Timhaka 13 - Xitsonga (Bibele)

Ta ku rhumiwa ka Pawulo na Barnaba, va ya dyondzisa eKipra.

¹ Vaprofeta ni vafundhisi van'wana a va ri ekerekeni leyi nga eAntiyoka; a a ri Barnaba, na Simoni la thyiweke Nigere, na Lukiyo wa Kirene na Manaheme la nga kurisiwa swin'we ni tetrarka Heroda, na Sawulo.

² Kakuloko va ri karhi va tirha ntirho wa Hosi, va titsona swakudya, Moya lowo Kwetsima wu ku: “Ndzi hlawuleleni Barnaba na Sawulo, va ya entirhweni lowu ndzi va vitaneleke wona.”

³ Kutani loko va titsonile swakudya, va khongela, va va tlhandleka mavoko, va va rhuma.

⁴ Vona-ke, loko va rhumiwile hi Moya lowo Kwetsima, va ngirimela eSelukiya, va nghena ebyatsweni, va pelela eKipra.

⁵ Loko va fike eSalami, va vula rito ra Xikwembu emasinagogeni ya Vayuda. A va ri na Yohane, mupfuni wa vona.

⁶ Kuteloko va tsemakanyile xihlale ku ya fika ePafo, va kuma mungoma un'wana, muprofeta wa ku hemba, wa Muyuda, vito ra yena a a ri Bariyesu,

⁷ a a ri ni hosana Sergiyo Pawulo wanuna la tlhariheke. Kutani yena, loko a vitanile Barnaba na Sawulo, a navela ku twa rito ra Xikwembu.

⁸ Kambe Elima (hileswaku mungoma, loko vito ra yena ri hlamuseriwa) a ala ka vona, a ringeta ku hambukisa ndhuna eku pfumeleni.

⁹ Kambe Sawulo, loyi va n'wi thyeke Pawulo, a tala Moya lowo Kwetsima, kutani a n'wi honolela mahlo, a ku:

¹⁰ “Wena loyi u teleke ku xisa hinkwako, ni ku hemba hinkwako, n'wana Diyavulosi, nala wa hinkwaswo leswi lulameke, xana u ta tshika rini ku homboloxa tindlela ta Hosi leti lulameke xana?

¹¹ Vona sweswi, voko ra Hosi ri le henhla ka wena, u ta fa mahlo, u nga ha voni dyambu nkarhinyana.” Hi nomu lowu, ntima ni munyama swi n'wi wela ehenhla; kutani a gudlagudla, a lava loyi a nga n'wi fambisaka hi voko.

¹² Ndhuna, kuteloko yi vona leswi humeleleke, yi pfumela, yi hlamarisiwile hi dyondzo ya Hosi.

Ta ku dyondzisa ePerge wa Pamfiliya, ni le Antiyoka wa Pisidiya.

¹³ Pawulo ni lava ingi va ri na yena, kuteloko va sukile ePafo, va kongoma ePerge, muti wa Pamfiliya.

¹⁴ Kambe Yohane a avana na vona, a tlhelela eYerusalema. Loko va ri vona, va suka ePerge, va ya eAntiyoka wa Pisidiya; kutani va nghena esinagogeni hi siku ra Savata, va tshamisa.

¹⁵ Kuteloko ku hlayiwile mapapila ya nawu ni ya vaprofeta, tihosana ta sinagoga ti rhuma eka vona ti ku: “Vavanuna varikwerhu, loko ri ri kona eka n'wina rito ra ku khongotela vanhu, mi nga vulavula.”

¹⁶ Kwalaho Pawulo a yima; kuteloko a va kwehletile hi voko leswaku va miyela, a ku: “Vavanuna va Israele na n'wina lava chavaka Xikwembu, yingisani.

¹⁷ Xikwembu xa tiko leri ra Israele xi tihlawulele vatata wa hina, kutani xi kurisile ngopfu tiko leri loko va ha akile emisaveni ya Egipta, xi ko xi va humesa kona hi voko ra matimba.

¹⁸ Kutani emananga xi va endlela hi tintswalo hi malembe ya mune wa makume.

¹⁹ Kuteloko xi herisile matiko ya ntlhanu na mambirhi etikweni ra Kanana, xi va avela tiko hi ku bvumbha hi nhlolo.

²⁰ Endzhaku ka swona, xi va nyika vaavanyisi, hi malembe lama lavaka ku va mune wa madzana na ntlhanu wa makume, ku yisa eka muprofeta Samiele.

²¹ Endzhaku ka swona va kombela hosi; kutani Xikwembu xi va nyika Sawulo, n'wana Kixi, wanuna wa rixaka ra Benjamini; kutani yena a fuma hi malembe ya mune wa makume.

²² Kuteloko Xikwembu xi n'wi susile, xi va humesela Davhida, leswaku a va hosi ya vona, loyi xi n'wi vuleke xi ku: ‘Ndzi kumile Davhida n'wana Yese, munhu la nga wa mbilu ya mina la nga ta endla hinkwaswo leswi ndzi swi rhandzaka!’

²³ Erixakeni ra yena, Xikwembu xi humesele Israele muponisi, a nga Yesu, hilaha xi tshembiseke hakona.

²⁴ Kambe loko a nga si humelela, Yohane a a dyondzisile tiko ra Israele hinkwaro ku khuvuriwa ka ku hundzuka.

²⁵ Kutani Yohane, kakuloko a heta ntirho wa yena, a ku: ‘Mi anakanya leswaku ndzi mani? A ndzi yena Kriste, kambe wa ta endzhaku ka mina, loyi ndzi nga faneriki ku tshunxa tintanghu emilengeni ya yena.’

