Pisalema 97 - Xitsonga (Bibele)

Ku fika ka Hosi ya le tilweni.

¹ Yehovha wa fuma. Misava a yi tsake, Swihlale hinkwaswo a swi tsakisise!

² Mapapa ni munyama swi n'wi rhendzele, Ku lulama, ni ku avanyisa, i masungulo ya xiluvelo xa yena.

³ Ndzilo wu n'wi rhangele emahlweni, Wu hisa hi matlhelo hinkwawo valala va yena.

⁴ Rihati ra yena ri voningela misava, Misava ya ri vona, ya rhurhumela.

⁵ Tintshava ti nyukisiwa kukota mumpfu emahlweni ka Yehovha, Emahlweni ka Hosi ya misava hinkwayo.

⁶ Matilo ma vula ku lulama ka yena, Ni matiko hinkwawo ma hlalela ku kwetsima ka yena.

⁷ Va khomiwa hi tingana, lava tirhelaka swifaniso, Lava tidzunisaka hi swikwembu swahava.

⁸ N'wi khinsameleni, n'wina swikwembu hinkwenu! Siyoni u swi twile, u tsakile, Vanhwanyana va Yuda va le ku tsakeni lokukulu, Hikwalaho ka ku avanyisa ka wena, Yehovha,

⁹ Hikuva wena Yehovha u muungameri wa misava hinkwayo, U tlakukile ngopfungopfu ehenhla ka swikwembu hinkwaswo.

¹⁰ N'wina lami rhandzaka Yehovha, vengani leswo biha! U hlayisa mimoya ya vakwetsimi va yena, U va kutsula emavokweni ya lavo biha.

¹¹ Ku vonakala ku byaleriwe la lulameke, Ni ku tsaka ku nyikiwa va timbilu to lulama.

¹² N'wina valulami, tsakelani Yehovha, Mi dzunisa vito ra yena lero kwetsima.