Swivuriso 30 - Xitsonga (Bibele)

¹ Marito ya Aguri, n'wana Yake. Timhaka leti dyondzisiweke hi wanuna yeloyi, a byela Itiele na Ukala.

² Kunene ndzi hungukile ku tlula hinkwavo, A ndzi na ku twisisa ka vanhu;

³ Hikuva a ndzi dyondzanga vutlhari, A ndzi na ku tiva ka vakwetsimi.

⁴ I mani la tlhandlukeleke etilweni a tlhela a xikela kona? I mani la fumbarheleke mheho hi swandla swa yena? La hlengeleteke mati hinkwawo engubyeni ya yena, i mani xana? I mani loyi a tumbuluxeke matlhelo hinkwawo ya misava? Vito ra yena i mani? I mani vito ra n'wana wa yena loko u n'wi tiva?

⁵ Marito hinkwawo ya Xikwembu ma ringiwile efulweni, I xitlhangu eka lava chavelaka eka xona.

⁶ U nga engeteli marito ya xona, Xi nga ti ku holovela, u kumiwa u ri wa mavunwa.

⁷ Swimbirhi ndzi kombela eka wena: U nga ndzi tsoni ndzi nga si fa!

⁸ Tshineta ekule na mina ku kanganyisa ni marito ya mavunwa. U nga ndzi hi vusiwana, hambi ku ri ku fuwa; Ndzi wundle hi swakudya leswi ndzi ringanaka.

⁹ Kumbexana loko ndzi xurhile ndzi nga ku landzula, Ndzi ku: “Yehovha i mani?” Kumbe xana, loko ndzi ri xisiwana, ndzi yiva, Ndzi tlanga hi vito ra Xikwembu xa mina.

¹⁰ U nga hehli nandza eka n'wini wa yena, A nga ti ku rhukana, u kuma nandzu.

¹¹ Ri kona rixaka rin'we leri rhukanaka tata wa rona, Ri nga khensi mana wa rona.

¹² Ku ni rixaka rin'wana leri baseke emahlweni ka rona, Kasi a ri si tihlantswa thyaka ra rona;

¹³ Ina, rixaka ri kona ra mahlo lama tlakukeke, Ra tinxiyi leto leha;

¹⁴ Rixaka ri kona ra meno laya kotaka mafumu, Ra tinhlaya leti fanaka ni mikwana, Ku dya va nhlomulo emisaveni, Ni ku heta vapfumari exikarhi ka vanhu.

¹⁵ Nyulu wu ni vana va xisati vambirhi, va nge: “Nyika! Nyika!” Swilo swinharhu swi kona leswi nga xurhiki, Ndzi nga ku swa mune leswi nga vuriki ni siku ni rin'we: “Swi ringanile!”

¹⁶ I xivandla xa vafi, i khwiri leri nga tswariki, Ni misava leyi nga xurhiki mati, Ni ndzilo lowu nga vuriki ni siku ni rin'we: “Swi ringene.”

¹⁷ Tihlo ra munhu leri solaka tatana, Leri sandzaka ku yingisa manana, Mawukuwuku ya le nambyeni ma ta ri boxa, Mavondlo ya gama ma ta ri dya.

¹⁸ Swilo swinharhu swi kona leswi ndzi hlulaka, Ndzi nga ku swa mune leswi ndzi nga swi tiviki:

¹⁹ Ntila wa gama empfhukeni wa le tilweni, Ni ntila wa nyoka ebakweni ra ribye, Ni ntila wa byatso exikarhi ka lwandle, Ni ntila wa wanuna eka wanhwana.

²⁰ Mikhuva ya wansati wa mbiri yi tano na yona: Wa dya, a tihlangula nomu, A ku: “A ndzi endlanga swo biha!”

²¹ Misava yi rhurhumerisiwa hi swilo leswinharhu, Ndzi nga ku swa mune swi kona leswi yi nga ka yi nga swi rhwali;

²² I khumbi leri hundzukeke hosi, Ni xihunguki lexi xurheke vuswa,

²³ Ni wansati la nyenyiweke loko a tshuka a tekiwa, Ni nandzanyana wa wansati loko a dya ndzhaka ya nkosikazi ya yena.

²⁴ Swivandzana swa mune leswitsanana swi kona la emisaveni, Kambe swi tlharihile ngopfu:

²⁵ I vusokoti, ri nga tikwana leri pfumalaka matimba, Kasi hi ximumu ri hlengeleta swakudya;

²⁶ I timbila, ri nga tikwana leri tsaneke, Kasi ri tihlawulela tindlu emaribyeni;

²⁷ I tinjiya, hambi ti nga ri na hosi, Ti famba hinkwato hi mavandla;

²⁸ I lumpfana leri u ri tamelaka hi mavoko, Kasi ri nghena etindlwini ta tihosi.

²⁹ Swilo swinharhu leswi langutekaka, I mune leswi mafambele ya swona ma tsakisaka:

³⁰ I nghala yi nga nhenha exikarhi ka swivandzana hinkwaswo, Leyi nga chaviki nchumu;

³¹ I hanci leyi lunghiseriweke nyimpi kumbe xiphongo; Hambi yi ri hosi leyi munhu a nga faneriki ku yi kaneta.

³² Kungakuloko u endlile vusinge hi ku tikukumuxa, U anakanya leswo biha, veka voko enon'wini!

³³ Hikuva ku kama ntswamba swi humesa phehlwa, Ku kama tinhompfu swi humesa mongolo, Ku hlohlotela vukari swi humesa timholovo.