Pisalema 88 - Xitsonga (Bibele)

Ku vaviseka lokukulu.

Risimu. Pisalema ya vana va Kore. Eka mufambisi wa vasimi; ku yimbelela hi mikarhi ya ku xaniseka. Risimu ra Hemani, Muezra.

¹ Oho Yehovha, Xikwembu xa ku hlayiseka ka mina! Ndzi huwelela eka wena nhlekanhi ni vusiku.

² Xikhongelo xa mina a xi fike eka wena! U va u yingisa ku huwelela ka mina!

³ Hikuva moya wa mina wu xurhile hi makhombo, Ni vutomi bya mina byi voyamele exivandleni xa vafi.

⁴ Ndzi hlayiwile exikarhi ka lava rhelelaka esirheni, Ndzi fana ni munhu la heleriweke hi matimba.

⁵ Ndzi loyi a etleleke exikarhi ka vafi, Tanihi lava dlayiweke, lava etlelaka esirheni, Lava u nga va anakanyiki, Va hambanyisiweke na wena.

⁶ U ndzi cukumetile ekheleni lera ku enta, Emunyameni, ni le xiweni xa le hansi ngopfu.

⁷ Vukari bya wena bya ndzi tikela, Ndzi funengetiwe hi magandlati hinkwawo ya wena.

⁸ U ndzi tshinetile ekule ni vanakulorhi, U ndzi endlile la nyenyetsaka eka vona; Ndzi pfaleriwe laha ku nga humiwiki.

⁹ Mahlo ya mina ma hela hi ku vaviseka; Oho Yehovha! Ndza ku khongela hi masiku hinkwawo. Ndzi tshambuluta mavoko ya mina eka wena.

¹⁰ Xana u endlela vafi masingita? Vafi va pfuka va ku dzunisa xana?

¹¹ Xana vunene bya wena byi vuriwa esirheni, Ni ku lulama ka wena le xiweni xa rifu xana?

¹² Xana masingita ya wena ma tiviwa le munyameni, Ni ku lulama ka wena le misaveni yo rivaleka vana?

¹³ Kambe, Yehovha, ndza huwelela eka wena, Ku khongela ka mina ku fika nimpundzu eka wena.

¹⁴ Oho Yehovha! U sivela yini moya wa mina? U ndzi fihlelela yini mombo wa wena?

¹⁵ Mpfhuka ndzi nga tswariwa ndzi le vusiwaneni ni le kusuhi ni ku fa. Ndzi tshukisiwa hi michavo ya wena ndzi le ku karhatekeni.

¹⁶ Vukari bya wena byi ndzi wele ehenhla, Ku chavisa ka wena ku ndzi tsema nhlana;

¹⁷ Xi ndzi rhendzele tani hi mati hi masiku hinkwawo; Xi ndzi rhendzele swin'we hinkwako.

¹⁸ U tshinetele ekule na mina vanakulorhi ni tintangha ta mina; Leswi ndzi seleke na swona i munyama.