Sofoniya 1 - Xitsonga (Bibele)

Ku tshinyiwa Yuda na Yerusalema.

¹ Hi leri rito ra Yehovha leri nga ta eka Sofoniya, n'wana Kuxi, n'wana Gedaliya, n'wana Amariya, n'wana Hezekiya, emikarhini ya Yosiya, n'wana Amoni, hosi ya Yuda.

² “Ndzi ta susa kunene hinkwaswo leswi nga ehenhla ka misava, ku vula Yehovha.

³ Ndzi ta susa vanhu ni swiharhi, ndzi susa ni tinyanyana ta tilo, ni tinhlampfi ta lwandle, ni swikhunguvanyiso kun'we ni lavo biha, ndzi va ndzi tsema vanhu ehenhla ka misava,” ku vula Yehovha.

⁴ “Kutani ndzi ta tshambuluta voko ra mina ehenhla ka Yuda ni le henhla ka vaaki hinkwavo va Yerusalema, ndzi susa exivandleni lexo nsalo hinkwawo wa Baali, ni vito ra vadyondzisi va swifaniso kun'we ni vaprista;

⁵ ni lava khinsamelaka huvo ya tilo va ri ehenhla ka tindlu; ni lava khinsamaka, va hlambanya ha Yehovha, ni lava hlambanyaka ha Milikomo;

⁶ ni lava tlheleke ndzhaku ka Yehovha, ni lava nga lavangiki Yehovha, va nga n'wi vutisisangiki.”

⁷ Miyelani emahlweni ka Hosi Yehovha! Hikuva siku ra Yehovha ri tshinele; hikuva Yehovha u lunghise xitlhavelo, u basisile lava a va viteke.

⁸ Esikwini ra xitlhavelo xa Yehovha, “ndzi ta tshinya tihosana ni vana va hosi, ni hinkwavo lava funengeleke swifunengelo swa tiko rin'wana;

⁹ kambe, esikwini lero, ndzi ta tshinya hinkwavo lava tlulaka mhandze ya le nyangweni, lava tataka yindlu ya hosi ya vona hi leswi phangiweke hi vuhuruhuru ni ku xisa.”

¹⁰ “Esikwini lero,” ku vula Yehovha, “ku ta twakala huwa leyi pfaka enyangweni ya tinhlampfi, ni swirilo leswi pfaka etlhelweni rin'wana ra muti, ni ku onhaka lokukulu ka le switsungeni.

¹¹ Rilani, n'wina vaaki va Makitexi, hikuva tiko hinkwaro ra vaxavi ri herile, hinkwavo lava tirhwexeke hi mali va lovisiwile.

¹² “Enkarhini wolowo, ndzi ta lavisisa Yerusalema, hi swisa, ndzi tshinya vavanuna valavo va tiyeke ehenhla ka swisense swa vona, lava nga etimbilwini ta vona: ‘Yehovha a nga na ku endla swinene, ni loko ku ri ku endla hi ku biha.’

¹³ Rifuwo ra vona ri ta phangiwa, tindlu ta vona ti ta onhiwa; va ta aka tindlu, kambe va nga ka va nga tshami eka tona; va ta byala vhinya, kambe va nga ka va nga nwi vhinyo ya yona.”

¹⁴ Siku ra Yehovha lerikulu ri tshinele, ri tshinerile, ri vuya ri hatlisisa hi ku tlurisa. Twanani, siku ra Yehovha hi leri! Kona, nhenha yi rila hi ku vaviseka.

¹⁵ Siku rolero! Siku ra vukari, i siku ra khombo ni ra nhlomulo, i siku ra ku onha ni ra ku onhaka, i siku ra munyama lowa ntima, i siku ra mapapa ni ra munyama lowa ntima!

¹⁶ I siku ra mhalamhala ni ra nkosi lowu tlhavelaka miti leya makhokholo ni ya marhangu layo tlakuka.

¹⁷ Ndzi ta veka vanhu ekhombyeni, kutani va ta famba ku fana ni lava vo fa mahlo, hikuva va dyohele Yehovha; ngati ya vona yi ta chuluriwa ku fana ni ntshuri, ni nyama ya vona kukotisa vulongo.

¹⁸ Na yona silivhere ya vona, hambi wu ri nsuku wa vona, swi nga ka swi nga koti ku va lamulela esikwini ra vukari bya Yehovha; kambe tiko hinkwaro ri ta hisiwa hi ndzilo wa rilondzo ra yena; hikuva u ta herisa, a va a lovisa vaaki hinkwavo va misava hi xipuku.