Pisalema 76 - Xitsonga (Bibele)

Muavanyisi wa tihosi ta misava.

Eka mufambisi wa vasimi. Hi magubu. Pisalema ya Asafa. Risimu.

¹ Xikwembu xi tiviwa hi Yuda, Vito ra xona rikulu eka Israele.

² Tabernakela ya xona yi le Salema. Ni vutshamo bya xona eSiyoni.

³ Hi laha a tshoveke miseve kona, Ni switlhangu, ni banga, ni matlhari ya ku lwa.

⁴ U hundzisa hi ku kwetsima, ni ku saseka Tintshava ta vawutli!

⁵ Vanhu lava va vurhenha ngopfu va phangiwile, Va tietlelele evurhongweni bya vona; A va tivanga ku tilwela, vanhu hinkwavo lava va tinhenha.

⁶ Hi ku chavisa ka wena, Xikwembu xa Yakobo, Vakhandziyi va tietlelele ni tihanci ta vona.

⁷ Wena, wa chaveka! I mani la nga yimaka emahlweni ka wena, Loko vukari bya wena byi pfuka?

⁸ Hi le henhla etilweni, u tivisile ku avanyisa ka wena, Kutani misava yi miyele hi ku chava,

⁹ Loko Xikwembu xi pfukile ku ta avanyisa, Ni ku ponisa hinkwavo lava xanisekaka la emisaveni.

¹⁰ Na byona, vukari bya munhu bya ku dzunisa, Loko u ambala vukari bya wena hinkwabyo.

¹¹ Vulani ku hlambanya ka n'wina eka Yehovha Xikwembu xa n'wina, mi va mi ku hlayisa, Hinkwavo lava n'wi rhendzelaka exikarhi a va tise tinyiko eka Loyi a chavisaka!

¹² Wa tsema ku tikurisa ka tihosana, Wa chaveka ni ka tihosi ta misava.