Pisalema 75 - Xitsonga (Bibele)

Ku avanyisa ka Xikwembu.

Eka mufambisi wa vasimi. “U nga lovisi.” Pisalema ya Asafa. Risimu.

¹ Ha ku tlangela, oho Xikwembu, ha ku tlangela, Vito ra wena ri le milon'wini ya hina; Hi hlaya swihlamariso swa wena.

² Enkarhini lowu ndzi nga ta va ndzi wu pimile, Ndzi ta avanyisa hi ku lulama.

³ Misava yi tsekatseka ni hinkwavo lava akeke eka yona, Mina ndza tiyisa timhandze ta yona.

⁴ Ndzi ku eka lava tidzunisaka: “Mi nga tshuki mi tidzunisa!” Ni ka timbabva: “Mi nga tlakusi tinhloko!”

⁵ Mi nga tlakusi tinhloko swonghasi, Mi nga vulavuli hi ku tikurisa swonghasi!

⁶ Hikuva ku tlakusiwa a ku humi evuxeni, Hambi le vupeladyambu, hambi le mananga,

⁷ Kambe i Xikwembu lexi avanyisaka; Xi tsongahata un'wana, xi tlakusa un'wanyana.

⁸ Hikuva ku ni ndzheko evokweni ra Yehovha, Lowu ku vilaka eka wona, vhinyo leyi teleke leswi pfanganyetiweke. Kutani yena wa chela ha wona; kunene lavo biha hinkwavo va misava, Va ta tswontswa, va nwa, va ko va heta.

⁹ Kutani mina, ndzi ta hlaya timhaka teto hi masiku ni masiku, Ndzi ta yimbelela eka Xikwembu xa Yakobo.

¹⁰ Kutani ndzi ta wisa matimba hinkwawo ya lavo biha; Matimba ya lavo lulama ma ta tlakusiwa!