Pisalema 91 - Xitsonga (Bibele)

Xichavelo xa mutshembeki.

¹ La tshamaka exihundleni xa Loyi a nga henhlahenhla, U wisa endzhutini wa La nga ni matimba hinkwawo.

² Ndzi ku eka Yehovha: “U xichavelo ni khokholo ra mina, U Xikwembu xa mina, lexi ndzi xi tshembaka!”

³ Hi yena la ku tshunxaka entlhan'wini wa muhloti, Ni le ntungwini lowu herisaka.

⁴ U ta ku funengeta hi tinsiva ta yena. U ta kuma xisirhelo ehansi ka timpapa ta yena; Vunene bya yena, i xitlhangu ni nhlungula.

⁵ U nga ka u nga chavi michavo ya vusiku, Ni loko yi ri miseve leyi hahaka ninhlekanhi,

⁶ Hambi wu ri ntungu lowu ngungumelaka emunyameni, Kumbe mavabyi lama dlayaka ninhlekanhi lowukulu.

⁷ Hambi vanhu va khume ra madzana va nga wa etsheveni ra wena, Ni dzana ra madzana evokweni ra xinene ra wena, Wena, rifu ri nga ka ri nga ku tshineleri;

⁸ U ta languta ntsena hi mahlo ya wena, U ta vona hakelo ya vanhu va lunya.

⁹ Hikuva, wena Yehovha, u xichavelo xa mina! U tihlawulele Muungameri la tlakukeke xi va xichavelo xa wena.

¹⁰ Khombo ri nga ka ri nga ku fikeri, Ni mhangu yi nga ka yi nga ku weri.

¹¹ Hikuva u ta ku lerisela tintsumi ta yena, Ti ku hlayisa etindleleni ta wena hinkwato;

¹² Ti ku khawutela emavokweni ya tona, Leswaku nenge wa wena wu nga tshuki wu khunguvanyeka hi ribye.

¹³ U ta kandziyela nghala ni mhiri, U ta phyandlasa xinghalana ni ngwenya.

¹⁴ Leswi a ndzi rhandzaka ndzi ta n'wi kutsula; Ndzi ta n'wi tlakusa, hikuva u tivile vito ra mina,

¹⁵ U ta vitana eka mina, kutani ndzi ta n'wi hlamula; Ndzi ta va na yena ekhombyeni, Ndzi n'wi kutsula ni ku n'wi dzunisa;

¹⁶ Ndzi ta n'wi xurhisa hi masiku layo tala, Ni ku n'wi kombisa ku hlayiseka ka mina.