²⁶ “Vavanuna varikwerhu, va rixaka ra Abrahama, ni lava nga exikarhi ka n'wina lava chavaka Xikwembu, rito ra ku ponisa loku, ri rhumeriwile n'wina.

²⁷ Hikuva lava akeke eYerusalema, ni vakulukumba va vona, leswi va nga tivangiki Yesu, va n'wi avanyisile va hetisisa sweswo marito ya vaprofeta lama hlayiwaka hi Savata rin'wana ni rin'wana.

²⁸ Kutani hambi va nga kumanga nchumu eka yena lexi fanekeleke hi rifu, va kombele eka Pilato leswaku a dlawa.

²⁹ Kuteloko va hetile timhaka hinkwato leti tsariweke ehenhla ka yena, va n'wi hawula emhandzeni va n'wi nghenisa esirheni.

³⁰ Kambe Xikwembu xi n'wi pfuxile eku feni,

³¹ kutani u voniwile hi masiku layo tala hi lava nga suka eGaleliya va ta eYerusalema na yena, valavo va nga timbhoni ta yena exikarhi ka tiko.

³² “Na hina, ha mi tivisa Evhangeli ya xitshembiso lexi vatata va hina va tshembisiweke xona; hikuva Xikwembu xi xi hetisele eka hina,

³³ vana va vona, hi ku pfuxa Yesu; hilaha ku tsariweke hakona ePisalemeni ya vumbirhi leswaku: ‘U n'wananga, ndzi ku velekile namuntlha.’

³⁴ Kutani xikombiso xa leswaku xi n'wi pfuxile eku feni, leswaku a nga ha tlheleri eku boleni, Xikwembu xi vurisile sweswo, xi ku: ‘Ndzi ta mi nyika leswo kwetsima swa Davhida, leswi tiyeke.’

³⁵ Ni kun'wana ku vuriwile leswaku: ‘U nga ka u nga pfumeri leswaku Mukwetsimi wa wena a vona ku bola.’

³⁶ Kasi loko a ri Davhida, kuteloko a hetile ntirho enkarhini wa yena lowu rhandziwaka hi Xikwembu, a tietlelela, a lahliwa eka vatata wa yena, kutani a va a bola.

³⁷ Kambe loyi Xikwembu xi n'wi pfuxeke, a nga vonanga ku bola.

³⁸ “Vavanuna varikwerhu, swi tiveni hikwalaho, leswaku mi byeriwa ha yena ntsena ku rivaleriwa ka swidyoho,

³⁹ ni leswaku un'wana ni un'wana la pfumelaka eka yena, u khanisiwa eka swilo hinkwaswo leswi a nga hluleka ku khanisiwa hi nawu wa Muxe.

⁴⁰ Tivoneleni hikwalaho, leswaku kumbe lexi vuriweke hi vaprofeta xi nga mi humelela, leswaku:

⁴¹ ‘Vonani n'wina vasori, hlamalani, mi va mi lova, hikuva ndzi ta tirha ntirho emikarhini ya n'wina, ntirho lowu mi nga ka mi nga wu pfumeri, hambi un'wana a mi byela wona.’ ”

Ta ku pfumela ka vamatiko, ku nga ri Vayuda.

⁴² Kakuloko va huma esinagogeni, va va khongela leswaku hi Savata leyi taka, va ta va dyondzisa kambe timhaka teto.

⁴³ Kuteloko nhlengeletano yi hangalakile, Vayuda lavo tala, ni vaproselita lava tirhelaka Xikwembu, va landzela Pawulo na Barnaba; valavo loko va vulavula na vona, va va khongotela ku tiyisela etintswalweni ta Xikwembu.

⁴⁴ Hi Savata leyi tlhandlamaka, muti wu lava ku tsombana hinkwawo ku yingisa timhaka ta Xikwembu.

⁴⁵ Kambe Vayuda, loko va vona vunyingi, va tala hi mavondzo, kutani va kaneta leswi vuriwaka hi Pawulo; va ri karhi va kaneta ni ku sandza.

⁴⁶ Kutani Pawulo na Barnaba va va byela, va tiyisa, va ku: “A swi fanela leswaku rito ra Xikwembu ri byeriwa n'wina eku sunguleni; kambe leswi mi ri alaka, mi tiavanyisile lava nga fanekelangiki hi vutomi lebyi nga heriki, maswivo, hi hundzukela eka vamatiko.

⁴⁷ Hikuva Hosi yi hi lerisile sweswo hi rito leri nge: ‘Ndzi ku vekile ku vonakala ka matiko leswaku u va ku ponisa ka vona, ku yisa emakun'wini ya misava.’ ”

⁴⁸ Kutani vamatiko, loko va twa sweswo, va tsaka, va dzunisa rito ra Hosi; kutani hinkwavo lava hlawuleriweke vutomi lebyi nga heriki, va pfumela.

⁴⁹ Kutani rito ra Hosi ri hangalaka etikweni hinkwaro.

⁵⁰ Kambe Vayuda va hlohlotela vavasati lava chaviwaka, lava gandzelaka Xikwembu, ni vakulukumba va muti, kutani va pfuxela Pawulo na Barnaba ku xaniseka, kutani va va hlongola etikweni ra vona.

⁵¹ Kambe vona va va phumunhela ntshuri wa milenge ya vona, kutani va ya eIkoniya.

⁵² Loko va ri vadyondzisiwa, a va tala hi ku tsaka ni Moya lowo Kwetsima.