Pisalema 67 - Xitsonga (Bibele)

Vamatiko hinkwavo va ta vonga Xikwembu.

Eka mufambisi wa vasimi. Hi mugubu. Pisalema. Risimu.

¹ Xikwembu a xi hi tsetselele, a xi hi katekise, A xi vonakarise mombo wa xona ehenhla ka hina,

² Leswaku ndlela ya wena yi tiviwa emisaveni Ni ku hlayiseka ka wena exikarhi ka matiko hinkwawo!

³ Matiko ma ta ku vonga, oho Xikwembu! Vamatiko hinkwavo va ta ku twarisa.

⁴ Matiko ma ta tsaka, ma tsakisisa, Hikuva u ta avanyisa matiko hi ku lulama, U ta fambisa matiko emisaveni.

⁵ Matiko ma ta ku vonga, oho Xikwembu! Vamatiko hinkwavo va ta ku twarisa.

⁶ Misava yi humesile mihandzu ya yona, Xikwembu, Xikwembu xa hina xi ta hi katekisa.

⁷ Xikwembu xi ta hi katekisa, Kutani matlhelo hinkwawo ya misava ma ta xi chava.