Swivuriso 10 - Xitsonga (Bibele)

Swivuriso swa Solomoni.

¹ N'wana la tlhariheke u tsakisa tata wa yena, Kambe n'wana wo hunguka i nhlomulo eka mana wa yena.

² Rifuwo leri kumiwaka hi lavo biha a ri pfuni nchumu, Kambe ku lulama ku ponisa eku feni.

³ Yehovha a nga tshiki la lulameke a twa ndlala, Kambe wa bakanya ku navela ka lavo biha.

⁴ Lowa voko ro loloha u ta pfumala, Kambe mavoko ya switirhi ma ta va fuwisa.

⁵ La hlengeletaka hi xirimo i n'wana wo tlhariha, Kambe la etlelaka loko va tshovela i n'wana la khomisaka tingana.

⁶ Munhu la lulameke u rhwele ku kateka enhlokweni, Kambe nomu wa lowo biha wu funengeta mona.

⁷ Ku tsundzukiwa ka la lulameke i ku kateka, Kambe vito ra lowo biha ri ta bola.

⁸ Munhu wa mbilu yo tlhariha u amukela milawu, Kambe xihunguki hi milomu xi ta suva.

⁹ La fambaka hi ku lulama u famba hi ku rhula, Kambe la homboloxaka mafambele ya yena u ta tiviwa.

¹⁰ La tshunyetaka hi mahlo u vavisa la lulameke, Kambe xihunguki hi milomu xi ta suva.

¹¹ Nomu wa la lulameke i xihlovo xa vutomi, Kambe nomu wa lowo biha wu funengeta mona.

¹² Rivengo ri pfuxa timholovo, Kambe rirhandzu ri funengeta ku dyoha hinkwako.

¹³ Vutlhari byi kumiwa enon'wini wa la nga ni ku twisisa, Kambe nhonga yi le nhlaneni wa la nga twisisiki.

¹⁴ Lavo tlhariha va tihlengeletela vutivi, Kambe milomu ya swihunguki yi fika eku lahlekeni.

¹⁵ Vukosi bya mufuwi i khokholo ra yena, Kambe vusiwana bya xisiwana i ku lova ka xona.

¹⁶ La lulameke u tirhela ku hanya, Kambe la nga lulamangiki u tirhela ku homboloka.

¹⁷ Ku tsundzuka dyondzo i ndlela ya vutomi, Kambe loyi a alaka ku tshinyiwa wa lahleka.

¹⁸ La fihlaka rivengo u ni nomu wa mano, Kambe la hangalasaka mahlevo i xihunguki.

¹⁹ Eku vulavuleni loko tala, ku dyoha a ku pfumaleki, Hikwalaho, la tikhomaka nomu u tlharihile.

²⁰ Ririmi ra lowo lulama i silivhere leyi baseke, Kambe mbilu ya lowo biha i swahava.

²¹ Milomu ya la lulameke yi hanyisa lavo tala, Kasi swihunguki swi lova hi ku pfumala mano.

²² Mikateko ya Yehovha yi fuwisa munhu, A nga n'wi engeteli mikarhalo.

²³ Eka xihunguki, ku dlaya, i ku tlanga, Kambe vutlhari i bya munhu la twisisaka.

²⁴ Lexi lowo biha a xi chavaka, hi xona lexi nga ta n'wi wela ehenhla: Kambe lavo lulama va nyikiwa ku navela ka vona.

²⁵ Hilaha xihuhuri xi hundzaka hakona, lowo biha u hundzisa sweswo; Kambe la lulameke u tiyile makumu.

²⁶ Munhu wo loloha eka lava n'wi rhumaka, I ntsuvi enon'wini, ni musi emahlweni.

²⁷ Xichavo xa Yehovha xi andzisa masiku, Kambe malembe ya vadyohi ma ta komisiwa.

²⁸ Ku tshemba ka lava lulameke i ku tsaka, Kambe ku langutela ka lava nga lulamangiki ku ta lova.

²⁹ Ndlela ya Yehovha i khokholo eka la tengeke, Kambe eka lavo homboloka i ku lova ntsena.

³⁰ La lulameke a nga ka a nga tsekatseki, ni siku ni rin'we, Loko va ri lavo biha, va nga ka va nga hlweri la emisaveni.

³¹ Nomu wa lowo lulama wu humesa swo tlhariha, Kambe ririmi lero voyama ri ta susiwa.

³² Milomu ya lavo lulama yi tiva leswi tsakisaka, Kambe milomu ya lava nga lulamangiki yi tiva ku homboloka ntsena.