Swivuriso 8 - Xitsonga (Bibele)

¹ Vutlhari a byi huweleri xana? Ni ku anakanya a ku tlakusi rito ra kona xana?

² Byi yimile eswitsungeni, ni le tindleleni, Ni le mitsendzeleni;

³ Byi huwelela etinyangweni, ni le tihubyeni, Ni le mindyangwini, byi ku:

⁴ “Yahe! Vakulukumba, ndzi vitana n'wina, Rito ra mina ri lava na n'wina, vana va vanhu.

⁵ N'wina, varivali, dyondzani mano; Na n'wina, vahunguki, mi lava ku twisisa.

⁶ Yingiselani hikuva ndzi ta vula leswikulu, Nomu wa mina wu ta vulavula leswo lulama.

⁷ Hikuva ririmi ra mina ri ta vula leswi tiyeke, Kutani leswo biha i manyala enon'wini wa mina.

⁸ Ku vulavula hinkwako ka nomu wa mina ku lulamile, Eka wona, ku hava ku xisa ni ku hambuka;

⁹ Hinkwaswo swa twakala eka munhu la nga ni ku anakanya, Swi lulamile eka lava kumaka vutivi.

¹⁰ Amukelani dyondzo ya mina leyi tlulaka silivhere, Ni vutivi lebyi tlulaka nsuku lowo saseka.

¹¹ Hikuva vutlhari byi tlula tiperela, Hinkwaswo leswi tsakisaka swi nga ka swi nga xaxameri na byona.

¹² Mina, vutlhari, ndzi akile ni mano, Ndzi kumile vutivi bya mianakanyo ya ku tlhariha.

¹³ Ku chava Xikwembu i ku venga swo biha; Ndzi venga manyunyu, ni ku tidzunisa, ni ku famba loko biha, Ni nomu wo homboloka.

¹⁴ Ku tsundzuxa ni ku kateka i swa mina, Na wona mano, ni matimba i swa mina.

¹⁵ Ha mina tihosi ta fuma, Ni tihosana ti lerisa hi ku lulama.

¹⁶ Vafumi va fuma ha mina, Swi tano ni vakulukumba ni vaavanyisi hinkwavo va misava.

¹⁷ Ndzi rhandza lava ndzi rhandzaka, Lava ndzi lavaka, va ta ndzi kuma.

¹⁸ Rifuwo ni ku twala swi le ka mina, Rifuwo ra xiviri ni ku lulama.

¹⁹ Mbhandzu wa mina wu tlula nsuku, hambi wu ri nsuku wo saseka. Leswi tshoveriwaka eka mina swi tlula silivhere.

²⁰ Ndzi famba endleleni yo lulama, Ni le mitileni leyinene.

²¹ Ndzi nyika lava ndzi rhandzaka ndzhaka leyi tiyeke, Ndzi tata vuhlayiselo bya vona.

²² “Yehovha u ndzi vekile xirhangana xa ndlela ya yena, Ndzi rhangele mitirho ya yena ya khalekhale.

²³ Ndzi vekiwile vuhosi mikarhi yi nga si sungula, Ni misava yi nga si va kona.

²⁴ Ndzi velekiwile, malwandle ma nga si va kona, Ni swihlovo leswi pfelelaka mati layo tala.

²⁵ Ndzi tswariwile tintshava ti nga si tumbuluka, Ni timbala ti nga si humelela.

²⁶ Yehovha a nga si endla misava ni matiko, Ni masungulo ya ntshuri wa misava.

²⁷ Siku a lunghisaka matilo, a ndzi ri kona; Siku a tsalaka xirhendzevutana exibakabakeni.

²⁸ Siku a tlhomaka mapapa ya le henhla, Siku swihlovo swa swidziva swi humaka hi matimba.

²⁹ Ni siku a lerisaka lwandle ndzilakana wa rona, Mati ya rona ma nga tluli ribuwu, Ni siku a anakanyaka masungulo ya misava,

³⁰ A ndzi ri mutatisi wa yena, A ndzi n'wi tsakisa hi masiku,

³¹ Ndzi tsakela mombo wa yena, Ndzi tsakela ni vana va vanhu.

³² “Sweswi, vana vanga, ndzi yingiseni, Ku katekile lava yaka hi tindlela ta mina!

³³ Yingisani dyondzo, mi ta tlhariha, Mi nga yi cukumeti.

³⁴ Ku katekile munhu la ndzi yingisaka, La langutaka nyangwa ya mina hi masiku, La hanyaka emarimbeni ya nyangwa ya mina.

³⁵ Hikuva la ndzi kumaka u kumile vutomi, U kumile tintswalo ta Yehovha.

³⁶ Kambe la ndzi dyohelaka u onha moya wa yena. Hinkwavo lava ndzi vengaka va rhandza rifu.”