Risimu ra Tinsimu 4 - Xitsonga (Bibele)1 Vona, u sasekile, murhandziwa wa mina; u sasekile swonghasi! Mahlo ya wena i matuva ehansi ka xisirhelo xa wena; Misisi ya wena yi fana ni ntlhambi wa timbuti, Lowu vonakaka entshaveni ya Giliyadi. 2 Meno ya wena ma fana ni ntlhambi wa tinyimpfu leti tsemeriweke, Leti pfaka eku hlantswiweni; Hinkwato ti veleke mahahla, A ku na yin'we exikarhi ka tona leyi nga nyumba. 3 Milomu ya wena yi fana ni ngoti ya xivunguvungu; Mavulavulele ya wena ma nandziha, Marhama ya wena ma fana ni swiphemu swa girenada Ehansi ka xisirhelo xa wena. 4 Nhamu ya wena yi fana ni khokholo ra Davhida Leri akeriweke matlhari, Laha ku hayekiwaka kona switlhangu swa khume ra madzana; Hinkwaswo i switlhangu swa tinhenha. 5 Mavele ya wena ha mambirhi ma kotisa timbavala letitsongo. Ta mahahla ha timbirhi leti dyelaka exikarhi ka makhon'wa. 6 Ku fikela loko byi xa, mindzhuti yi suka, Ndzi ta ya entshaveni ya mirha, ni le switsungeni swa mirhi ya risuna. 7 Murhandziwa wa mina, u sasekile swonghasi! A ku na xisandzu eka wena. 8 Tana hi muka eLebanoni, muvutiwa wa mina, U yima, u languta u ri enhlohlorhini ya Amana, Enhlohlorhini ya Seniri na Hermoni, Evuchavelweni bya tinghala, etintshaveni ta tiyingwe. 9 U teke mbilu ya mina, makwerhu muvutiwa wa mina, U teka mbilu ya mina hi tihlo rin'we ra wena, Hi nketana yin'we ya nhamu ya wena. 10 A hi ku nandziha ka rirhandzu ra wena, makwerhu, muvutiwa wa mina! Rirhandzu ra wena ri nandziha swonghasi, ri tlula vhinyo; Ku nun'hwela ka wena ku tlurisa mirhi hinkwayo ya risuna! 11 Milomu ya wena, muvutiwa wa mina, yi ntshona vulombe; Vulombe ni ntswamba swi le hansi ka ririmi ra wena; Ku nun'hwela ka swifunengelo swa wena ku fana ni ku nun'hwela ka Lebanoni. 12 Makwerhu, muvutiwa wa mina, u nsimu leyi biyeriweke, U xihlovo lexi pfariweke, ni xihlovo lexi tiyisiweke. 13 Swimila swa wena i nsimu ya mirhi ya girenada, Ya mihandzu leyo nandziha, ni tikipresi, ni tinarda. 14 Narda ni safroni, ni rihlanga, ni sinamoni, Ni mirhi hinkwayo leyi nun'hwelaka; Mirha ni mhangana, ni hinkwaswo leswa risuna. 15 U xihlovo xa masimu, U nseledyana wa mati lama pfelelaka, Ni milambu leyi pfaka eLebanoni. 16 Pfuka, moya wa le n'walungwini! U ta, wena dzonga! Mi hungela ensin'wini ya mina, Leswaku ku nun'hwela loku nandzihaka ka yona ku twakala. Murhandziwa wa mina a a nghene ensin'wini ya yena, A dya mihandzu ya yona leyo nandziha. |
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
Bible Society of South Africa