Pisalema 84 - Xitsonga (Bibele)

Ku tsaka ka munhu la akeke endlwini ya Xikwembu.

Eka mufambisi wa vasimi. Ha Gati. Pisalema ya vana va Kore.

¹ A hi ku nandziha ku tshama endlwini ya wena, Yehovha wa tinyimpi!

² Moya wa mina wu hisekela ni ku navela rikupakupa ra yindlu ya Yehovha, Mbilu ni nyama ya mina swi huwelela eka Xikwembu lexi hanyaka.

³ Swi tsandza ni xindzingiri xi ni xisaka, Ni mbewulana yi ni yindlu, laha yi vekaka mavondlo ya yona kona. Oho Yehovha wa tinyimpi, tialitari ta wena! Hosi ya mina ni Xikwembu xanga!

⁴ Ku katekile lava akeke endlwini ya wena! Va ku dzunisa hi mikarhi.

⁵ Ku katekile lava u nga matimba ya vona! Etimbilwini ta vona va kuma tindlela leti pfulekeke.

⁶ Loko va hundza enkoveni wa Baka, Wu hundzuka xihlovo; Ni mpfula ya hlovo yi va funengeta hi ndzalo.

⁷ Loko va famba, va engeteriwa matimba, Va kondza va ya humelela emahlweni ka Xikwembu le Siyoni.

⁸ Oho Yehovha, Xikwembu xa tinyimpi, yingisa ku khongela ka mina! Rhiya ndleve, oho Xikwembu xa Yakobo!

⁹ Oho Xikwembu! Wena xitlhangu xa hina, languta, U vona mombo wa muhlawuriwa wa wena!

¹⁰ Hikuva ku tshama siku rin'we endlwini ya wena, Swi tlula khume ra madzana kun'wana. Ndzi rhandza ku tshama erikupakupeni ra yindlu ya Xikwembu xanga, Ku tlula ku tshama emitsongeni ya lavo biha.

¹¹ Hikuva Yehovha Xikwembu i dyambu ni xitlhangu, Yehovha u nyika tintswalo ni ku kwetsima, A nga aleri nchumu eka lava fambaka eku lulameni.

¹² Oho Yehovha wa tinyimpi, ku katekile la ku tshembaka!