Swivuriso 18 - Xitsonga (Bibele)

¹ Munhu la tihlawulaka eka van'wana u lava ku titsakisa ntsena, U hlunamela hinkwaswo leswi nga ni mfanelo.

² Lexi tsakisaka xihunguki a hi ku fuwa vutlhari, Kambe i ku humesa leswi nga embilwini ya xona.

³ Loko ku humelela xidyohi, xi huma ni swisandzu; Tingana, na tona, ti ta ni ku sola.

⁴ Ku vulavula ka munhu i xidziva xa mati; Xihlovo xa vutlhari i nambu lowu pfelelaka.

⁵ A swi saseki ku ya hi nghohe ya mudyohi, Ku kaneta la lulameke eku avanyiseni.

⁶ Nomu wa xihunguki wu n'wi nghenisa etimholoveni, Kutani ririmi ra yena ri n'wi rhambela nhonga.

⁷ Nomu wa xihunguki i ku onhaka ka xona, Kambe ririmi ra xona i ntlhamu eka moya wa xona.

⁸ Ku vulavula ka muhlevi ku kota swakudya leswi xawulaka, Swi nghena ekhwirini, endzeni.

⁹ La khomaka ntirho wa yena hi ku loloha I makwavo wa mulovisi.

¹⁰ Vito ra Yehovha i khokholo ro tiya, La lulameke u chavela eka rona, u tshama eku tlakukeni.

¹¹ Rifuwo ra mufuwi i khokholo ra yena, Eku anakanyeni ka yena, i rirhangu ra xichavelo.

¹² Ku onhaka loko ku nga si humelela, mbilu ya munhu ya tidzunisa, Kambe ku titsongahata ku rhangela xidzumo emahlweni.

¹³ La hlamulaka a nga si twa, U kombisa vuphukuphuku bya yena u tivangela tingana.

¹⁴ Mbilu ya munhu yi n'wi tiyisa evuvabyini bya yena, Kambe mbilu leyi tsaneke, yi nga pfuxiwa hi mani?

¹⁵ Mbilu ya munhu wa ku anakanya yi fuwa vutivi, Ni tindleve ta lavo tlhariha ti lava byona.

¹⁶ Nyiko ya munhu yi n'wi anamisela ndlela, Yi n'wi tshinetela eka lavakulu.

¹⁷ La rhangaka a hlamula ehubyeni ingi u lulamile, Kambe un'wana, loko a humelela, a n'wi ringa.

¹⁸ Vuhlolotwana byi herisa timholovo, Byi avanyisa ni lavakulu.

¹⁹ Makwavo wa munhu u tlula hi ku nonon'hwa muti wa khokholo, Ku hambana ka vamakwavo ku kotisa timbanti ta yindlu ya vuhosi.

²⁰ Munhu u xurha hi mihandzu ya ririmi ra yena, U tikhorisa hi leswi humaka enon'wini wa yena.

²¹ Ku fa ni ku hanya swi kota hi ririmi, Lava ri rhandzaka va ta dya mihandzu ya rona.

²² La kumaka nsati wa xiviri u kumile ku kateka; U nyikiwile tintswalo hi Yehovha.

²³ Xisiwana xi vulavula hi ku khongela, Kambe mufuwi u hlamula hi ku nonon'hwa.

²⁴ La nga ni vanakulobye lavo tala u ta va ni khombo, Kambe ku ni nakulobye la tlulaka makwavo.