Pisalema 70 - Xitsonga (Bibele)

Xikhongelo xa loyi a xanisiwaka.

Eka mufambisi wa vasimi. Pisalema ya Davhida ya ku tsundzuxa.

¹ Oho Xikwembu, hatlisa ku ta ndzi tshunxa! Yehovha, angwetla ku ndzi pfuna!

² A va khomiwe hi tingana, va rhurhumela, lava lavaka vutomi bya mina! A va tlhelele endzhaku, va sandziwa, lava rhandzaka ku onhaka ka mina!

³ A va tlherisiwe endzhaku ni tingana ta vona Lava vulaka “Aháà! Aháà!”

⁴ A va tsake va tsakisisa eka wena, Hinkwavo lava ku lavaka! Lava rhandzaka ku hlayiseka ka wena, A va vule hi masiku, va ku: “Xikwembu a xi kurisiwe!”

⁵ Mina, ndzi xisiwana, ndzi le khombyeni; Oho Xikwembu, ndzi hatlisele! U mupfuni wanga ni muntshunxi wanga; Yehovha, u nga hlweri!