Swivuriso 31 - Xitsonga (Bibele)

¹ Marito ya hosi Lemuwele. Ku khongotela loku mana wa yena a n'wi dyondziseke kona:

² “Swi lo yini, n'wananga? Swi lo yini, n'wana wa khwiri ra mina? Oho! Ndzi to yini, n'wana wa khwiri ra mina?

³ U nga nyiki vavasati matimba ya wena, U nga landzeleli lava lovisaka tihosi.

⁴ A hi tihosi, wena Lemuwele, A hi tihosi leti lulameleke ku nwa vhinyo, Hambi ti ri tihosana, eku navela byalwa lebyi pyopyisaka;

⁵ Loko va nwile va nga ta rivala milawu, Va hoxela timhaka ta hinkwavo lava nga ekhombyeni.

⁶ Nyikani byalwa eka munhu loyi a faka, Ni vhinyo eka munhu wa mbilu ya nhlomulo,

⁷ Leswaku a nwa, a rivala vusiwana bya yena, A nga ta tshama a anakanya makhombo ya yena.

⁸ Nomu wa wena wu ahlamisela timbheveve, U yimela timhaka ta hinkwavo lava tshikiweke.

⁹ Ahlamisa nomu, u avanyisa hi ku lulama, U yingisa timhaka ta lowa khombo ni xisiwana.”

¹⁰ Wansati wa matimba, i mani la nga ta n'wi kuma? U tlula kule nxavo wa risima wa tidayimani.

¹¹ Mbilu ya nuna wa yena ya n'wi tshemba, A nga ka a nga pfumari ndzalo.

¹² A n'wi endla swinene, swi nga ri swo biha, Hi masiku hinkwawo ya ku hanya ka yena.

¹³ A lava voya bya tinyimpfu ni ntsembyana, A tirha hi mavoko ya ku tsaka.

¹⁴ U fana ni byatso bya muxavi, U lava swakudya swa yena ekule.

¹⁵ U pfuka bya ha ri vusiku, U avela va yindlu ya yena swakudya, Ni malandza ya yena mitirho.

¹⁶ U anakanya nsimu, a ya xava; Hi leswi a swi kumeke, u byala nsimu ya vhinya.

¹⁷ U tiboha xifungha hi matimba, U tiyisa mavoko ya yena.

¹⁸ U tsakela ku bindzula ka yena; Nivusiku, rivoningo ra yena a ri timeki.

¹⁹ Mavoko ya yena ma tamela nhonga ya ku luka, Ni tintiho ta yena nhonga ya ku swula.

²⁰ U pfulela vapfumari voko ra yena; U ri tshambulutela loyi a pfumalaka.

²¹ A nga chavi gamboko hikwalaho ka va yindlu ya yena. Hikuva va yindlu ya yena hinkwavo va funengele tinguvu ta crimson.

²² U tilukela masangu yo saseka, Swiambalo swa yena i ntsembyana ni xivunguvungu.

²³ Nuna wa yena u tiviwa ehubyeni ya muti, Loko a tshamile exikarhi ka vavanuna lavakulu va tiko.

²⁴ Nsati u endla tinguvu, a xavisa, Ni mavamba, a xavisa eka vaxavi.

²⁵ Matimba ni xichavo, i xifunengelo xa yena; U hleka siku ra mundzuku.

²⁶ U ahlamisa nomu wa yena hi vutlhari, Milawu ya vunene yi le ririmini ra yena.

²⁷ U risa yindlu ya yena, A nga dyi vuswa bya vulolo.

²⁸ Vana va yena va pfuka va n'wi vula mukateki; Nuna wa yena wa n'wi dzunisa:

²⁹ A ku: “Vana lavo tala va xisati a ti ri tinhenha, Kambe wena u va tlula hinkwavo.”

³⁰ Ku saseka ka kanganyisa, vumbhurhi i vusinge! Wansati la chavaka Yehovha hi yena la nga ta dzunisiwa.

³¹ N'wi nyikeni mihandzu ya mavoko ya yena, Mitirho ya yena yi n'wi dzunisa etihubyeni ta muti.