Swivuriso 7 - Xitsonga (Bibele)

¹ N'wananga, hlayisa marito ya mina, U tiyisa ku lerisa ka mina embilwini ya wena.

² U yingisa milawu ya mina, u ta hanya; Xiya dyondzo ya mina kukotisa swivono swa mahlo ya wena,

³ U yi tsondzela etintihweni ta wena, U yi tsala eribyeni ra mbilu ya wena.

⁴ Byela vutlhari, u ku: “U makwerhu,” Ku twisisa, u ku vula nakuloni,

⁵ Swi ta ku hambuxa ni nsati wa mbiri, Ni nghwavavana ya ririmi ra ku xisa.

⁶ A ndzi yimile efasitereni ra yindlu ya mina, Ndzi languta hi tinhi ta rona.

⁷ Ndzi vona exikarhi ka swihunguki, Ndzi vonisisa exikarhi ka lavantshwa, jaha rin'wana leri pfumalaka ku twisisa;

⁸ A hundza entsendzeleni ekusuhi ni vutshamo bya nsati loyi, A khoma ndlela ya yindlu ya yena:

⁹ Loko ku sungula ku phuma, ri va ri perile, Ni vusiku byi endle munyama.

¹⁰ A hlanganisiwa hi wansati La bombeke hi mikhuva ya tinghwavavana, kasi u ni mbilu yo kanganyisa,

¹¹ U ni pongo, i wa nhloko yo nonon'hwa, Milenge ya yena a yi tshami endlwini ya yena;

¹² Kumbe a yima emitsendzeleni, kumbe erivaleni, A etlelela emakhumbini hinkwawo.

¹³ A n'wi khoma, a n'wi ntswontswa, A nga ri na tingana emahlweni ka yena, a ku:

¹⁴ “Ndzi ni nkhuvo wa magandzelo ya ndzalo, Namuntlha ndzi hetisile ku hlambanya ka mina;

¹⁵ Hikwalaho ndzi humeke ndzi ta hlangana na wena, Ku ku lava exihundleni, kutani ndzi ku kumile.

¹⁶ Ndzi andlele masangu ya mina hi malwandla, Ni tinguvu leti lukiweke hi ntsembyana wa Egipta.

¹⁷ Ndzi nun'hwerisile masangu hi murhi wa mirha, Ni mhangana ni sinamoni.

¹⁸ Tana hi tipyopyisa erirhandzwini byi ko byi xa; Hi tsakela ku nandziha swin'we;

¹⁹ Hikuva nuna wa mina a nga kona, U fambile ekule;

²⁰ U tekile nkwama wa mali, U ta vuya hi n'hweti leyi taka.”

²¹ A tingatinga hi marito yo tala, A n'wi hlula hi mano ya milomu ya yena.

²² Kutani jaha rero ri n'wi landzelela Kukota homu loko yi ya eku tlhaviweni, Ku kotisa xihunguki lexi yaka eku biweni,

²³ Xi ko xi tlhaviwa xivindzi hi nseve, Ku kotisa nyanyana leyi hatlisaka ku wela entlhan'wini, Yi nga tivi leswaku wu ta lovisa vutomi bya yona.

²⁴ Hikwalaho, vana vanga, ndzi yingiseni, Mi yingisa marito ya nomu wa mina.

²⁵ Mbilu ya wena yi nga hambukeli endleleni ya yeloyi, U nga lahleki emitileni ya yena.

²⁶ Hikuva lava tlhaviweke u va wisile lavo tala, Lava a va dlayeke a ti ri tinhenha leto tala.

²⁷ Yindlu ya yena i ndlela ya xivandla xa vafi, Leyi xikelaka eswidziveni swa rifu.