

²⁵ A anakanya leswaku vamakwavo va ta twisisa ha swona leswaku Xikwembu xi ta va ponisa hi voko ra yena; kambe a va twisisanga.

²⁶ Hi siku leri tlhandlamaka, a humelela eka van'wana lava lwaka, kutani a va khongotela hi ku va lamula, a ku: ‘Vavanuna, leswi mi nga va rixaka rin'we mi vaviselana yini?’

²⁷ Kambe loyi a endlaka warikwavo swo biha, a bakanya Muxe, a ku: ‘I mani la ku vekeke hosi ni muavanyisi wa hina xana?

²⁸ Xana u rhandza ku ndzi dlaya tanihi leswi u nga dlaya Muegipta tolo xana?’

²⁹ Hi nomu lowu, Muxe a baleka, a ya luvela etikweni ra Midiyani; kutani a tswala vana vambirhi kona.

³⁰ “Kuteloko ku hundzile malembe ya mune wa makume, ntsumi yi humelela eka yena emananga eNtshaveni ya Sinayi, elangavini ra ndzilo eswihlahleni.

³¹ Muxe, loko a vona mahlori lawa, a hlamala wona; kuteloko a tshinelele ku langutisisa, rito ra Hosi ri n'wi tela, ri ku:

³² ‘Hi mina Xikwembu xa vatata wa wena, Xikwembu xa Abrahama, ni xa Isaka, ni xa Yakobo.’ Kutani Muxe a khomiwa hi ku rhurhumela, a chava ni ku languta.

³³ Kutani Hosi yi ku eka yena: ‘Susa tintanghu emilengeni ya wena, hikuva xivandla lexi u yimeke eka xona, i misava leyi hlawuriweke.

³⁴ Ndzi vonisisile ku xaniseka ka tiko ra mina eEgipta, ni ku vovola ka vona, ndzi ku twile, kutani ndzi xikile ku va ponisa; tana sweswi, ndzi ta ku rhuma eEgipta.’

³⁵ “Muxe yeloyi va nga n'wi landzula, va ku: ‘I mani la ku vekeke hosi ni muavanyisi wa hina?’ Hi yena la nga rhumiwa hi Xikwembu leswaku a va hosi ni muntshunxi wa vona, hi matimba ya ntsumi leyi n'wi humeleleke exihlahleni.

³⁶ Hi yena la nga va humesa, a endla masingita ni swikombiso eEgipta, ni le Lwandle ro Tshwuka, ni le mananga, hi malembe ya mune wa makume.

³⁷ Wa ha ri Muxe loyi a nga te eka vana va Israele: ‘Xikwembu xi ta mi humesela muprofeta la fanaka na mina exikarhi ka vamakwenu, n'wi yingiseni.’

³⁸ Hi yena la nga yima enhlengeletanweni le mananga, kun'we ni ntsumi leyi nga vulavula na yena eNtshaveni ya Sinayi, a ri ni vakokwa wa hina; hi yena la amukeleke marito ya ku hanya ku hi nyika wona.

³⁹ “Kambe vatata wa hina va arile ku n'wi yingisa; va n'wi tsan'wa, kutani va tlhelela eEgipta hi timbilu ta vona, va ku eka Aroni:

⁴⁰ ‘Hi endlele swikwembu leswi hi rhangelaka emahlweni, hikuva Muxe loyi a nga hi humesa etikweni ra Egipta, a hi tivi leswi n'wi humeleleke.’

⁴¹ Emasikwini walawo va endla rhole; kutani va tlhavela xifaniso mhamba, va tsakela ntirho wa mavoko ya vona.

⁴² Hikwalaho Xikwembu xi va fularhela, xi va nyiketa eku gandzeleni ka mavandla ya tilo, hilaha ku tsariweke hakona ebukwini ya vaprofeta leswaku: ‘N'wina, yindlu ya Israele, xana mi ndzi humesele switlhavelo ni timhamba emananga hi malembe ya mune wa makume xana?

⁴³ Kambe mi rhwarile tabernakela ya Moloko, ni nyeleti ya xikwembu xa n'wina Rhomfani, swi nga swifaniso leswi mi nga swi endla ku swi khinsamela; hikwalaho ndzi ta mi rhurhisela emahlweni ka Babilona.’

⁴⁴ “Vatata wa hina a va ri ni tabernakela ya vumbhoni emananga, hilaha loyi a nga vulavula na Muxe ngi a n'wi lerisile ku yi endla hi xifaniso lexi a xi voneke.

⁴⁵ Kuteloko vatata wa hina va yi nyikiwile va ya nghena na yona emisaveni ya matiko lawa Xikwembu xi mahlongoriseke emahlweni ka vona, va ri na Yoxuwa; kutani yi tshama kona ku fikela emikarhini ya Davhida.

⁴⁶ Yena Davhida a kuma tintswalo emahlweni ka Xikwembu, kutani a kombela leswaku a lavela Xikwembu xa Yakobo tabernakela.

⁴⁷ Kambe hi yena Solomoni la nga xi akela yindlu.

⁴⁸ Ntsena, La nge henhlahenhla, a nga ka a nga aki etitempeleni leti endliweke hi mavoko ya vanhu; hilaha muprofeta a vuleke loko a te:

⁴⁹ ‘Tilo i xiluvelo xa nga, yona misava i vunavelo bya milenge ya mina; yindlu leyi mi nga ndzi akelaka yona yi nga va leyo yini, ku vula Hosi? Ni xivandla lexi ndzi nga wisaka eka xona, xi nga va xihi?

⁵⁰ Xana voko ra mina a hi rona leri endleke swilo leswo hinkwaswo xana?’

⁵¹ “N'wina va tinhamu le to nonon'hwa, mi nga yimbisiki timbilu ni tindleve! Mi alela Moya lowo Kwetsima hi masiku, mi kotisa vatata wa n'wina!

⁵² Hi wihi muprofeta loyi vatata wa n'wina va nga n'wi xanisangiki? Va dlele ni lava vuleke eku sunguleni ku ta eka loyi a lulameke, loyi sweswi, mi n'wi xengeke, kutani mi hundzukile vadlayi va yena;

⁵³ n'wina mi amukeleke nawu hi mavoko ya tintsumi, kambe a mi wu hlayisanga!”

Ta ku khandliwa ka Stefano hi maribye.

⁵⁴ Kuteloko va twile timhaka teto, va kariha ngopfu etimbilwini ta vona; kutani va n'wi getsenyela meno.

⁵⁵ Kambe Stefano a tala hi Moya lowo Kwetsima, kutani a langutisisa etilweni, a vona ku kwetsima ka Xikwembu, na Yesu a yime evokweni ra xinene ra Xikwembu.

⁵⁶ Kutani a ku: “Maswivo, ndzi vona tilo ri pfulekile; ni N'wana wa Munhu u yimile evokweni ra xinene ra Xikwembu.”

⁵⁷ Kutani va tlakusa marito, va ba huwa, va tisiva tindleve, kutani va wela hinkwavo swin'we ehenhla ka yena.

⁵⁸ Kuteloko va n'wi cukumetile ehandle ka muti, va n'wi khandla hi maribye; timbhoni a ti vekile tinguvu ta tona emilengeni ya jaha leri va nge i Sawulo.

⁵⁹ Kakuloko va ri karhi va n'wi khandla, Stefano a khongela, a ku: “Hosi Yesu, amukela moya wa mina!”

⁶⁰ Kutani a khinsama, a huwelela hi rito lerikulu, a ku: “Hosi u nga va hlayeli ku dyoha loku.” Kuteloko a vurile sweswo, a tietlelela.