Risimu ra Tinsimu 1 - Xitsonga (Bibele)

¹ Risimu ra tinsimu, ri nga ra Solomoni.

² A a ndzi ntswontswe hi ku ntswontswa ka nomu wa yena! Hikuva rirhandzu ra wena ri nandziha ku tlula vhinyo.

³ Maakha ya wena ya ni risuna leri nun'hwelaka; Vito ra wena ri fana ni mafurha lama chuluriweke; Hikwalaho vanhwanyana va ku rhandza.

⁴ Ndzi koke, hi ta ku landzela hi le ndzhaku! Hosi a yi ndzi tise etindlwini ta yona; Hi ta tsaka, hi tsakela wena, Hi ta dzunisa rirhandzu ra wena leri tlulaka vhinyo; Va ku rhandza hakona, lava ku rhandzaka.

⁵ Ndzi wa ntima, kambe ndzi sasekile, n'wina, vanhwanyana va Yerusalema, Ndzi fana ni matende ya le Kedari, ni tinguvu ta mitsonga ya Solomoni.

⁶ Mi nga ndzi languti, hikuva ndzi wa ntima, Hikuva dyambu ri ndzi hisile; Vana va manana, va ndzi kariherile; Va ndzi endla muhlayisi wa vhinya; Kambe vhinya leyi nga ya mina hi xiviri a ndzi yi rindzanga.

⁷ Ndzi byele, wena la rhandziwaka hi moya wa mina, Laha u riselaka kona, laha u vundziselaka mitlhambi ya wena ninhlekanhi; Hikuva ndzi nga fana ha yini ni wansati la hambukelaka Emitlhambini ya vanakuloni xana?

⁸ Loko u nga swi tivi, wena la sasekeke exikarhi ka vavasati, Famba u landzelela mitila ya mitlhambi, U risa swimbutana swa wena emahlweni ka mitsonga ya varisi.

⁹ Ndzi ku fanisile, murhandziwa wanga, Ni ntlawa wa tihanci leti kokaka tigolonyi ta Faro.

¹⁰ Marhama ya wena ma sasekile exikarhi ka tinxaxa ta swingwavila, Ni nhamu ya wena hi mikarara ya vuhlalu.

¹¹ Hi ta ku endlela tiketana ta nsuku ti ni tikunupu ta silivhere.

¹² Kakuloko hosi ya ha tshamise etafuleni ra yona, Narda ya mina yi ri karhi yi humesa ku nun'hwela ka yona.

¹³ Murhandziwa wa mina u le ka mina ku fana ni nyandza ya mirhi, Leyi tshamaka exifuveni xa mina.

¹⁴ Murhandziwa wa mina u le ka mina ku fana ni xitluka xa troena Evhinyeni ya le Eni-Gedi.

¹⁵ Vona, u sasekile, murhandziwa wa mina, u sasekile! Mahlo ya wena ma fana ni ya tuva.

¹⁶ Murhandziwa wa mina vona, u sasekile, wa rhandzeka! Byetlelo bya hina hi lebya rilambyana.

¹⁷ Xivava xa yindlu ya hina i xa kedari; Kutani timbalelo ta hina i ta kipresi.