Pisalema 69 - Xitsonga (Bibele)

Mahlomulo lamakulu ya Davhida.

Eka mufambisi wa vasimi. Hi Xoxanimi. Pisalema ya Davhida.

¹ Ndzi ponise, oho Xikwembu! Hikuva mati ma nghenile emoyeni wa mina.

² Ndzi nyupele endzhopeni laha ndzi hlulekaka ku yima; Ndzi nghene ematini ya ku enta, ma ndzi funengetile,

³ Ndzi hele matimba hi ku huwelela, mikolo ya mina yi omile; Mahlo ya mina ma hela hi ku languta eka Xikwembu xanga.

⁴ Va andzile ku tlula misisi ya nhloko ya mina Lava ndzi vengaka ntsena; Va ni matimba lava lavaka ku ndzi dlaya, Lava nga valala va mina, hambi ndzi nga ri na nandzu eka vona; Ndzi fanele ku tlherisa leswi ndzi nga swi yivangiki.

⁵ Oho Xikwembu! Wa tiva vuhunguki bya mina, Ni milandzu ya mina a yi fihliwanga eka wena.

⁶ Lava langutaka eka wena, Hosi Yehovha wa tinyimpi, Va nga tshuki va kanakana hikwalaho ka mina! Lava lavaka wena, Xikwembu xa Israele, Va nga tshuki va khomiwa hi tingana hikwalaho ka mina!

⁷ Hikuva ndzi soriwa hikwalaho ka wena, Ni tingana ti funengeta mombo wa mina.

⁸ Ndzi hundzukile muendzi eka vamakwerhu, La nga tiviwiki eka vana va manana;

⁹ Hikuva ku hiseka ka yindlu ya wena ku ndzi dyile, Ni swisandzu swa lava ku sandzaka swi ndzi wele ehenhla.

¹⁰ Ndzi ri karhi ndzi rila, ndzi titsona swakudya, Kambe ni leswi, swi hundzukile xisandzu eka mina.

¹¹ Ndzi ambala tinguvu to khwaxa, Kutani va ndzi hleka.

¹² Lava tshamaka ehubyeni, va vulavula ha mina, Ndzi risimu ra lava phyophyaka.

¹³ Kambe mina, ndza ku khongela, oho Yehovha! Hi nkarhi lowunene wa vukulu bya tintswalo ta wena Xikwembu; Ndzi hlamule hi vunene bya ku hlayiseka ka wena.

¹⁴ Ndzi humese endzhopeni, ndzi nga tshuki ndzi nghena eka wona; A ndzi humesiwe emavokweni ya valala va mina, ni le xidziveni!

¹⁵ Ndzi nga tshuki ndzi funengetiwa hi mati lama tsutsumaka, Xidziva xi nga tshuki xi ndzi mita, Khele ri nga tshuki ri pfala nomu wa rona ehenhla ka mina!

¹⁶ Ndzi hlamule, Yehovha, hikuva tintswalo ta wena ti nene. Hundzukela eka mina hi vukulu bya musa wa wena,

¹⁷ U nga fihli mombo wa wena eka nandza wa wena! Hikuva ndzi le mahlomulweni, hatlisa ku ndzi hlamula.

¹⁸ Tshinelela moya wa mina, u wu kutsula, Ndzi ponise hikwalaho ka valala va mina.

¹⁹ U tiva ku soriwa ka mina, ni tingana ta mina, ni ku sandziwa ka mina; Valala hinkwavo va mina va le mahlweni ka wena.

²⁰ Xisandzu xi handzule mbilu ya mina kambe ndza vabya; Ndzi langutele ku tweriwa vusiwana, kambe a swi kona, Ni lava ndzi miyetaka, kambe a ndzi va voni.

²¹ Va ndzi nyika nyongwa, swi va swakudya swa mina; Ni ku tima torha ra mina, va ndzi nwisa ntsuvi.

²² Tafula ra vona a ri ve rindzi emahlweni ka vona, Ni ntlhamu eku tsakeni ka vona.

²³ Mahlo ya vona a ma timiwe, ma nga ha voni, Tsekatsekisa mihlana ya vona hi masiku.

²⁴ Chulula vukari bya wena ehenhla ka vona, Ni ku leva ka vukari bya wena a ku va fikele.

²⁵ Vuako bya vona a byi hundzuke mananga, Ku nga ha vi na muaki emitsongeni ya vona!

²⁶ Hikuva va xanisa loyi u n'wi beke; Kutani va vulavula hi ku vaviseka eka lava u va tlhaveke.

²⁷ Engetela swidyoho ehenhla ka swidyoho swa vona, Kambe va nga ngheni eku lulameni ka wena!

²⁸ A va hlanguriwe ebukwini ya vutomi, Kutani va nga tsariwi swin'we ni lava lulameke!

²⁹ Mina, ndzi le khombyeni ni le ku vavisekeni; Kambe ku pfuna ka wena ku ta ndzi pfuxa, oho Xikwembu!

³⁰ Ndzi ta twarisa vito ra Xikwembu hi tinsimu, Ndzi ta ri kurisa hi ku ri dzunisa.

³¹ Leswo swi ta tsakisa Yehovha ku tlula nkunzi, Leyi nga ni timhondzo ni masondzo.

³² Lava nga enhlomulweni va ta swi vona, va tsaka; N'wina lava lavaka Xikwembu timbilu ta n'wina ti ta hanya.

³³ Hikuva Yehovha wa yingisa swisiwana, Kutani a nga sandzi vabohiwa va yena.

³⁴ Matilo ni misava a swi n'wi twarise, Malwandle ni hinkwaswo leswi fambafambaka eka wona!

³⁵ Hikuva Yehovha u ta ponisa Siyoni u ta aka miti ya Yuda; Va ta tshama kona, va fuma tiko.

³⁶ Vatukulu va malandza ya yena va ta ri endla ndzhaka ya vona. Kutani lava rhandzaka vito ra yena va ta aka kona.