Swivuriso 13 - Xitsonga (Bibele)

¹ N'wana wo tlhariha u yingisela tidyondzo ta tata wa yena, Kambe musandzi a nga yingisi ku layiwa.

² Munhu u kuma vunene hi mihandzu ya nomu wa yena, Kambe ku navela ka timbabva i ku lovisa.

³ La tikhomaka nomu u hlayisa moya wa yena, Kambe la tshamaka a ahlamisa nomu wa yena, u ta wela eku loveni.

⁴ Mbilu ya lolo yi dyiwa hi ku navela, hambiswiritano, a ri fuwi nchumu Kambe moya wa ngingi wu ta nona.

⁵ La lulameke u venga mavunwa, Kambe lowo biha wa nyenyiwa, u taleriwa hi tingana.

⁶ Ku lulama ku ponisa la fambaka eku lulameni, Kambe ku homboloka ku lovisa mudyohi.

⁷ Un'wana a tiendla mufuwi, kasi a nga na xilo, Un'wana a tiendla xisiwana, kasi i mufuwi lonkulu.

⁸ Rifuwo ra munhu ri n'wi kutsulela ku hanya ka yena, Kambe xisiwana a xi yingisi ku tshinyiwa.

⁹ Ku vonakala ka lavo lulama i ku tsaka, Kambe rivoni ra lavo biha ra timeka.

¹⁰ Ku tikukumuxa ku humesa ku hambana; Kambe vutlhari byi le ka lava pfumelaka ku tsundzuxiwa.

¹¹ Rifuwo leri laviweke hi mano a ri nga tiyi, Kambe la hlengeletaka ha switsanana u ta andzeriwa hi rona.

¹² Ku langutela loku hlwelaka ku vavisa timbilu, Kambe ku navela, u vuya u swi kuma, i murhi wa vutomi.

¹³ La tsan'waka rito wa tilahla, Kambe la chavaka nawu u ta kuma hakelo.

¹⁴ Milawu ya la tlhariheke i xihlovo xa vutomi Ku tingawurisa vanhu emakheleni ya rifu.

¹⁵ Ku twisisa ku veleka tintswalo, Kambe ndlela ya mbabva ya nonon'hwa.

¹⁶ Muxiyaxiyi u endla hinkwaswo hi ku tiva, Kambe xihunguki xi tivisa vuhunguki bya xona.

¹⁷ Murhumiwa lowo biha u ta wela ekhombyeni, Kambe murhumiwa la tshembekaka wa hanyisa.

¹⁸ Vusiwana ni tingana i swa la alaka ku layiwa, Kambe la amukelaka ku tshinyiwa u ta dzunisiwa.

¹⁹ Ku navela loku hetisekeke ku tsakisa timbilu, Ku fularhela leswo biha i manyala eka xihunguki.

²⁰ La fambaka ni tintlhari u ta tlhariha, Kambe la tolovelaka swihunguki u ta onhaka.

²¹ Makhombo ma landzela vadyohi, Kambe mikateko i hakelo ya lavo lulama.

²² Munhu lonene u siyela vatukulu ndzhaka, Kambe rifuwo ra mudyohi ri siyeriwa la lulameke.

²³ Ku halula ka xisiwana ku veleka ngopfu, Kambe van'wana va lova hi ku kala ku lulama.

²⁴ La pfumataka n'wana wa yena nhonga, u n'wi vengile, Kambe la n'wi rhandzaka wa n'wi laya.

²⁵ Munhu wo lulama u dya a xurha swinene, Loko ma ri makhwiri ya lavo biha, ma twa ndlala.