Timhaka 24 - Xitsonga (Bibele)

Ta ku hehliwa ka Pawulo emahlweni ka Felikisi.

¹ Masiku ya ntlhanu, loko ma hundzile, ku ta Ananiya, muprista lonkulu, a ri ni vakulukumba van'wana ni muvulavuri un'wana loyi va nge i Tertulo; kutani va ya eka hosi ku hehla Pawulo.

² Kuteloko va n'wi vitanile, Tertulo a sungula ku n'wi hehla, a ku:

³ “Oho Felikisi wa mafundza! Hi nga ka hi nga tshiki ku anakanya hi ku khensa, hilaha hi nga ni ku rhula lokukulu, ni ku kateka loku nga humelela tiko leri hi ku fuma ka wena ni vutlhari bya wena.

⁴ Kambe leswaku ndzi nga tshuki ndzi ku hlwerisa, ndza ku khongela, ndzi ku: Wa nga hi yingisa hi vunene bya wena, ku nga ri kungani.

⁵ Hi kumile munhu loyi, a nga ntungu, u pfuxe madzolonga exikarhi ka Vayuda hinkwavo, lava akeke emisaveni hinkwayo; i nhloko ya dyondzo leyi hambukeke ya Vanazarene.

⁶ Na swona u ringetile ku nyamisa tempele. Hikwalaho hi n'wi khomeke, kutani a hi rhandza ku n'wi avanyisa hi nawu wa hina;

⁷ kambe Lisiya, ndhuna leyikulu, a humelela, a hi vutlela yena hi matimba lamakulu,

⁸ kutani a lerisa vahehli va yena ku ta emahlweni ka wena. Na wena, loko u n'wi vutisisa, u nga kuma timhaka hinkwato leti hi n'wi hehlaka ha tona.”

Ta Pawulo loko a tiangulela emahlweni ka Felikisi.

⁹ Kutani Vayuda va n'wi seketela va ku: “Kunene swi tano.”

¹⁰ Pawulo, kuteloko hosi yi n'wi kowetile leswaku a vulavula, a hlamula, a ku: “Leswi ndzi tivaka leswaku swi ni malembe u fuma tiko leri, ndzi tihlamulela hi ku tshemba loku tlurisaka.

¹¹ U nga swi vona leswaku a ku si hundza masiku ya khume na mambirhi ndzi fikile eYerusalema, ku ta khongela kona.

¹² Kambe a va ndzi kumanga ndzi hlamulana na munhu etempeleni, hambi ku ri ku kukureta vanhu emasinagogeni ni le mutini.

¹³ Kutani va nga hluleka ku tiyisa hi ku kombisa timhaka leti va ndzi hehlaka ha tona sweswi.

¹⁴ Kunene ndzi nga tivula eka wena leswaku, loko yi ri dyondzo leyi va nge hi leyi hambukeke; ndzi tirhela Xikwembu xa vatatana ha yona, ndzi ri karhi ndzi pfumela timhaka hinkwato ta nawu ni leti tsariweke evaprofeteni.

¹⁵ Ndzi ni ku tshemba eka Xikwembu, loku na vona va nga na kona, leswaku ku pfuka ka vafi ku ta va kona eka lavo lulama ni ka lava nga lulamangiki.

¹⁶ Hikwalaho ndzi tiyisaka hi matimba hi masiku hinkwawo leswaku ndzi va ni ripfalo leri nga ndzi soriki emahlweni ka Xikwembu ni vanhu.

¹⁷ “Kutani ndzhaku ka malembe layo tala, ndzi tile ku ta neha swo nyika eka tiko ra rikwerhu, ni ku humesa timhamba.

¹⁸ Hikwalaho Vayuda van'wana va Asiya va ndzi kumeke etempeleni ndzi tibasisile, ku nga ri hi ku pfuxa vanhu, hambi ku ri ku endla huwa.

¹⁹ Ingi va ri vona va teke ku ta ndzi hehla emahlweni ka wena, loko ngi va ri ni mhaka na mina.

²⁰ Na vona volavo, a va vule loko va kumile ku homboloka kun'wana eka mina siku ndzi yimeke ehubyeni;

²¹ loko swi nga ri leswaku va nga vula rito leri, ri ri rin'we, lero ndzi nga ri vula hi matimba, ndzi yimile exikarhi ka vona, ndzi ku: ‘Namuntlha, ndzi avanyisiwa hi n'wina hikwalaho ka ku pfuka ka vafi.’ ”

Ta Pawulo loko a tlherisiwa ekhotsweni.

²² Felikisi, hi ku tiva ngopfunyana swa dyondzo yoleyo, a va tlherisa, a ku: “Kutakuloko Lisiya, ndhuna leyikulu a fikile, hi kona ndzi nga ta mi avanyisela.”

²³ Kutani a lerisa ndhuna ya dzana leswaku Pawulo a hlayisiwa, kambe ku va hi ku n'wi hlayisa, ku nga tshuki ku aleriwa munhu wa varikwavo ku n'wi tirhela.

²⁴ Loko ku hundzile masiku ma nga ri mangani, Felikisi a ta a ri na Drusila nsati wa yena, a nga Muyuda; kutani kuteloko a vitile Pawulo, a n'wi yingisela loko a vula ta ku pfumela eka Kriste.

²⁵ Kakuloko a vula ku lulama ni ku tikhoma, ni ku avanyisiwa loku nga ta ta, Felikisi a khomiwa hi ku chava, kutani a hlamula, a ku: “U nga tifambela sweswi; siku ndzi kumaka nkarhi ndzi ta tlhela ndzi ku vitana.”

²⁶ Kambe tlhelo rin'wana, a a tshemba leswaku Pawulo u ta n'wi nyika mali; hikwalaho a nga n'wi vita hakanyingi ku vulavula na yena.

²⁷ Kambe loko ku hundzile malembe mambirhi, Porkiyo Festo a vekiwa ematshan'weni ya Felikisi; kutani Felikisi a siya Pawulo ekhotsweni, hikuva a a rhandzile ku khensiwa hi Vayuda.